ރޯމް، އިޓަލީ (ޖުލައި 20) - ރޯމާގެ ކޯޗުކަމާ ހަވާލުވެ، ހޯސޭ މޮރީނިއޯ އެ ޓީމުގެ ކުޅުމުގެ ސްޓައިލަށް އަވަސް ބަދަލުތަކެއް ގެންނަން ބޭނުންވާތީ ޓްރެެއިނިން ދަނޑުގައި ޑްރޯން ޓެކްނޮލޮޖީ ބޭނުންކުރަން ފަށައިފި އެވެ.
ޑްރޯން ޓެކްނޮލޮޖީގެ އެހީ ހޯދާއިރު، މޮރީނިއޯ ވަނީ ޓްރެއިނިން ދަނޑު ކައިރީގައި ބޮޑު ސްކްރީނެއް ބަހައްޓައިފަ އެވެ. އަދި ޓްރެއިނިން ހަދަމުންދާ ވަގުތުގައި ޑްރޯން އިން ވީޑިއޯ ކުރުމަށް ފަހު ކުޅުންތެރިން ހަދާ ގޯސްތައް ސްރީނުން ދައްކައި ރަނގަޅު ކުރެވޭނެ ގޮތްތައް ވަގުތުން ބުނެދެ އެވެ.
މަޝްހޫރު ކޯޗު މޮރީނިއޯ، ރޯމާގައި މަސައްކަތްކުރާ ސްޓައިލް ތަފާތުވާނެ ކަމަށް އެ ޓީމާ ހަވާލުވުމަށް ފަހު މީޑިއާއާ ކުރިމަތިލި ފުރަތަމަ ފަހަރު ވެސް ވަނީ ބުނެފަ އެވެ. އެ ފަހަރު މޮރީނިއޯ ބުނީ އޭނާ މަސައްކަތް ކުރާ ވިސްނުމަކީ ނަތީޖާ ނެރެން ވަގުތު ބޭނުންވާ ކަމަށް ކުރިން ބެލެވުނު ނަމަވެސް ރޯމާގައި ވީ އެންމެ އަވަހަށް ކަންކަން ހާސިލްކުރަން ބޭނުންވާ ގޮތަށް ކަންތައްތައް ކުރާނެ ކަމަށެވެ.
މޮރީނިއޯ (ވ): ޓްރެެއިނިންގައި ބޭނުންކުރާ ސްކްރީނާއި ޑްރޯން.
ޑްރޯން ޓެކްނޮލޮޖީގެ ބޭނުން ހިފަން މޮރީނިއޯ ނިންމި އެންމެ ބޮޑު ސަބަބަކީ ކުޅުންތެރިންނަށް ޕްރެކްޓިހުގައި ކިޔައިދޭ އެއްޗެހި ޓްރެއިނިން ދަނޑުމަތީގައި ހުރެ، ރަނގަޅު ކުރަން ފުރުސަތު ދިނުމުގެ ގޮތުންނެވެ.
މީގެ ކުރިން މޮރީނިއޯ އެކި ޓީމުތަކަށް ކޯޗުކޮށްދިންއިރު، އޭނާ ވަނީ ޕްރެކްޓިހުގައި ބައެއް ކުޅުންތެރިންގެ ފަރާތުން އެކަށީގެންވާ ވަރަށް މަސައްކަތުގެ ރޭޓް ނުފެންނަ ކަމަށް ބުނެ، ނުސީދާ ގޮތަކަށް ބައެއް ކުޅުންތެރިންނަށް ފާޑުކިޔައިފަ އެވެ. ރޯމާގައި ޓެކްނޮލޮޖީގެ އެހީ ބޭނުން ކޮށްގެން މިކުރާ މަސައްކަތުން މޮރީނިއޯ ބޭނުންވާ ވަރަށް ޕްރެކްޓިހުގައި ވެސް ކުޅުންތެރިންގެ މަސައްކަތް ފެންނާނެ އެވެ.
މިހާތަނަށް މޮރީނިއޯ ވަނީ ރޯމާ ގޮވައިގެން ޕްރީ ސީޒަން ދެ މެޗަކަށް ނުކުމެފަ އެވެ. އެ ދެ މެޗަށް ނުކުމެ، ދަށް ޑިވިޝަނުގެ ދެ ޓީމު އަތުން ވެސް ރޯމާ ވަނީ މޮޅުވެފަ އެވެ.
ރޯމާގެ ކޯޗަކަށް މޮރީނިއޯ ހަމަޖެއްސީ ތިން އަހަރުގެ އެއްބަސްވުމެއްގެ ދަށުންނެވެ. މޮރީނިއޯ ވަނީ މިހާތަނަށް އެ ޓީމުގައި ހުރެ އެއް ޓްރާންސްފާ ފުރިހަމަކޮށްފަ އެވެ. ވުލްވްސް އަށް ކުޅެމުން އަންނަ ޕޯޗުގަލްގެ ގައުމީ ޓީމުގެ އެއް ވަނަ ގޯލްކީޕަރު ރުއީ ޕެޓްރީޝިއޯ ވަނީ 13 މިލިއަން ޑޮލަރަށް ރޯމާ އަށް ސޮއިކޮށްފަ އެވެ.
ކުރިން އިނގިރޭސި ޕްރިމިއާ ލީގުގެ ތިން ޓީމާއި ރެއާލް މެޑްރިޑަށް ކޯޗުކޮށްދިން މޮރީނިއޯ ވަނީ މީގެ ކުރިން އިޓަލީގެ އިންޓަ މިލާނަށް ވެސް ކޯޗުކޮށްދީފަ އެވެ. މޮރީނިއޯ ވަނީ 2008 އިން 2010 އަށް އިންޓަ އަށް ކޯޗުކޮށްދިންއިރު، އެ ޓީމާ އެކު އިޓާލިއަން ލީގު ދެ ފަހަރު، އިޓާލިއަން ކަޕާއި އިޓާލިއަން ސުޕަ ކަޕް އަދި ޗެމްޕިއަންސް ލީގު އެއް ފަހަރު ކާމިޔާބުކޮށްފަ އެވެ.
