ނިއު ދިއްލީ، އިންޑިއާ (ޖުލައި 20) - އިންޑިއާގައި ކޮވިޑް ޖެހިގެން މަރުވި މީހުން އަދަދުތައް ރަސްމީ ތަފާސްހިސާބުން ދައްކާ 415،000 އަށް ވުރެ 10 ގުނަ އިތުރު ކަމަށް ދިރާސާއަކުން ބުނެފި އެވެ.
ސެންޓާ ފޯ ގްލޯބަލް ޑެވެލޮޕްމަންޓްގެ ދިރާސާއިން ބުނީ ކޮވިޑް ބަލިމަޑުކަން ފެށުނު ފަހުން މިދިޔަ ޖޫން މަހާ ހަމައަށް މި ބަލީގައި އިންޑިއާއިން 3.4 މިލިއަނާއި 4.7 މިލިއަނާ ދެމެދުގެ އަދަދަށް މީހުން މަރުވެފައި ވެ އެވެ.
އިންޑިއާއިން އަލަށް ފެނުނު ޑެލްޓާ ވޭރިއެންޓުގެ ސަބަބުން މިދިޔަ އޭޕްރިލް އަދި މޭ މަހު ވަރަށް ގިނަ އަދަދެއްގެ މީހުން އިންޑިއާގައި މަރުވި އެވެ.
"މަރުގެ ހަގީގީ އަދަދުތައް އުޅޭނީ މިލިއަނުގައި، ލައްކައިގައެއް ނޫން. މިއީ އިންޑިއާއަށް މިނިވަންކަން ލިބުނު ފަހުން އަދި އިންޑިއާ އާއި ޕާކިސްތާން އަދި ބަންގްލަދޭޝް ވަކިވި ފަހުން ކުރިމަތިވި އެންމެ ބޮޑު އިންސާނީ ކާރިސާ،" ދިރާސާ ކުރި ފަރާތްތަކުން ބުންޏެވެ.
ރަސްމީ ތަފާށްހިސާބުން ދައްކާ ގޮތުގައި 1.3 ބިލިއަން މީހުން ދިރިއުޅޭ އިންޑިއާގައި މި ބަލީގައި މިހާތަނަށް މަރުވީ 413،000 މީހުންނެވެ. މިއީ ދުނިޔޭގެ ނިސްބަތުން ތިން ވަނައަށް އެންމެ ގިނަ އަދަދެވެ.
އެއް ވަނައިގައި އޮތް އެމެރިކާއިން 609،000 މީހުން އަދި ދެ ވަނައިގައި އޮތް ބްރެޒިލްއިން 542،000 މީހުން މަރުވެފައި ވެ އެވެ.
އިންޑިއާގެ ރަސްމީ ތަފާސްހިސާބުން ހަގީގީ މަންޒަރު ނުފެންނަ ކަމަށް ތަޖުރިބާކާރުން ބުނާތާ އެތައް ދުވަހެއް ވެއްޖެ އެވެ. ބައެއް ސްޓޭޓުތަކުން ވަނީ "ބެކްލޮގް" މަރުގެ ގޮތުގައި ވެސް އެއް ފަހަރާ ގިނަ އަދަދުތައް ރިކޯޑުކޮށްފަ އެވެ.
