މުމްބާއީ، އިންޑިއާ (ޖުލައި 24) - ބޯކޮށް ވާރޭވެހުމުގެ ސަބަބުން ފެންބޮޑުވެ ހިނގި ބިންގަނޑު ކަނޑައިގެން ދިޔަ ހާދިސާތަކުގައި އިންޑިއާއިން މަރުވި މީހުންގެ އަދަދު 76 އަށް އަރާފައި ވާއިރު، ގެއްލިފައިވާ މީހުން ހޯދުމުގެ މަސައްކަތް އަދިވެސް ކުރަމުން އެބަ ދެ އެވެ.
މުމްބާއީގެ ދެކުނުން އޮންނަ ރާއިގަދް ޑިސްޓްރިކްޓުގައި ބިންގަނޑު ކަނޑައިގެން ގޮސް ގެތަކަށް ފަސް އެޅިފައި ވާއިރު، 68 މީހަކު އަދިވެސް ނުފެނެ އެވެ. އިންޑިއާގެ ހުޅަނގު އައްސޭރި ފަށަށް ބޯކޮށް ވާރޭ ވެހުމުން ގިނަ ހިސާބުތަކުގައި ފެންބޮޑުވި އެވެ.
"މި ޑިސްޓްރިކްޓުގައި ބިންގަނޑު ކަނޑައިގެން ދިޔުމުގެ ހާދިސާތަކުގައި 43 މީހުން މަރުވެއްޖެ. މީހުން ސަލާމަތް ކުރުމުގެ މަސައްކަތް އަދިވެސް ދަނީ ކުރިއަށް،" ރާއިގަދްގެ ޑިޒާސްޓާ މެނޭޖްމަންޓް އޮފިޝަލް ސާގަރް ޕަތަކް އޭއެފްޕީއަށް ވިދާޅުވި އެވެ.
ނޭވީ އާއި ސިފައިން އަދި އެއާފޯސް މެމްބަރުން ދަނީ ހާލުގައި ޖެހިފައިވާ މީހުން ސަލާމަތްކޮށް، ރައްކާތެރި ހިސާބުތަކަށް ބަދަލު ކުރަމުންނެވެ. ނަމަވެސް ބިންގަނޑު ކަނޑައިގެން ގޮސް މަގުތައް ބަންދުވުމުން އެ މީހުންގެ މަސައްކަތަށް ވެސް ވަނީ ހުރަސް އެޅިފަ އެވެ.
މުމްބާއީ އާއި ގޯއާއާ ދެމެދު އޮންނަ މައި ހައިވޭ ވެސް ވަނީ ބަންދުވެފަ އެވެ. މިދިޔަ ބުރާސްފަތި ދުވަހު މުމްބާއީއާ 250 ކިލޯމީޓަރު ދުރުގައި އޮންނަ ޗިޕްލުން ސިޓީއަށް މެދުކެނޑުމެއް ނެތި 24 ގަޑިއިރު ވަންދެން ވާރޭ ވެހުމަށް ފަހު، 3.5 މީޓަރަށް ފެންބޮޑުވި އެވެ.
އެ ތަނުގައި އޮންނަ ވަޝިސްތީ ކޯރު ފުރިގެން ބަންޑުންވެ، ކައިރި މަގުތަކާއި ގެތައް ވެސް އޮތީ ފެނުއަޑީގަ އެވެ. މަހަރާޝްތްރަ ސްޓޭޓުގެ ޗީފް މިނިސްޓަރު އުއްދަވް ތަކެރާ ވިދާޅުވީ މަގުތަކާއި ބްރިޖުތައް ހަލާކުވެފައި ވާތީ އެހީ ފޯރުކޮށްދިނުމުގައި ލަސްވަމުންދާ ކަމަށެވެ.
ނޭވީން ވަނީ ރަބަރު ބޯތާއި، ލައިފްބޯއީ އާއި ހާއްސަ ޑައިވަރުން ހިމެނޭ ހަތް ޓީމު މަސައްކަތަށް ނެރިފަ އެވެ. އޭގެ އިތުރުން ހެލިކޮޕްޓަރުތަކުން ވެސް ދަނީ މީހުން ރައްކާތެރި ހިސާބުތަކަށް ބަދަލު ކުރަމުންނެވެ.
އިންޑިއާގެ މިޓިއޮރޮލޮޖިކަލް ޑިޕާޓްމަންޓުން ވަނީ އެ ސްޓޭޓުގެ ބައެއް ސަރަހައްދުތަކަށް ކުރިއަށް އޮތް ދުވަސްތަކުގައި މޫސުން ގޯސްވާނެ ކަމަށް ލަފާކޮށް ރަތް އެލާޓް ނެރެފަ އެވެ.
ޖޫން އިން ސެޕްޓެމްބަރަށް ކޮންމެ އަހަރަކު ވެސް ދިމާވާ ވިއްސާރަ މޫސުމުގައި އިންޑިއާގައި ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތައް ހިނގަ އެވެ. އޭގެ އިތުރުން ބޯކޮށް ވާރޭ ވެހޭތީ ބަލިކަށި، ގިނަ ދުވަސްވެފައިވާ އިމާރާތްތައް ވެއްޓުމަކީ ވެސް އާންމުކޮށް ދިމާވާ ކަމެކެވެ.
މިދިޔަ ހުކުރު ދުވަހު ވެސް މުމްބާއީގެ އިމާރާތެއް ވެއްޓި ހަތަރު މީހަކު މަރުވި އެވެ. އޭގެ ހަފްތާއެއްހާ ދުވަސް ކުރިން މުމްބާއީގައި ބިންގަނޑު ކަނޑައިގެން ގޮސް އަދި ފާރެއް ވެއްޓިގެން ވެސް ގިނަ ގެތަކެއް ހަލާކުވެ 34 މީހުން މަރުވެފައި ވެ އެވެ.
މިދިޔަ ހަފްތާ ބަންދުގައި ފެން ސާފު ކުރާ ކޮމްޕްލެކްސެއްގެ މަސައްކަތަށް ވެސް ހުރަސް އެޅުނެވެ. ގާތްގަނޑަކަށް 20 މިލިއަން މީހުން ދިރިއުޅޭ މުމްބާއީގެ ބައެއް ހިސާބުތަކަށް ފެން ނުލިބި އެތައް އިރަކު ތިބެން ޖެހުނެވެ.
މިދިޔަ އޭޕްރިލް މަހު ޝާއިއު ކުރި ޕޮޓްސްޑޭމް އިންސްޓިޓިއުޓް ފޯ ކްލައިމެޓް އިމްޕެކްޓް ރިސާޗްގެ ރިޕޯޓެއްގައިވާ ގޮތުން މޫސުމީ ބަދަލުގެ ސަބަބުން އިންޑިއާގެ ހޫނު މޫސުމާއި ވިއްސާރަ މޫސުމުގައި ވެސް ކުރާ އަސަރު ދަނީ އަހަރަކަށް ވުރެ އަހަރެއް ބޮޑުވަމުންނެވެ.
