ފެމެލީ ކޯޓުގެ ގާޒީ އަބްދުﷲ މުހައްމަދުގެ މައްޗަށް ސުލޫކީ މައްސަލައެއް ސާބިތުނުވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
އަބްދުﷲ ގާޒީއާ ގުޅޭ ގޮތުން ޖޭއެސްސީން ބަލާ ނިންމާފައިވަނީ މިދިޔަ އަހަރުގެ ފެބުރުއަރީ މަހު ހުށަހެޅި މައްސަލައެކެވެ. އެ މައްސަލަ ތަހުގީގު ކުރުމަށްފަހު ސާބިތުނުވާ ކަމަށް ވަނީ ނިންމާފަ އެވެ.
އެއީ ކޮން ކަމަކާ ގުޅިގެން އޭނާގެ މައްޗަށް ހުށަހެޅުނު ސުލޫކީ މައްސަލައެއް ކަމެއް އެ ކޮމިޝަނުން ނުބުނެ އެވެ.
އަބްދުﷲ ގާޒީއަކީ މީގެކުރިން ކުރިމިނަލް ކޯޓުގެ އިސްގާޒީގެ މަގާމުގައި ހުންނެވި ބޭފުޅެކެވެ. އޭނާ ފެމެލީ ކޯޓަށް ބަދަލުކުރީ މިދިޔަ ސަރުކާރުގަ އެވެ.
ކުރިމިނަލް ކޯޓުގައި ހުންނެވިއިރު އަބްދުﷲ މުހައްމަދު ފާހަގަވީ ނުފޫޒުގަދަ ގާޒީއެއްގެ ގޮތުގަ އެވެ. ކުރީގެ ރައީސް މުހައްމަދު ނަޝީދުގެ ވެރިކަން ވެއްޓުނީ ވެސް އަބްދުﷲ ގާޒީ ހައްޔަރުކޮށް ބަންދުކުރުމާ ގުޅިގެން ފެށި މުޒާހަރާތައް ހޫނުވެގެންނެވެ.
