ފްރެންކްފާޓް، ޖަރުމަނު (ޖުލައި 18) - ފެންބޮޑުވުމުގެ ސަބަބުން ހުޅަނގު ޔޫރަޕުން މަރުވި މީހުންގެ ޖުމްލަ އަދަދު 183 އަށް އަރައިފި އެވެ.
ފުލުހުން ބުނީ ޖަރުމަނުން އެކަނިވެސް 156 މީހުން މަރުވި ކަމަށެވެ. ހުޅަނގު ޖަރުމަނުގައި އެންމެ ބޮޑަށް އަސަރު ކުރި ރައިންލޭންޑް-ޕެލެޓިނޭޓް ސްޓޭޓުން 110 މީހުން މަރުވި އެވެ. އޭގެ އިތުރުން ޖަރުމަނުގެ ދެކުނުން ވެސް އެކަކު މަރުވި އެވެ.
ޖަރުމަނު ވިލާތާއި ހުޅަނގު ޔޫރަޕްގައި ފެންބޮޑުވެފައި ވަނީ ދުވަސްތަކެއް ވަންދެން އާދަޔާ ހިލާފަށް ބޯކޮށް ވާރޭވެހުމާ ގުޅިގެންނެވެ. ޖަރުމަނު ވިލާތުގައި ފެންބޮޑުވި ހިސާބުތަކަށް ޗާންސެލަރު އެންޖެލާ މާކަލް މިއަދު ޒިޔާރަތް ކުރަން ހަމަޖެހިފައިވެ އެވެ.
މިއީ ޖަރުމަނު ވިލާތުގެ ތާރީހުގައި ކުރިމަތިވި އެންމެ ބޮޑު ފެންބޮޑުވުމުގެ ހާދިސާ އެވެ. ޖަރުމަނު ކައިރީގައި އޮންނަ ބެލްޖިއަމުގައި ވެސް ފެންބޮޑުވެ 27 މީހުން މަރުވި އެވެ. ދެ ގައުމުގައި ވެސް ބިމާ ހަމަވެފައިވާ އިމާރާތްތަކުގެ ދަށުން މީހުން ހޯދުމުގެ މަސައްކަތް އަދިވެސް ދަނީ ކުރަމުންނެވެ.
ހުޅަނގު ޔޫރަޕުގެ ސްވިޓްޒަލޭންޑް، ލަގްޒެމްބޯގް އަދި ނެދަލޭންޑްސްއަށް ވެސް ބޯކޮށް ވާރޭ ވެހިފައި ވެ އެވެ. ޖަރުމަނުގެ ހުޅަނގަށް ވާރޭ ވެހުން މަދުވުމާއެކު ހޮނިހިރު ދުވަހު ވަނީ ދެކުނުގެ ހިސާބުތަކަށް ބޯކޮށް ވާރޭ ވެހެން ފަށާފަ އެވެ. އެހެންވެ އެ ހިސާބުތައް ވަނީ ހައި އެލާޓަށް ގެނެސްފަ އެވެ.
ދެކުނު ބެވޭރިއާ ޑިސްޓްރިކްޓުން މިހާރު ވެސް އެކަކު ވަނީ މަރުވެފަ އެވެ. އޮސްޓްރިއާގެ ސޮލްޒްބާގް އަދި ޓައިރޯލް ސަރަހައްދުތައް ހައި އެލާޓުގައި އޮތް އިރު، ތާރީހީ އަވަށެއް ކަމަށްވާ ހެލެއިން މިހާރު އޮތީ ފެނު އަޑީގަ އެވެ.
މާކަލް ވިދާޅުވީ ގެއްލުންވު ހުރިހާ ހިސާބަކަށް އެހީ ފޯރުކޮށްދޭނެ ކަމަށެވެ. ޖަރުމަނު ސަރުކާރުން ބުނީ ހާއްސަ ފަންޑެއް ގާއިމް ކުރުމުގެ މަސައްކަތް ކުރަމުންދާ ކަމަށެވެ. ބެލެވޭ ގޮތުގައި ލިބުނު ގެއްލުމުގެ އަގު އެތައް ބިލިއަން ޔޫރޯއަކަށް އަރާނެ އެވެ.
