ފަރީދްއާބާދް، އިންޑިއާ (ޖުލައި 17) - އިންސާނީ ހައްގުތަކަށް ވަކާލާތު ކުރާ މީހުންނާއި އދ. ގެ ތަޖުރިބާކާރުންގެ ފާޑުކިޔުން އަމާޒުވެފައި ވަނިކޮށް، ނިއު ދިއްލީ ކައިރީގައިވާ އަވަށެއް ނެތިކޮށްލުމުގެ މަސައްކަތް އިންޑިއާ ސަރުކާރުން ފަށައިފި އެވެ.
ހޯރީއަކީ ދިއްލީގެ ބޯޑަރުގައި އެތައް ހާސް ބަޔަކު ދިރިއުޅޭ އަވަށެކެވެ. ކަމާ ބެހޭ ފަރާތްތަކުން ވަނީ އެ ތަނުގައި ހުރި ގެތައް ބިމާ ހަމަކުރުމުގެ މަސައްކަތް ފަށާފަ އެވެ. އެއީ ގެތައް އަޅާފައިވަނީ ރައްކާތެރިކޮށްފައިވާ ޖަންގަލީގެ ބިމެއްގައި ކަމަށް ސުޕްރީމް ކޯޓުން ނިންމުމުންނެވެ.
އެގޮތަށް ނިންމުމަށް ފަހު ސުޕްރީމް ކޯޓުން އެންގީ އެ ބިން ހުސް ކުރުމަށެވެ. ނަމަވެސް އެކްޓިވިސްޓުން ބުނާ ގޮތުގައި ހިޖުރަކޮށްގެން އުޅޭ މަސައްކަތްތެރިންނާއި ފަގީރު ލޭބާ މަަސައްކަތްތެރިން އެ ތަނުގައި ގެ އަޅައިގެން ދިރިއުޅޭތާ މިހާރު 30 އަހަރަށް ވުރެ ގިނަ ދުވަސް ވެއްޖެ އެވެ.
އޭގެ އިތުރުން ގެތައް އެޅިއިރު ވެސް ޖަންގަލި އޮތީ މައިން ކުރުމުގެ ސަބަބުން ހަލާކުވެފައި ކަމަށް އެކްޓިވިސްޓުން ބުނެ އެވެ. ކޯޓުން އަމުރުކޮށްފައި ވަނީ ޖުލައި 19 ގެ ކުރިން އެ ބިން ހުސް ކުރުމަށެވެ. ފުލުހުން ވަނީ ނޫސްވެރިންނަށް ނުވަދެވޭނެހެން މުޅި ސަރަހައްދުން ބަންދުކޮށްފަ އެވެ.
އެކްޓިވިސްޓުން ބުނެފައި ވަނީ އެ އަވަށުގައި 5000 ގެ ހުންނަ ކަމަށެވެ. އަދި އަވަށުގެ ކުދިންނަށް ހާއްސަ ސްކޫލުތަކާއި އަޅުކަން ކުރާ ތަންތަން ވެސް ގާއިމްކޮށްފައި ވެ އެވެ. ގެތައް ހަލާކު ކުރަން ފަށާފައި ވާއިރު، އޭގެ ކުރިން ވަނީ ފެނާއި ކަރަންޓުގެ ހިދުމަތް ކަނޑާލާފަ އެވެ.
އާއްމުންނާ ފުލުހުންނާ ދެމެދު ކުރިމަތިލުންތަކެއް ހިނގި ކަމަށް ރިޕޯޓުތައް ބުނި ނަމަވެސް ފުލުހުން އެކަން ދޮގުކުރެ އެވެ.
