ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދޭން ސަރުކާރުން ގާއިމުކޮށްފައިވާ އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އޮފީސް ފަޅާލިއަސް އެއްވެސް ފައިސާއެއް އަދި ލިޔެކިޔުމެއް ވެސް ނުގެއްލޭ ކަމަށް އެ ބޭންކުން މިއަދު ބުނެފި އެވެ.
އެސްޑީއެފްސީ އޮފީސް ފަޅާލި މައްސަލަ ފުލުހުންނަށް ރިޕޯޓް ކުރީ މިއަދު ހެނދުނެވެ. މި މައްސަލައާ ގުޅިގެން މީޑިއާތަކާ ހިއްސާކުރި މެސެޖެއްގައި ފުލުހުން ބުނީ އެ މައްސަލަ ތަހުގީގު ކުރަމުން އަންނަ ކަމަށެވެ.
މިހާތަނަށް މި މައްސަލައިގައި އެއްވެސް މީހަކު ހައްޔަރެއް ނުކުރެ އެވެ.
އެސްޑީއެފްސީގެ ސީނިއާ މާކެޓިން އޮފިސާ އިސްމާއިލް މާއިޒް "އަދަދު"އަށް ވިދާޅުވީ، އެ އޮފީހަަށް ވައްކަން ކުރަން ވަނީ އިއްޔެ އޮފީސް ބަންދުކުރި ފަހުން ކަމަށެވެ. އަދި މިހާތަނަށް ބެލިބެލުމުން އެއްވެސް ކަސްޓަމަރެއްގެ ޒާތީ މައުލޫމާތު ހިމެނޭ މުހިންމު ލިޔެކިޔުމެއް ލިބުނު ކަން ފާހަގަ ނުވާ ކަމަށެވެ.
އެސްޑީއެފްސީ އޮފީސް ހުންނަނީ ސުޕްރީމް ކޯޓު ސަރަހައްދުގަ އެވެ. އަދި އެ އޮފީސް ހުންނަ އިމާރާތުގައި އިކޮނޮމިކް މިނިސްޓްރީގެ ދަށުން ހިންގާ ބިޒްނަސް ސެންޓާ ކޯޕަރޭޝަން (ބީސީސީ) ގެ "ސީޑްސް ބައި ބީސީސީ" ކޯ ވާކް ސްޕޭސް އަދި އޮތެންޓިކް މޯލްޑިވްސްގެ ފިހާރައެއް ވެސް ހުރެ އެވެ.
