ކާބުލް، އަފްގާނިސްތާން (ޖުލައި 18) - އަފްގާނިސްތާނުގެ ހަމަނުޖެހުން ހުއްޓުމަކަށް ގެންނަން ބޭނުން ވަނީ ސިޔާސީ ހައްލެއް ކަމަށް ތާލިބާނުންގެ ރޫހާނީ ލީޑަރު ހިބާތުﷲ އަހުންދްޒާދާ ބުނެފި އެވެ.
ހިބާތުﷲ އެހެން ބުނެފައި ވާއިރު، ތާލިބާނުން އަންނަނީ އަފްގާން ސިފައިންނާ ދެކޮޅަށް ކުރާ ހަނގުރާމަ ވަރުގަދަ ކުރަމުންނެވެ. އަދި ބޮޑު ސަރަހައްދުތަކެއް ކުޑަ ދުވަސްކޮޅެއް ތެރޭގައި ހިފާފައި ވެ އެވެ.
އަފްގާން ސަރުކާރުގެ މަންދޫބުންނާއި ތާލިބާނުންނާ ދެމެދު ނިމުނު ހަފްތާ ބަންދުގައި އަލުން ވަނީ ސުލްހައިގެ މަޝްވަރާތައް ފަށާފަ އެވެ. އެއާއެކު ސުލްހަ ގެނެވިދާނެ ކަމުގެ އުއްމީދު އަލުން އެބަ އޮތެވެ.
"އަސްކަރީ ގޮތުން ކުރިއެރުންތައް ލިބެމުން ދިޔަ ނަމަވެސް، އިސްލާމީ އަމީރުން ބޮޑަށް ބުރަވަނީ މި ގައުމަށް ސިޔާސީ ހައްލެއް ހޯދަން،" އީދާ ގުޅިގެން ފޮނުވި މެސެޖުގައި ހިބާތުﷲ ބުންޏެވެ.
"އިސްލާމީ ނިޒާމް ގާއިމްކޮށް، ސުލްހަ އާއި ހަމަޖެހުން ގެންނަން ލިބޭ ކޮންމެ ފުރުސަތެއްގެ ބޭނުން އިސްލާމީ އަމީރުން ހިފަމުން ދާނެ،" އޭނާ ބުންޏެވެ.
ގަތަރުގެ ވެރިރަށް ދޯހާގައި ތާލިބާނުންނާއި އަފްގާން ސަރުކާރާ ދެމެދު މަޝްވަރާތައް ބާއްވާތާ އެތައް ދުވަހެއް ވެއްޖެ އެވެ. ނަމަވެސް އެއްވެސް ކުރިއެރުމެއް ލިބިފައެއް ނުވެ އެވެ.
ތާލިބާނުންގެ ލީޑަރު ބުނީ އެ ގްރޫޕުން އިސްކަން ދޭނީ ހައްލެއް ހޯދަން ކަމަށެވެ. އެކަމަކު ވާދަވެރި ފަރާތްތަކުން ވަގުތު ބޭކާރު ކުރަމުންދާ ކަމަށް ތުހުމަތު ކުރި އެވެ.
"އަހަރުމެންގެ މެސެޖަކީ ބޭރު މީހުން ބައިވެރި ނުކޮށް، ގައުމުގެ އެތެރޭގެ މައްސަލަތައް އަމިއްލައަށް ހައްލުކޮށްގެން، މި ކާރިސާއިން މި ބިން ސަލާމަތް ކުރަމާ ހިނގާށޭ".
އެމެރިކާ އާއި ނޭޓޯގެ ފައުޖުތައް ސެޕްޓެމްބަރު 11 ގެ ކުރިން އަފްގާނިސްތާން ދޫކޮށް ދިޔުމުގެ މަސައްކަތް ކުރާތީ ތާލިބާނުން ވަނީ އަސްކަރީ ހަރަކާތްތައް ވަރުގަދަކޮށްފަ އެވެ.
އެގޮތުން އަފްގާނިސްތާނުގެ 400 ޑިސްޓްރިކްޓުގެ 50 ޕަސެންޓު ކޮންޓްރޯލް ކުރަނީ ތާލިބާނުންނެވެ. އޭގެ އިތުރުން މުހިއްމު ބޯޑަރު ސަރަހައްދުތައް ވެސް ހިފާފައި ވެ އެވެ.
