ހުރިހާ ޖަލުތަކެއްގައި ކޮވިޑު ފެތުރުން ހުއްޓުވި އާންމު ހާލަތަށް ގެނެވިފައިވާ ކަމަށް ކަރެކްޝަނުން ބުނެފި އެވެ.
ރާއްޖޭގެ ކޮވިޑް ހާލަތު ގޯސްވެ ޖަލުތަކުގައި ވެސް ކޮވިޑް ފެތުރުނެވެ. އެގޮތުން ގައިދީންގެ ތެރެއިން ހައިރިސްކް މީހުން އެމީހުންގެ ގޭގެއަށް ވަގުތީގޮތުން ވެސް ވަނީ ބަދަލު ކޮށްފަ އެވެ.
ކޮމިޝަނާ އޮފް ޕްރިޒަންސް އަހްމަދު މުހައްމަދު ފުޅު ވިދާޅުވީ ޖަލުތަކުން ކޮވިޑް ކޮންޓްރޯލް ކުރެވިފައިވާ ކަމަށެވެ.
އެއާއެކު ޖަލަށް ޒިޔާރަތްކޮށްގެން އާއިލީ ބައްދަލުވުމާއި، ވަކީލު ބައްދަލުވުން ހަމަޖެއްސުމަށް ވާންޖެހޭ ތައްޔާރީތައް ވަމުންދާ ކަމަށާއި މި ހަފްތާގެ ތެރޭގައި އެކަމަށް ހާއްސަ އުސޫލެއް އާންމުކުރެވޭނެ ކަމަށެވެ.
މިދިޔަ މަހުން ފެށިގެން ކޮވިޑް ޖެހޭ މީހުންގެ އަދަދު މަދުވަމުން އަންނާތީ ސަރުކާރުން ވަނީ ގިނަ ލުއިތަކެއް ދީފަ އެވެ. އެ ގޮތުން މާލެ ސަރަހައްދުގައި ހިންގަމުން އައި ކާފިއު އުވާލާ ވިޔަފާރިތައް ހުޅުވާލައިގެން އާންމުންނަށް ވަދެ ހިދުމަތް ހޯދޭ ގޮތަށް ވަނީ ހަމަޖެހިފަ އެވެ.
ރާއްޖެއިން ދުވާލަކު ކޮވިޑަށް ޕޮޒިޓިވްވާ މީހުންގެ އަދަދު މަދު ނަމަވެސް މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދު ވަނީ 75162 އަށް އަރާފަ އެވެ. އެ މީހުންގެ ތެރެއިން 72439 މީހުން މިހާތަނަށް ރަނގަޅުވެފައި ވާއިރު މަރުވި މީހުންގެ އަދަދު ވަނީ 214 އަށް އަރާފަ އެވެ.
