އިއްޒުއްދީން ސްކޫލުގެ ޓީޗަރުންތަކެއް މާލޭގެ އެހެން ސްކޫލްތަކަށް ބަދަލުކުރުމުގައި އެ މިނިސްޓްރީއަށް ހުށަހަޅާފައިވާ ޖިންސީ ފުރައްސާރައިގެ މައްސަލައަކާ ގުޅުމެއް ނެތް ކަމަށް އެޑިއުކޭޝަން މިނިސްޓްރީން މިއަދު ބުނެފި އެވެ.
އެ މިނިސްޓްރީން މިހެން ބުނީ އިއްޒުއްދީން ސްކޫލްގެ ޕްރިންސިޕަލް އިސްމާއިލް ނަސީރު ޓީޗަރުންތަކަކަށް ޖިންސީ ފުރައްސާރަކުރި ކަން ސާބިތުވުމުން ވެސް ފިޔަވަޅު އެޅީ ޓީޗަރުންނަށް ކަމުގެ ތުހުމަތު ޓީޗާސް އެސޯސިއޭޝަނާއި އެ ޓީޗަރުން ތަމްސީލްކުރާ ޕަބްލިކް އިންޓްރެސްޓް ލޯ ސެންޓަރުން ކޮށްފައި ވަނިކޮށެވެ.
މާލޭގައި އެންމެ ފަހުން ހުޅުވި ސްކޫލްގެ ޕްރިންސިޕަލާ ދެކޮޅަށް ބޮޑު ތުހުމަތުތަކަކާ އެކު ތެދުވީ އެތަނުގެ ހަ ޓީޗަރެކެވެ. ސިވިލް ސާވިސް ކޮމިޝަންގެ އިތުރުން، އެޑިއުކޭޝަން މިނިސްޓްރީގައި އޮންނަ ޖިންސީ ފުރައްސާރަކުރުމާއި ގޯނާ ހުއްޓުވުމުގެ ކޮމިޓީއަށް ވެސް މި މައްސަލަ ހުށަހެޅި އެވެ. ކޮމިޓީން ވަނީ އެ މައްސަލަ ބަލައި ނިންމައިފަ އެވެ.
ޕްރިންސިޕަލާ ދެކޮޅަށް ނެރުނު ދެ ބަޔާނުގައި ބުނީ ޕްރިންސިޕަލަށް ޕްރޮމޯޝަންދީ، ޓީޗަރަން އެހެން ސްކޫލްތަކަށް ބަދަލުކުރުމަކީ ބޭއިންސާފެއް ކަމަށެވެ. މިނިސްޓްރީން ޓީޗަރުންނާ މެދު ފިޔަވަޅު އެޅީ މަޝްވަރާ ވެސް ނުކޮށް ކަމަށް ބުނެފައިވެ އެވެ.
އެޑިއުކޭޝަނުން ނެރުނު ބަޔާނުގައި ބުނީ އިއްޒުއްދީންގެ ހަތަރު ޓީޗަރަކު މާލޭގެ އެހެން ސްކޫލްތަކަށް ބަދަލުކުރަން ނިންމީ މި އަހަރުގެ ކުރީކޮޅު ދިމާވި މައްސަލައިގައި އުފެދުނު ނުތަނަވަސްކަން ހައްލުކުރަން ކަަމަށެވެ.
އެކަން ކުރަނީ، ހަތަރު ލީޑިން ޓީޗަރުން އެއްފަހަރާ އިސްތިއުފާ ދިނުމުން ސްކޫލްގައި އުފެދުނު ނުތަނަވަސްކަން ހައްލުކުރުމަށް ޕްރޮފެޝަނަލް މިންގަނޑުތަކާ އެއްގޮތަށް ހިންގުނު ލީޑަޝިޕް އެންޑް މެނޭޖްމަންޓް ރިވިއުއަށް ރިއާޔަތްކޮށް ކަަމަށް އެޑިއުކޭޝަން މިނިސްޓްރީން ބުންޏެވެ.
"ދެންނެވުނު ރިވިއުއިން ސްކޫލް ހިންގުމާއި ދޭދޭ ގުޅުންތަކުގައި ދަރިވަރުންގެ ކިޔެވުމަށް އަސަރުކުރާނެ މައްސަލަތަކެއް ހުރި ކަމަށް ފާހަގަވެފައިވާތީ އެ މައްސަލަތައް ހައްލުކުރުމަށް ކުރާނެ ކަންކަން ނިންމުމަށް އެކުލަވާލެވުނު ކޮމިޓީން، ދިމާވެފައިވާ މައްސަލަތައް ހައްލުކުރުމަށް ސްކޫލްގެ ބައެއް މަގާމްތައް އާ ދިރާސީ އަހަރު ފެށޭއިރަށް ބަދަލުކުރުމަށް ލަފާ ދެއްވާފައިވެ އެވެ،" ބަޔާނުގައިވެ އެވެ.
އެޑިއުކޭޝަނުން ބުނި ގޮތުގައި އެތަނަށް ހުށަހަޅާ ޖިންސީ ފުރައްސާރައިގެ މައްސަލަތައް ވަރަށް ސީރިއަސްކަމާ އެކު ބަލަން އިސްކަންދެ އެވެ. ޓީޗަރުން ބަދަލުކުރަން ނިންމުމުގައި، އެފަދަ މައްސަލައަކާ ގުޅުމެއް ނެތް ކަމަށް ވިދާޅުވި އެވެ.
ޓީޗަރުން އެއްފަހަރާ އިސްތިއުފާ ދެއްވި ސަބަބާއި އޭގެ ސަބަބުން އުފެދުނު ނުތަނަވަސްކަމަކީ ކޮބައިކަމެއް އެޑިއުކޭޝަންގެ ބަޔާނުގައި ސާފުކޮށްދީފައެއް ނުވެ އެވެ.
މިނިސްޓްރީގެ ބަޔާނުގައި ބުނީ މި މައްސަލައިގައި ޓީޗާސް އެސޯސިއޭޝަނާއި ޕަބްލިކް އިންޓްރެސްޓް ލޯ ސެންޓަރުން ހަގީގަތާ ހިލާފު ބަޔާންތަކެއް ކަމަށެވެ. އެކަން މިނިސްޓްރީން ވަނީ ކުށްވެރިކޮށްފަ އެވެ.
ޓީޗަރުންގެ ތުހުމަތުތަކާ ގުޅިގެން "އަދަދު"ން އިސްމާއިލް ނަސީރަށް ގުޅުމުން އޭނާ ވެސް ވަނީ ތުހުމަތުތައް ދޮގުކުރައްވައިފަ އެވެ. ވިދާޅުވީ އެއީ އެ ސްކޫލުން އިސްތިއުފާ ދެއްވި ލީޑިން ޓީޗަރުންތަކެއް އޭނާއާ ދެކޮޅަށް އުފައްދައިގެން އުޅޭ އަގު ވައްޓާލުމުގެ މައްސަލައެއް ކަމަށެވެ. އޭނާ އިއްޒުއްދީން ސްކޫލުން ބަދަލުވާން އެޑިއުކޭޝަނަށް ހުށަހެޅީ، ތުހުމަތުތަކާ އެކު ބިރުދައްކުމާއި ފާރަލުމުގެ އަމަލުތަކެއް ހިންގަމުންދާތީ ކަމަށް ވިދާޅުވި އެވެ.
