ތިރުވަނަންތަޕޫރަމް، އިންޑިއާ (ޖުލައި 14) - އިންޑިއާއިން އެންމެ ފުރަތަމަ ކޮވިޑް ޖެހުނު މީހާ ދެ ވަނަ ފަހަރަށް މި ވައިރަހަށް ޕޮޒިޓިވްވެފައިވާ ކަމަށް ސިއްހީ އޮފިޝަލުން ބުނެފި އެވެ.
އިންޑިއާގެ އެންމެ ފުރަތަމަ ކޮވިޑް ޕޭޝެންޓަކީ ޗައިނާގެ ވޫހާން ސިޓީގައި ކިޔަވަން ހުރި ކެރަލާއަށް ނިސްބަތްވާ އުމުރުން 21 އަހަރުގެ ޒުވާން އަންހެނެކެވެ.
އިންޑިއާގެ އޮފިޝަލަކު އޭއެފްޕީއަށް ބުނީ އަންހެން މީހާ ދެ ވަނަ ފަހަރަށް ޕޮޒިޓިވްވެފައި ވާއިރު، އޭނާގެ ހަށިގަނޑުން އެއްވެސް އަލާމާތެއް ނުފެންނަ ކަމަށެވެ. އޭނާ ހުރީ ގޭގައި އައިސޮލޭޓުކޮށްފަ އެވެ.
އަންހެން މީހާ ޕޮޒިޓިވްކަން އެނގުނީ ނިއު ދިއްލީއަށް ދިޔުމުގެ ކުރިން ހެދި ޕީސީއާރް ޓެސްޓެއްގެ ނަތީޖާއިންނެވެ.
އޭނާއަކީ ވޫހާން ސިޓީގައި މުޅިން އާ ކޮރޯނާވައިރަހެއް ފެތުރެން ފެށުމުން ޖެނުއަރީ 2020 ގައި ޗައިނާ ދޫކޮށް ދިޔަ އިންޑިއާގެ މެޑިކަލް ދަރިވަރުންގެ ތެރެއިން އެކަކެވެ.
އާދައިގެ އަލާމާތްތައް ފެނި ކުރި ޓެސްޓާއެކު އޭނާ އިންޑިއާގެ އެންމެ ފުރަތަމަ ކޮވިޑް ޕޭޝެންޓަށް ވީ ޖެނުއަރީ 30، 2020 ވަނަ އަހަރު އެވެ.
އޭގެ ފަހުން އިންޑިއާގައި މިހާތަނަށް 31 މިލިއަން ކޭސް ފެނިފައި ވާއިރު، 410،000 މީހުން ވަނީ މަރުވެފަ އެވެ. މިދިޔަ އޭޕްރިލް އަދި މޭ މަހު ވަރަށް ބޮޑަށް ހާލަތު ގޯސްވުމަށް ފަހު، ތިން ވަނަ ރާޅެއް ބޯމަތިވެފައިވާ ކަމުގެ އިންޒާރު ތަޖުރިބާކާރުން ދެ އެވެ.
