ޓްރާންސްޕޯޓް މިނިސްޓްރީން މާލެ ސިޓީ ކައުންސިލަށް ގަރާޖު ސިޓީ ދޫކުރާ ގޮތަށް ބަދަލުކުރަން ނިންމުމާ ގުޅިގެން އެ ކައުންސިލުން ކަންބޮޑުވުން ފާޅުކޮށްފި އެވެ.
ޓްރާންސްޕޯޓް އޮތޯރިޓީން ގަރާޖު ހުއްދަ ދޫކުރުމުގެ ކަންކަން ސިޓީ ކައުންސިލާ މަތިކޮށް ކުރި އިއުލާނުގައި އޮތް ތާރީހަކީ އޮގަސްޓު އެއް ވަނަ ދުވަހެވެ. އެ އިއުލާނުގައި ވަނީ އެ ތާރީހުން ފެށިގެން އުޅަނދު ބާއްވާ ގަރާޖް ޗެކް ކުރުމާއި ގަރާޖާއި ގުޅޭ ކަންކަމުގައި ވެވޭ އެއްބަސްވުންތަކުގެ ސައްހަކަން ކަށަވަރު ކުރުމުގެ މަސައްކަތް ކުރާނީ ސިޓީ ކައުންސިލުން ކަމަށެވެ.
މިރޭ މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި ކައުންސިލަރުންގެ ކަންބޮޑުވުމަކަށްވީ އަންނަ މަހުގެ އެކަކުން ގަރާޖު ސިޓީގެ ހިދުމަތް އެ ކައުންސިލްގެ ދަށަށް ބަދަލު ކޮށްފައިވާކަން ޓްރާންސްޕޯޓުން އަންގާފައި ނުވާތީ އެވެ. އެގޮތުން ސިޓީއެއްވެސް ފޮނުވާފައި ނުވާ ކަމަށް ކައުންސިލުން ބުނެ އެވެ.
އަދި އެކަމާ ގުޅިގެން ޓްރާންސްޕޯޓް މިނިސްޓްރީއާ އެކު ބޭއްވި ބައްދަލުވުމެއްގައި މިނިސްޓްރީން އެ ހިދުމަތް ދިނުމަށް ސިޓީ ކައުންސިލްގައި އެދުނު ކަމަށާއި އެއީ ގަވައިދުގެ ތެރެއިން ކޮށްފައިވާ ކަމެއް ނޫން ކަމަށް ސިޓީ ކައުންސިލުން ބުނެ އެވެ.
"އަޅުގަނޑުމެން ދެންނެވިން އަޅުގަނޑުމެން އަތުގަ ނެތޭ އެކަށިގެންވާ އަދަދަށް މުވައްޒަފުންނެއްވެސް އަދި ވަސީލަތެއްވެސް. މިހާރު ވެސް ކައުންސިލްގެ މަސައްކަތް ކުރިއަށް ގެންދަނީ އެއް މުވައްޒަފެއް ތިން މަސައްކަތާ ހަވާލު ވެގެން،" ޑެޕިޔުޓީ މޭޔަރު އަހުމަދު ނަރީޝް ވިދާޅުވި އެވެ.
މީގެ އިތުރުން ސިޓީ ކައުންސިލުން ބުނީ ޓްރާންސްޕޯޓް މިނިސްޓްރީން ގަރާޖު ހުއްދަ ދޫކުރުމުގެ ކަންކަން މާލެ ސިޓީ ކައުންސިލަށް އަންނަ މަހުގެ އެކެއްގައި ހަވާލު ކުރަން ނިންމި ސިޓީ ރަސްމީކޮށް ލިިބިފައި ނުވާ ކަމަށެެވެ.
ގަރާޖު ސިޓީ ދޫކުރަން ފަށަން މިހާރު އިއުލާންކޮށްފައިވާ ތާރީހު ފަސްކޮށްދޭން ޓްރާންސްޕޯޓް އޮތޯރިޓީގައި މާލެ ސިޓީ މޭޔަރު ޑރ. މުހައްމަދު މުއިއްޒު ވަނީ އެދިފަ އެވެ.
މުއިއްޒު ވިދާޅުވެފައި ވަނީ ސަރުކާރުން ހަވާލުކުރާ ކޮންމެ މަސައްކަތެއް ކުރަން މާލެ ސިޓީ ކައުންސިލުން ތައްޔާރަށް އޮތް ކަމަށެވެ. އަދި މާލެ ސިޓީގެ ރައްޔިތުންނަށް ބޭނުންވާ ހިދުމަތްތައް ފޯރުކޮށްދޭން ބޭނުންވާ ކަންކަމުގެ ތެރެއިން ގަރާޖް ހުއްދަ ދޫކުރަން ވެސް ތައްޔާރު ކަމަށެވެ.
ނަމަވެސް ތާރީހު ފަސްކުރަން އެދެން ޖެހުނީ ރައްޔިތުންނަށް އެކަށީގެންވާ ފެންވަރެއްގައި މި ހިދުމަތް ފޯރުކޮށްދޭން ޓްރާންސްޕޯޓް އޮތޯރިޓީން ބޭނުންވާ ވަސީލަތްތައް ހަމަޖައްސަން ކުރި މަސައްކަތްތައް ނާކާމިޔާބު ވެގެން ކަމަށް އޭނާ ވަނީ ވިދާޅުވެފަ އެވެ. އަދި މިކަމުގައި ޓްރާންސްޕޯޓް އޮތޯރިޓީން އެކަށީގެންވާ ވަރުގެ އެއްބާރުލުމެއް ނުލިބޭ ކަން މުއިއްޒު ތަކުރާރުކޮށް ވަނީ ފާހަގަކުރައްވާފަ އެވެ.
