ބާލިން، ޖަރުމަނު ވިލާތް (ޖުލައި 24) - އާދަޔާ ހިލާފަށް ބޯކޮށް ވާރޭވެހި ފެންބޮޑުމުގެ ސަބަބުން ޖަރުމަނުގައި މަރުވި މީހުންގެ އަދަދު 180 އަށް އަރާފައި ވާއިރު، ގެއްލުނު 150 މީހަކު އަދިވެސް ނުފެންނަ ކަމަށް ކަމާ ބެހޭ ފަރާތްތަކުން ބުނެފި އެވެ.
މި ހަފްތާ ބަންދުގައި އިތުރަށް ވާރޭ ވެހޭނެ ކަމަށް މޫސުން ލަފާކޮށްފައި ވެ އެވެ. އެހެންވެ ޖަރުމަނުގެ މިޓިއޮރޮލޮޖިކަލް ސާވިސަސްއިން އެދިފައި ވަނީ ރައްކާތެރިކަމުގެ ފިޔަވަޅުތައް އަޅައިގެން ތިބުމަށެވެ.
ފުލުހުން ބުނީ ވިއްސާރައިގެ އަސަރު އެންމެ ބޮޑަށް ކުރި ރައިންލޭންޑް-ޕެލެޓިނޭޓް ހިސާބުން 132 މީހުން މަރުވެ، 766 މީހުން ޒަހަމްވި ކަމަށެވެ.
އެ ސަރަހައްދުން އިތުރު 149 މީހަކު ގެއްލިގެން ހޯދަމުން ދާއިރު، މަރުވެފައިވާ މީހުންގެ ޖުމްލަ އަދަދަށް މާ ބޮޑު ބަދަލެއް ނާންނާނެ ކަމަށް އެ ސްޓޭޓުގެ އިންޓީރިއާ މިނިސްޓަރު ވަނީ ވިދާޅުވެފަ އެވެ.
ރޮޖާ ލެވެންޓްޒް ވިދާޅުވީ ގެއްލިގެން ހޯދާ މީހުންގެ ލިސްޓުގައި މި ވަގުތު ޗުއްޓީގައި އުޅޭ މީހުންގެ ނަންތައް ހިމެނޭ ކަމަށެވެ. ގެއްލުނު އެންމެން ފެންނާނެ ކަމުގެ ޔަގީންކަމެއް ނެތް ކަމަށް އޭނާ ވިދާޅުވި އެވެ.
އެ މީހުން ހޯދުމުގެ މަސައްކަތް ފުލުހުން ކުރަމުން ދަނީ ހެލިކޮޕްޓަރާއި 30 ކުއްތާގެ އެހީގަ އެވެ. ކައިރީގައިވާ ނޯތުރައިން-ވެސްޓްފޭލިއާއިން ވެސް 47 މީހަކު މަރުވެފައި ވެ އެވެ.
ކޮލޯންގެ ފުލުހުން ބުނީ ދެ މީހަކު ގެއްލިގެން ހޯދަމުންދާ ކަމަށެވެ. އޭގެ އިތުރުން ބަވޭރިއާއިން ވެސް މީހަކު މަރުވެފައި ވެ އެވެ. ޖަރުމަނު ކައިރީގައި އޮންނަ ބެލްޖިއަމަށް ވެސް ވިއްސާރައިގެ އަސަރު ދަނީ ކުރަމުންނެވެ.
އެ ގައުމުން މިހާތަނަށް 36 މީހަކު މަރުވެފައި ވާއިރު، މުޅި ހުޅަނގު ޔޫރަޕުން މި ވިއްސާރައިގައި މަރުވި މީހުންގެ އަދަދު ވަނީ 216 އަށް އިތުރުވެފަ އެވެ.
