ޖިންސީ ފުރައްސާރައިގެ ދައުވާތަކެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމުގެ މައްސަލަ ބަލައިނުގަތުމަށް ހައިކޯޓުގެ ރަޖިސްޓްރާ ނިންމި ނިންމުން ރިވިއު ކުރަން ހުށަހަޅައިފި އެވެ.
އަލީ ވަހީދުގެ މައްސަލާގައި އެންމެ ފުރަތަމަ ވެސް ކްރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އެ އަމުރު ބާތިލުކޮށް، އަލީ ވަހީދަށް ރާއްޖޭން ބޭރަށް ދެވޭ ގޮތް ހެދީ އޭނާގެ މައްޗަށް ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ޖާމިނުވެގެންނެވެ. ޖާމިނު އެއްބަސްވުން ހެދީ ހަތަރު މަހެވެ. އެ މުއްދަތު މިދިޔަ މަހުގެ ނުވަ ވަނަ ދުވަހަށް ވަނީ ހަމަވެފަ އެވެ.
އޭގެފަހުން ވެސް އަލީ ވަހީދު ރާއްޖެ ވަޑައިގެންފައިނުވާތީ ފުލުހުން މެދުވެރިކޮށް އަލީ ވަހީދުގެ ޕާސްޕޯޓް އަލުން ހިފެހެއްޓުމަށް ޕްރޮސިކިއުޓާ ޖެނަރަލްގެ އޮފީހުން އެދުނެވެ. ނަމަވެސް، އެ އަމުރު ނެރެދޭނެ ތަނެއް ނެތް ކަމަށް ކުރިމިނަލް ކޯޓުން ނިންމުމުން މައްސަލަ ހައިކޯޓުގައި އިސްތިއުނާފުކުރީ އެވެ.
ޕްރޮސިކިއުޓާ ޖެނަރަލްގެ އޮފީހުން ހުށަހެޅި އެ މައްސަލަ ބަލައިނުގަތުމަށް ހައިކޯޓުގެ ރަޖިސްޓްރާ މިދިޔަ އާދިއްތަ ދުވަހު ނިންމި އެވެ.
އެގޮތަށް އެ ކޯޓުން ނިންމި ސަބަބެއް ކަމަށް ބުނެފައިވަނީ ޖިނާއީ މައްސަލައެއްގައި މީހެއްގެ މައްޗަށް ދައުވާ ކުރުމަށްފަހު، އެ މައްސަލައެއްގެ ތެރެއިން ނިންމާ އެއްވެސް ނިންމުމެއްގެ އިސްތިއުނާފު، ދައުވާ ލިބޭ ފަރާތުގެ ޣައިރު ހާޒިރުގައި ކުރިއަށް ނުގެންދެވޭނެތީ އެވެ. އެކަން ސުޕްރީމް ކޯޓުން ވެސް ކަނޑައަޅާފަ އެވެ.
ޕްރޮސިކިއުޓާ ޖެނަރަލް އޮފީހުގެ މީޑިއާ އޮފިޝަލް އަހުމަދު ޝަފީއު މިރޭ ވިދާޅުވި ގޮތުގައި ހައިކޯޓުގެ ރަޖިސްޓްރާގެ އެ ނިންމުން ރިވިއުކުރުމަށް މިއަދު އެ އޮފީހުން ހުށަހަޅާފައިވާ ކަމަށެވެ.
މީގެކުރިން ވެސް އަލީ ވަހީދުގެ ޕާސްޕޯޓް ހިފެހެއްޓުމަށް ހައިކޯޓަށް ޕްރޮސިކިއުޓާ ޖެނަރަލްގެ ފަރާތުން ހުށަހެޅި އެވެ. އެ މައްސަލަ ބަލައިގަތުމަށްފަހު ބޭރުކޮށްލީ، އަލީ ވަހީދު އުޅޭނޫޅޭ ތަނެއް ނޭނގިގެން، އޭނާގެ ޣައިރު ހާޒިރުގައި މައްސަލަ ކުރިއަށް ނުގެންދެވޭނެތީ އެވެ.
ހަމަ އެ މައްސަލަ ޕްރޮސިކިއުޓާ ޖެނަރަލްގެ ފަރާތުން ސުޕްރީމް ކޯޓަށް ހުށަހެޅުމުން، އެ ކޯޓުން ވެސް ނިންމާފައިވަނީ ހަމަ އެގޮތަށެވެ.
އަލީ ވަހީދުގެ ޝަރީއަތް ކުރިމިނަލް ކޯޓުގައި މިހާރު ކުރިއަށް ގެންދަނީ އޮންލައިންކޮށް އިނގިރޭސިވިލާތުގައި ހުރެގެން އަލީ ވަހީދަށް ބައިވެރިވެވޭ ގޮތަށެވެ.
ގާޒީ ހަސަން ސައީދު، އިސް ގާޒީ އަހުމަދު ޝަކީލްގެ ލަފާގެ މަތިން ނިންމެވި ނިންމެވުމާ ޕްރޮސިކިއުޓާ ޖެނަރަލްގެ ފަރާތުން އިއުތިރާޒުކުރި އެވެ. ދައުލަތުން ގަބޫލުކުރާ ގޮތުގައި ރާއްޖޭގެ ގާނޫނީ އިހުތިސޯސް ނުހިނގާ ތަނެއްގައި ހުރެގެން ޝަރީއަތުގައި ބައިވެރިވެވިގެން ނުވާނެ އެވެ. އެގޮތަށް ކުރިއަށް ގެންދާ ޝަރީއަތްތައް ގާނޫނާ ހިލާފުވާނެ ކަމަށެވެ.
އެހެންވެ، އެ މައްސަލަ ޕްރޮސިކިއުޓާ ޖެނަރަލްގެ އޮފީހުން ހައިކޯޓުގައި އިސްތިއުނާފުކުރި އެވެ. ނަމަވެސް، އެ ކޯޓުން ނިންމީ އެ މައްސަލަ އިސްތިއުނާފީ ދައުވާއެއްގެ ގޮތުގައި ކުރިޔަށް ގެންދާނެ ޝަރުއީ އަދި ގާނޫނީ ހަމައެއް މިހިނދުގައި ނެތް ކަމަށެވެ. ހައިކޯޓުގެ އެ ނިންމުން މިހާރު ޕްރޮސިކިއުޓާ ޖެނަރަލްގެ ފަރާތުން ވަނީ ސުޕްރީމް ކޯޓުގައި އިސްތިއުނާފުކުރުމަށް ހުށަހަޅާފަ އެވެ.
