މި އަހަރުގެ ފުރަތަމަ ހަތަރު މަސް ދުވަހުގެ ތެރޭ ކްރިމިނަލް ކޯޓުގައި ތާވަލުކުރި 2،354 އަޑުއެހުމެއް އެކި ސަބަބުތަކާ ހުރެ ކެންސަލް ކުރަން ޖެހުނުކަން އެ ކޯޓުން ހާމަކޮށްފި އެވެ.
މިކަން ކޯޓުން އާންމުކުރީ "އަދަދު"ން ކުރިމިނަލް ކޯޓަށް އާރްޓީއައިއެއްގެ ދަށުން އެ މައުލޫމާތު ސާފުކުރަން އެދުމުންނެވެ.
މައުލޫމާތު ހޯދުމުގެ ހައްގުގެ ދަށުން ސާފުކުރަން އެދުނީ، ކްރިމިނަލް ކޯޓުގައި މި އަހަރުގެ ފުރަތަމަ ހަތަރު މަސް ދުވަހު ތާވަލުކުރި އަޑުއެހުމުގެ އަދަދާއި ކެންސަލްކުރި އަޑުއެހުންތަކުގެ ތަފްސީލެވެ.
ކްރިމިނަލް ކޯޓުން ފޮނުވި ޖަވާބުގައި ހަތަރު މަސް ތެރޭ ތާވަލުކުރި ޖުމްލަ އަޑުއެހުންތަކުގެ އަދަދު ބަޔާނެއް ކުރެ އެވެ. އޭގެ ބަދަލުގައި ބުނީ، އެ ކޯޓުގެ ވެބްސައިޓްގައި ތާވަލުކުރި އަޑުއެހުންތަކުގެ ތަފްސީލު ފެންނަން ހުންނާނެ ކަމަށެވެ.
އެ އަޑުއެހުންތަކުގެ ތެރެއިން ކެންސަލްކުރި ނޫނީ ކުރަން ޖެހުނު އަޑުއެހުންތަކުގެ ތަފްސީލު ކޯޓުން ދިނެވެ.
އެގޮތުން ކޯޓުން ފޮނުވާފައިވާ މައުލޫމާތުތަކަށް ބަލާއިރު އެންމެ ގިނަ އަޑުއެހުންތައް ކެންސަލްވެފައިވަނީ ދައުވާ ލިބޭ ފަރާތްތަކާ ގުޅުންހުރި ސަބަބުތަކާހުރެ އެވެ. އެއީ 606 އަޑުއެހެމެކެވެ.
އިދާރީ ސަބަބުތަކާހުރެ 516 އަޑުއެހުމެއް ހަތަރު މަސް ތެރޭ ކެންސަލްކޮށްފައިވެ އެވެ. އަދި، ކޮވިޑްއާ ގުޅިގެން 189 އަޑުއެހުމެއް ކެންސަލްކުރަން ޖެހުނެވެ.
އޭގެއިތުރުން ޕްރޮސިކިއުޓާ ޖެނަރަލްގެ އޮފީހުން، ކަރެކްޝަނަލް ސާވިސް އަދި ފުލުހުންއާ ގުޅުންހުރި ސަބުބަތާހުރެ 298 އަޑުއެހުމެއް ކަންސަލްކުރަން ޖެހިފައިވެ އެވެ.
ހެކިންނާ ގުޅުންހުރި ސަބަބުތަކާ ހުރެ 121 އަޑުއެހުމެއް ކަންސަލްކުރަމް ޖެހުނުއިރު ވަކީލުންނާ ގުޅުންހުރި ސަބަބުތަކާ ހުރެ 332 އަޑުއެހުމެއް ކެންސަލްކުރި އެވެ.
