ކާބުލް، އަފްގާނިސްތާން (ޖުލައި 14) - އަފްގާނިސްތާނުގެ ސިޓީތަކުގައި ހަނގުރާމަ ކުރަން ބޭނުން ނުވާ ކަމަށާއި އޭގެ ބަދަލުގައި ސިފައިން އަމާން ދިނުމަށް އެދޭ ކަމަށް ތާލިބާނުން ބުނެފި އެވެ.
ބޭރުގެ ސިފައިން އަފްގާނިސްތާން ދޫކޮށް ދާން ފަށާފައިވާ މި ދަނޑިވަޅުގައި ތާލިބާނުން ވަނީ ހަނގުރާމަ ވަރުގަދަކޮށް، ބޮޑު ސަރަހައްދުތަކެއް ހިފައިފަ އެވެ.
އަފްގާނިސްތާނުގެ ހާލަތު ނުރައްކާވުމުން ގިނަ ގައުމުތަކުގެ ރައްޔިތުން އެ ގައުމުން ފޭބުމަށް ދަނީ އަންގަމުންނެވެ. ޗައިނާ އާއި އިންޑިއާއިން އެގޮތަށް އަމަލުކޮށްފައި ވާއިރު، ފްރާންސުން ވެސް ނިންމީ އަންނަ ހޮނިހިރު ދުވަހު ޗާޓަރު ފްލައިޓެއްގައި ރައްޔިތުން ގައުމަށް ގެންދިޔުމަށެވެ. އޭގެ އިތުރުން ޖަރުމަނުން ވެސް ވަނީ ރައްޔިތުން އަފްގާނިސްތާނުން ފޭބުމަށް އަންގާފަ އެވެ.
އަމާން ދޭ ސިފައިންގެ ފައުޖުތަކުގެ ކަންކަން ބަލަހައްޓާ ތާލިބާން ކޮމިޝަނުގެ ވެރިޔާ ބުނީ ސިޓީތަކުގައި ހަނގުރާމަ ކުރަން އެއް ގޮތަކަށް ވެސް ބޭނުން ނުވާ ކަމަށެވެ.
"ފަރުބަދަތަކާއި ސަހަރާތަކުގައި ހަނގުރާމަކޮށް ނިމި، ސިޓީތަކުގެ ދޮރާއްޓާ ހަމައަށް މިހާރު ފޯރާފައި ވާއިރު، ތާލިބާނުން ސިޓީ ތެރޭގައި ހަނގުރާމަ ކުރާކަށް ބޭނުމެއް ނޫން،" އާމިރް ހާން މުއްތަގީ ކުރި ޓްވީޓެއްގައި ބުންޏެވެ.
އޭނާ ބުނީ ސިޓީތަކަށް ލިބޭ ގެއްލުން ކުޑަ ކުރެވޭނީ ތާލިބާނުންނާ ގުޅުމުން ކަމަށާއި އެ ދައުވަތުގެ ބޭނުން ހިފުމަށް ގޮވާލާ ކަމަށެވެ.
މީގެ ކުރިން 1990 ގެ އަހަރުތަކުގައި ތާލިބާނުން ބާރުގަދަވިއިރު ވެސް ގެންގުޅުނީ މި ސްޓްރެޓެޖީ އެވެ. އެގޮތުން އަވަށްތަކާއި ސިޓީތަކުގެ މުސްކުޅި ބޮޑުން މެދުވެރިކޮށް،ނަސޭހަތް ދީ ހަދައިގެން ސިފައިންނަށް އަމާން ދެވޭނެ ގޮތެއް ހަމަޖައްސަ އެވެ.
މުއްތަގީ އެހެން ބުނިތާ ކުޑަ އިރުކޮޅެއްގެ ތެރޭގައި ވެރިރަށް ކާބުލްގެ މެދުގައި އޮތް ބޮމެއް ގޮއްވާލާ ހަތަރު މީހަކު މަރުވި އެވެ. އެ ހަމަލާގައި އިތުރު 11 މީހުން ޒަހަމްވި ކަމަށް ފުލުހުން ބުނެ އެވެ.
އަފްގާނިސްތާނުގެ ޑިފެންސް މިނިސްޓްރީން ބުނީ ގިނަ ދުވަސްތަކެއް ވަންދެން ހަމަލާ ބަދަލު ކުރުމަށް ފަހު ގާލާއިނޯ ސިޓީން ތާލިބާނުން ފައްސާލާފައިވާ ކަމަށެވެ. އެ ސިޓީއަކީ މިދިޔަ މޭ މަހުން ފެށިގެން ތާލިބާނުންނަށް ހަމަލާދެވުނު ފުރަތަމަ މައި މަރުކަޒެވެ.
