ނިއު ދިއްލީ، އިންޑިއާ (ޖުލައި 20) - އިޒްރޭލުން އުފައްދާފައިވާ ސްޕައިވެއާ، ޕެގަސޫސް ބޭނުންކޮށްގެން ސިޔާސީ ފަރާތްތަކަށް ޖާސޫސް ކުރާ ކަމުގެ ތުހުމަތުތަކާއެކު އިންޑިއާގެ މަޖިލިސް ހޫނުވެއްޖެ އެވެ.
މައި އިދިކޮޅު ކޮންގްރެސްއާ ގުޅިގެން އެހެން ޕާޓީތަކުގެ މެމްބަރުން ވެސް ދަނީ މަޖިލީހުގެ މަތިގެ އަދި ތިރިގޭގެ ސެޝަންތަކުގައި އަޑުގަދަކޮށް، ތުހުމަތުތައް ބެލުމަށް ގޮވާލަމުންނެވެ.
އެހެންވެ ފާއިތުވި ދެ ދުވަހު ވެސް މަޖިލިސް ޖަލްސާތައް ކުރިއަށް ގެންދެވިފައެއް ނުވެ އެވެ. ހޯމަ ދުވަހު ޖަލްސާތައް ފެށީ ކޮވިޑާ ގުޅިގެން މިދިޔަ މާޗް މަހު ޖަލްސާތައް މެދުކަނޑާލުމަށް ފަހު އެވެ.
ކޮންގްރެސްގެ ތަރުޖަމާނު ޝަކްތިސިން ގޯހިލް ވިދާޅުވީ ސިޔާސީ މީހުންނާއި، ނޫސްވެރިންނާއި، އެކްޓިވިސްޓުން އަދި ސަރުކާރަށް ފާޑުކިޔާ މީހުންނަށް ފާރަލުމަށް ޕެގަސޫސް ބޭނުން ކުރަ ކަމަށް ތުހުމަތު ކުރެވޭ ކަމަށެވެ.
އަދި ބޮޑު ވަޒީރު ނަރެންދްރަ މޯދީގެ ސަރުކާރުން އެކަން ސާފުކޮށްދޭން ޖެހޭނެ ކަމަށް އޭނާ ވިދާޅުވި އެވެ. އެއީ ހަގީގަތެއް ނަމަ މަޖިލިސް ކޮމިޓީން މައްސަލަ ބަލަން ވެސް ގޮވާލެއްވި އެވެ.
އެ މައްސަލައިގައި ކޮންގްރެސް ޕާޓީގެ އާއްމު މެމްބަރުން ވަނީ ނިއު ދިއްލީގައި މުޒާހިރާ ވެސް ކޮށްފަ އެވެ. ފުލުހުން ވަނީ އޭގެ ތެރެއިން ބައެއް މީހުން ހައްޔަރުކޮށްފަ އެވެ.
މީޑިއާ ކުންފުނިތަކަކުން ހެދި ތަހުގީގަކުން ދައްކާފައިވާ ގޮތުގައި ޕެގަސޫސް ސްޕައިވެއާ އުފެއްދު އިޒްރޭލުގެ އެންއެސްއޯ ގްރޫޕުގެ ކްލަޔަންޓުންނަށް މުހިއްމު ފަރާތްތަކުގެ ތެރޭގައި 1000 އަށް ވުރެ ގިނަ އިންޑިއާ މީހުންގެ ފޯނު ނަންބަރު ހިމަނާފައި ވެ އެވެ.
އޭގެ ތެރެއިން 300 އެއްހާ ފޯނު ނަންބަރު ނިސްބަތްވާ މީހުންގެ ވަނަވަރު ދެނެގަނެފައި ވާއިރު، އޭގެ ތެރޭގައި މޯދީއާ އެންމެ ވާދަވެރި ކޮންގްރެސްގެ ލީޑަރު ރާހުލް ގާންދީ ހިމެނިވަޑައިގަންނަވަ އެވެ.
އޭގެ އިތުރުން ސިޔާސީ އެކި ފަރާތްތަކާއި، ނޫސްވެރިންނާއި، އެކްޓިވިސްޓުން އަދި ސަރުކާރަށް ފާޑުކިޔާ މީހުންނާއި ދާދި ފަހުން އައްޔަނު ކުރި އައިޓީ މިނިސްޓަރު އަޝްވިނީ ވައިޝްނޯވް ވެސް ހިމެނެ އެވެ.
އެ ނަންބަރުތަކުގެ ތެރޭގައި ހިމެނޭ އިތުރު މީހުންނަކީ އިންޑިއާގެ ކުރީގެ އުއްތަމަ ފަނޑިޔާރާ ދެކޮޅަށް ޖިންސީ ފުރައްސާރައިގެ ތުހުމަތު ކުރި އަންހެނަކާއި، ޓިބެޓްގެ ބުދިސްޓު ލީޑަރުންނާއި، ޕާކިސްތާނުގެ ޑިޕްލޮމެޓުން އަދި ޗައިނާގެ ނޫސްވެރިންނެވެ.
ތަހުގީގު ހިންގުމުގައި އުޅުނު މީޑިއާ ކުންފުނިތަކުގެ ތެރޭގައި ހިމެނޭ ވޮޝިންޓަން ޕޯސްޓުން ބުނީ ކާމިޔާބުކަމާއެކު ޖާސޫސް ކުރެވެނީ ކިހާ މިންވަރަކަށް ކަން ބުނަން ނޭނގޭ ކަމަށެވެ.
ނަމަވެސް ލިސްޓުގައި ހިމެނޭ ނަންބަރުތައް ދައްކުވައިދޭ 22 ސްމާޓްފޯނުގެ ފޮރެންސިކް އެނެލިސިސްއިން ދެއްކު ގޮތުގައި ޕެގަސޫސްއިން 10 ފޯނަށް ޓާގެޓް ކުރި އެވެ. އޭގެ ތެރެއިން ކާމިޔާބުކަމާއެކު ހަތް ފޯނު ބޭނުންކޮށްގެން ޖާސޫސް ކުރެވުނެވެ.
އިންޑިއާ ސަރުކާރުން ވަނީ ހުރިހާ ތުހުމަތެއް ދޮގުކޮށްފަ އެވެ. ހޯމް މިނިސްޓަރު އަމިތު ޝާހް ވިދާޅުވީ ތުހުމަތުގެ މަގްސަދަކީ "ދުނިޔޭގެ ފެންވަރުގައި އިންޑިއާ ބަދުނާމު ކުރުން" ކަމަށެވެ.
