އިދިކޮޅު ޕީޕީއެމްއަށް ނިސްބަތްވާ ވިލިމާލެ ދާއިރާގެ ކައުންސިލަރު ނަހުލާ އަލީގެ އެންގުމަކަށް މާލޭ ސިޓީ ކައުންސިލް މެމްބަރުންތަކަކާ ގްރޫޕަކުން މަގުމަތިން ދިމާކޮށް ބިރުދެއްކި މައްސަލައެއް ބެލުމަށް އެ ކައުންސިލްގެ ފަރާތުން ލޯކަލް ގަވަމަންޓް އޮތޯރިޓީ (އެލްޖީއޭ)އަށް ހުށަހަޅައިފި އެވެ.
އެ މައްސަލަ މާލޭ ސިޓީ ކައުންސިލަށް ހުށަހަޅާފައި ވަނީ އެމްޑީޕީގެ ކައުންސިލް މެމްބަރު ސައިފް މުހައްމަދު ފާތިހެވެ.
ސައިފް ހުށަހެޅުއްވި މައްސަލައިގައި ބުނެފައި ވަނީ ވިލިމާލެއަށް ކައުންސިލަރުންތަކެއް ދިޔުމުން ނަހުލާގެ އެންގުމަށް ކަމަށް ބުނެ މަގުމަތިން އެމީހުންނާ ބަޔަކު ދިމާކޮށް މަސްއޫލިއްޔަތު އަދާ ކުރުމަށް ހުރަސްއަޅާފައިވާ ކަމަށެވެ.
އެކަމާ ގުޅޭގޮތުން ބަހެއް ހޯދަން ގުޅުމުން ފޯނު ނިއްވާލާފައި އޮންނާތީ ނަހުލާގެ ބަހެއް ލިބޭގޮތެއް ނުވި އެވެ.
ވިލިމާލެއަށް ދިޔަ ކައުންސިލަރުންނަކީ ޕީޕީއެމްގެ މެމްބަރުން އަބްދުﷲ ނާސިރާއި އައިމިނަތު ޔުމްނާ އާއި އިބްރާހިމް އަބޫބަކުރާއި އެމްޑީޕީގެ މެމްބަރު މުހައްމަދު އަރީޝެވެ.
ކައުންސިލަށް އެ މައްސަލަ ހުށަހެޅުމުން މެމްބަރު މަރިޔަމް ރީހާން ނިޒާމް ހުށަހެޅުއްވީ އެ މައްސަލަ އެލްޖީއޭ އަށް ހުށަހެޅުމަށެވެ. އެކަމަށް ތާއީދު ކުރެއްވީ ޕީޕީއެމްއަށް ނިސްބަތްވާ ޑެޕިއުޓީ މޭޔަރު އަހުމަދު ނަރީޝެވެ.
ނަހުލާގެ މައްސަލަ އެލްޖީއޭއަސް ފޮނުވުމަށް ބައްދަލުވުމުގައި ބައިވެރިވި 17 މެމްބަރުންގެ ތެރެއިން 16 މީހަކު ތާއީދު ކުރި އެވެ.
