ބެންކޮކް، ތައިލޭންޑް (ޖުލައި 18) - ތައިލޭންޑުގެ ބޮޑު ވަޒީރު އިސްތިއުފާއަށް ގޮވާލާ، ކޮވިޑުގެ ފިޔަވަޅުތަކާ ހިލާފަށް މަގުތަކަށް ނުކުތް މީހުން ފޮނުވާލުމަށް ފުލުހުން ބާރުގެ ބޭނުންކޮށްފި އެވެ.
ތައިލޭންޑަށް މި ވަގުތު ދިމާވެފައި އޮތީ ކޮވިޑް ބަލިމަޑުކަން ފެށުނު ފަހުން އެންމެ ނުރައްކާތެރި ހާލަތެވެ. އެގޮތުން ކޭސްތައް އިތުރުވެ، ހޮސްޕިޓަލްތައް ވަނީ ފުރިފަ އެވެ.
ހާލަތު ގޯސްވެފައި ވަނީ ވެކްސިން ހޯދުމުގައި ސަރުކާރުން ލަސްވުމުން ކަމަށް ގިނަ ބަޔަކު ގަބޫލުކުރެ އެވެ. އެއާއެކު ވިޔަފާރިތަކަށް ހުރި ދަތިތަކާ ހެދި ގިނަ ބަޔަކު ތިބީ ހިތްހަމަނުޖެހިފަ އެވެ.
އެއް ފަހަރާ ފަސް މީހުންނަށް ވުރެ ގިނައިން އެއް ތަނެއްގައި ތިބުން މަނާކޮށްފައިވާ ނަމަވެސް، ގިނަ ބަޔަކު ވަނީ އެ އުސޫލާ ހިލާފަށް މަގުތަކަށް ނުކުމެ ސަރުކާރަށް ފާޑުކިޔާފަ އެވެ.
މުޒާހަރާގެ ބައިވެރިން ބުނީ ގޭގައި ތިބެގެން ވެސް ވާނީ މަރު ކަމަށާއި މަގުމައްޗަށް ނުކުމެ ހައްގު ހޯދަން އަޑުގަދަ ކުރަން ޖެހުނީ އެހެންވެ ކަމަށެވެ. އެ މީހުން ވަނީ ތިން ކަމަކަށް ޑިމާންޑުކޮށްފަ އެވެ.
އެއީ ބޮޑު ވަޒީރު ޕްރަޔުތް ޗަން އޮޗާގެ އިސްތިއުފާ އާއި ރަސްގެފާނުގެ އާއިލާއަށް ކުރާ ހޭދަ ކުޑަ ކުރުމާއި ކޮވިޑް ކޮންޓްރޯލް ކުރަން ސިފައިން ނެރުނު އަދި އެމްއާރްއެންއޭ ވެކްސިން ގެނައުމެވެ.
މިއަދު މީހުން މުޒާހަރާ ކުރިއިރު، މީގެ އެއް އަހަރު ކުރިން ވެސް ބެންކޮކްގެ ޑިމޮކްރެސީ މޮނިއުމެންޓް ކައިރިއަށް އެތައް ހާސް ބަޔަކު އެއްވެ ބޮޑު ވަޒީރުގެ އިސްތިއުފާއަށް ގޮވި އެވެ.
ކުރިން އަސްކަރީ ޖެނެރަލްކަން ކުރެއްވި ބޮޑު ވަޒީރު އޮޗާ މަގާމުގައި ހުންނެވީ 2014 ވަނަ އަހަރު ގެނައި ބަގާވާތަކަށް ފަހު، އަސްކަރީ ނުފޫޒުން 2019 ގައި ބޭއްވި އިންތިހާބެއް މެދުވެރިކޮށެވެ.
