ޑޫޝަންބޭ، ތަޖިކިސްތާން (ޖުލައި 15) - އަފްގާނިސްތާން ސިފައިންނާއި ތާލިބާނުންނާ ދެމެދު ކުރާ ހަނގުރާމައިން ސަލާމަތްވުމަށް 350 އަށް ވުރެ އަފްގާން ރައްޔިތުން ބޯޑަރު ހުރަސްކޮށް ތަޖިކިސްތާނަށް ހިނގައްޖެ އެވެ.
ބޯޑަރު ގާޑުން ބުނީ އޭގެ ތެރޭގައި 177 ކުޑަކުދިން ވެސް ހިމެނޭ ކަމަށެވެ. ބޯޑަރު ހުރަސްކުރަން އުޅުމުގެ ތެރޭގައި އުމުރުން އެއް އަހަރު ނުވާ ތުއްތު ދެ ކުދިން މަރުވެފައި ވެ އެވެ.
އެމެރިކާ އާއި ނޭޓޯގެ ސިފައިން އަފްގާނުން ފައިބަމުންދާ މި ދަނޑިވަޅުގައި ތާލިބާނުންގެ ހަމަލާތައް ވަރުގަދަކޮށްފައި ވާއިރު، ދާދި ފަހުން އަފްގާން ސިފައިންގެ 1،000 މީހަކު ވެސް ވަނީ ހަމަލާތަކުން ސަލާމަތް ވާން ތަޖިކިސްތާނަށް އެތެރެވެފަ އެވެ.
ކުޑަ ދުވަސްކޮޅެއްގެ ތެރޭގައި ތާލިބާނުން ވަނީ އަފްގާނިސްތާނުގެ ބޮޑު ސަރަހައްދުތަކެއް ހިފާފަ އެވެ. އޭގެ ތެރޭގައި ތަޖިކިސްތާނަށް ދެވެން އޮންނަ މައި ބޯޑަރު ކްރޮސިންގް ވެސް ހިމެނެ އެވެ.
ބޯޑަރު ގާޑުން ބުނީ ތަޖިކިސްތާނަށް އެތެރެވި ރެފިއުޖީންގެ ތެރޭގައި 64 ފިރިހެން ކުދިންނާއި 113 އަންހެން ކުދިން ހިމެނޭ ކަމަށެވެ. ބަދަކްޝަން ޕްރޮވިންސް ދޫކޮށް އެ މީހުން ތަޖިކިސްތާނަށް ދިޔައީ ގެރި، ބަކަރި ވެސް ގޮވައިގެންނެވެ.
ތަޖިކިސްތާނުން އަންނަނީ އަފްގާން ރެފިއުޖީންނަށް ހާއްސަ ކޭމްޕުތަކެއް ޖެހުމަށް ވިސްނަމުންނެވެ.
