ދަ ހޭގް، ނެދަލޭންޑްސް (ޖުލައި 14) - ހަލުވިކަމާއެކު ފެތުރޭ ކޮވިޑް ވައިރަހުގެ ޑެލްޓާ ވޭރިއެންޓާ ދެކޮޅަށް ރައްކާތެރިކަން ބޭނުން ނަމަ ހުއްދަ ދޫކޮށްފައިވާ ވެކްސިނެއްގެ ދެ ޑޯޒް ފުރިހަމަ ކުރުން މަޖުބޫރު ކަމަށް ޔޫރަޕިއަން މެޑިސިން އެޖެންސީން ބުނެފި އެވެ.
އިންޑިއާއިން އެންމެ ފުރަތަމަ ފެނުނު ޑެލްޓާ ވޭރިއެންޓު ގިނަ ގައުމުތަކަށް ފެތުރި، ހޫނު މޫސުން ނިމުމުގެ ކުރިން ޔޫރަޕުން ފެންނަ 90 ޕަސެންޓު ކޭސްއިން ފާހަގަވާނެ ކަމަށް ބެލެވެ އެވެ.
"މިހާރު ހުރި ދިރާސާތަކުން ދައްކާ ގޮތުގައި ޑެލްޓާ ވޭރިއެންޓާ ދެކޮޅަށް އެކަށީގެންވާ މިންވަރެއްގެ ރައްކާތެރިކަން ހޯދޭނީ ވެކްސިންގެ ޑޯސް ފުރިހަމަކޮށްގެން،" ޔޫރަޕިއަން މެޑިސިން އެޖެންސީން ބުންޏެވެ.
މިއީ "ކަންބޮޑުވާން ޖެހޭ ވޭރިއެންޓެއް" ގެ ގޮތުގައި ފާހަގަކޮށް، އެ އެޖެންސީން ބުނީ ބަލިމަޑުކަން ނިމުމަކަށް ގެންނަން ކުރާ މަސައްކަތަށް މި ވޭރިއެންޓުގެ ސަބަބުން ބޮޑު ނުރައްކަލެއް އެބަ އޮތް ކަމަށެވެ.
"އޯގަސްޓް މަސް ނިމެންވާއިރަށް، ޔޫރަޕުން ފެންނަ 90 ޕަސެންޓު ކޭސް ގުޅިފައި ވާނީ ޑެލްޓާ ވޭރިއެންޓާ،" ޔޫރަޕިއަން ސެންޓާ ފޯ ޑިޒީޒް ޕްރިވެންޝަން އެންޑް ކޮންޓްރޯލުން ވެސް ބުންޏެވެ.
އެ ސެންޓަރުން ވަނީ ގައުމުތަކުން ވެކްސިން ޕްރޮގްރާމަށް ދޭ ސަމާލުކަން އިތުރުކޮށް ވީ އެންމެ އަވަހަކަށް ދެ ޑޯޒް ފުރިހަމަ ކުރަން ބާރު އަޅަން ގޮވާލާފަ އެވެ.
