ކާބުލް، އަފްގާނިސްތާން (ޖުލައި 24) - ތާލިބާން ހަނގުރާމަވެރިން ހުއްޓުވުމަށް އަފްގާނިސްތާނުގެ 34 ޕްރޮވިންސްގެ ތެރެއިން 31 ޕްރޮވިންސްގައި ރޭގަނޑު ކާފިއު ހިންގަން އިއުލާނުކޮށްފި އެވެ.
ތާލިބާނުންގެ ހަމަލާތައް ވަރުގަދަކޮށްފައިވާ މި ދަނޑިވަޅުގައި އެ ގްރޫޕުން ވަނީ މުހިއްމު ބޯޑަރު ކްރޮސިންތަކާއި، ޑިސްޓްރިކްޓުތައް ހިފައި، ޕްރޮވިންސް ވެރިރަށްތަކާ ކައިރިއަށް ޖެހިފަ އެވެ.
ތާލިބާނުންގެ ހަމަލާތައް ވަރުގަދަ ކުރީ މިދިޔަ މޭ މަހު އެމެރިކާ އާއި ނޭޓޯގެ ފައުޖުތައް އަފްގާނިސްތާން ދޫކޮށް ދާން ފެށުމުންނެވެ. ސެޕްޓެމްބަރު 11 ގެ ކުރިން ބޭރު ސިފައިން އެ ގައުމުން ފައިބާނެ އެވެ.
"ހަމަނުޖެހުން ކޮންޓްރޯލްކޮށް، ތާލިބާނުންގެ ހަރަކާތްތައް ލިމިޓު ކުރުމަށް 31 ޕްރޮވިންސްގައި ރޭގަނޑު ކާފިއު ހިންގާނެ،" އިންޓީރިއާ މިނިސްޓްރީން ނެރުނު ބަޔާނެއްގައި ބުންޏެވެ.
ކާފިއު ނުހިންގާނެ ހަމައެކަނި ސަރަހައްދުތަކަކީ ވެރިރަށް ކާބުލް، ޕަންޖްޝީރް އަދި ނަންގަރްހާރް އެވެ. އެހެން ހުރިހާ ޕްރޮވިންސެއްގައި ރޭގަނޑު 10:00 އިން ފަތިހު 04:00 އަށް ކާފިއު ތަންފީޒު ކުރާނެ އެވެ.
ބޭރުގެ ސިފައިންގެ 95 ޕަސެންޓު އަފްގާނިސްތާނުން ގޮސްފައި ވާއިރު، އެ ގައުމުގެ 400 ޑިސްޓްރިކްޓެއްގެ ކޮންޓްރޯލް މިހާރު އޮތީ ތާލިބާނުންގެ އަތުގަ އެވެ.
އީދު ބަންދާ ދިމާކޮށް ހަމަލާ ބަދަލު ކުރުން މެދުކަނޑާލި ނަމަވެސް، މިހާރު އަނެއްކާވެސް ދަނީ ހަމަލާތައް ބަދަލު ކުރަމުންނެވެ. އަފްގާން ސިފައިން ބުނީ 24 ގަޑިއިރު ތެރޭ ތާލިބާނުންގެ 260 ހަނގުރާމަވެރިން މަރާލާފައިވާ ކަމަށެވެ.
މިދިޔަ ބުރާސްފަތި ދުވަހު އެމެރިކާގެ ޕެންޓަގަންގެ ތަރުޖަމާނު ޖޯން ކާބީ ވިދާޅުވީ ސިފައިން ފައިބަމުންދާ މި ދަނޑިވަޅުގައި ވެސް ވައިގެ ހަމަލާތައް ދީގެން އަފްގާން ސިފައިންނަށް އެހީތެރިކަން ފޯރުކޮށްދީފައިވާ ކަމަށެވެ.
ތަޖުރިބާކާރުން ބުނެފައި ވަނީ މިދިޔަ މޭ މަހުން ފެށިގެން އެމެރިކާއިން ވައިގެ ހަމަލާތައް ހުއްޓާލައި، އަފްގާން ސަރުކާރަށް ފޯރުކޮށްދޭ އަސްކަރީ އެހީ މަދު ކުރުމަކީ ތާލިބާނުންނަށް ކުރި ލިބެމުންދާ ސަބަބު ކަމަށެވެ.
ހުކުރު ދުވަހު ތާލިބާނުން ވަނީ އެމެރިކާއިން ވައިގެ ހަމަލާ ދިނުމާ ދެކޮޅަށް އިންޒާރު ދީފަ އެވެ. އެފަދަ ކަމެއް ކޮށްފި ނަމަ ބަދަލު ހިފާނެ ކަމުގެ އިންޒާރު ދިނެވެ.
"އެކަން ވާނީ ސޮއިކޮށްފައިވާ އެއްބަސްވުމާ ސީދާ ހިލާފު އަމަލަކަށް،" މިދިޔަ އަހަރު އެމެރިކާ ސަރުކާރާއި ތާލިބާނުންނާ ދެމެދު ސޮއިކުރި އެއްބަސްވުމަކަށް އިޝާރާތްކޮށް އެ ގްރޫޕުން ބުންޏެވެ.
