ނާސިރިއްޔާ، އިރާގު (ޖުލައި 13) - އިރާގުގެ ހޮސްޕިޓަލެއްގައި ކޮވިޑް ބަލި މީހުން ބައިތިއްބާ ވޯޑެއްގައި ހޯމަ ދުވަހުގެ ރޭ ރޯވެ ހިނގި ނުރައްކާތެރި އަލިފާނުގެ ހާދިސާއެއްގައި 52 މީހުން މަރުވެ، 22 މީހުންނަށް އަނިޔާވެއްޖެ އެވެ.
އަލިފާނުގެ ހާދިސާގެ ހިނގީ ދެކުނު ނާސިރިއްޔާ ސިޓީގައި ހުންނަ އަލް ހުސެން ހޮސްޕިޓަލުގަ އެވެ. ހޯމަ ދުވަހުގެ ރޭގެ ވަގުތެއްގައި ރޯވި އަލިފާންގަނޑު ކޮންޓްރޯލް ކުރީ އިރާގުގެ ސިވިލް ޑިފެންސް ފޯސްގެ މަސައްކަތުންނެވެ.
ހެލްތު ޑައިރެކްޓެރޭޓްގައި ހިމެނޭ ސިއްހީ މަސްދަރަކުން އޭއެފްޕީއަށް ބުނީ "އަލިފާން ރޯވާން ދިމާވި މައިގަނޑު ސަބަބަކީ އޮކްސިޖަން ޓޭންކުތައް ގޮވުން" ކަމަށެވެ.
ނާސިރިއްޔާގެ ސިއްހީ އިދާރާގެ ތަރުޖަމާނު ހައިދަރު އަލް ޒަމީލީ ވިދާޅުވީ މިހާތަނަށް 52 މީހެއްގެ ހަށިގަނޑު ފެނިފައި ވާއިރު، އިތުރު 22 މީހަކަށް އަނިޔާވެގެން ފަރުވާދެމުންދާ ކަމަށެވެ.
"ގިނަ ބަޔަކު މަރުވީ ފިހިގެން. އިތުރު މީހުން ހޯދުމުގެ މަސައްކަތް ދަނީ ކުރިއަށް. ބައެއް މީހުން އެތަނުގެ ތެރޭގައި ތާށިވެފައި ތިބުމުގެ ބިރު އެބަ އޮތް،" އޭނާ ވިދާޅުވި އެވެ.
އެ ހޮސްޕިޓަލުގައި ކޮވިޑް ބަލި މީހުންނަށް ހާއްސަ ވޯޑުގައި 70 އެނދު ހުރެ އެވެ. މިއީ ފާއިތުވި ތިން މަހުގެ ތެރޭގައި އިރާގުގެ ކޮވިޑް ފެސިލިޓީއެއްގައި މިގޮތަށް ރޯވި ދެ ވަނަ ފަހަރެވެ.
އެކަމާ ހިތްހަމަނުޖެހި ގިނަ އަދަދެއްގެ ޒުވާނުން ވަނީ ހޮސްޕިޓަލުގެ ބޭރުގައި މުޒާހަރާކޮށްފަ އެވެ. އޭގެ އިތުރުން ގިނަ ބަޔަކު އަންނަނީ ސޯޝަލް މީޑިއާގައި އިސްވެރިންގެ އިސްތިއުފާއަށް ގޮވަމުންނެވެ.
އަލް ހުސެން ހޮސްޕިޓަލް ހުންނަ ސަރަހައްދުގައި ކުއްލި ނުރައްކަލުގެ ހާލަތު އިއުލާނުކޮށްފައި ވާއިރު، ނާސިރިއްޔާގެ ސިޓީގެ އެހެން ހޮސްޕިޓަލުތަކުގެ ޑޮކްޓަރުންނަށް އަންގާފައި ވަނީ އަލިފާނުގައި ޒަހަމްވި މީހުންނަށް އަވަހަށް ފަރުވާ ދިނުމަށެވެ.
ބޮޑު ވަޒީރު މުސްތަފާ އަލް ހަދޭމީ ވަނީ ކުއްލި ބައްދަލުވުމަށް ފަހު އަލިފާން ރޯވި ސަބަބު ދެނެގަންނަން އަމުރު ކުރައްވާފައި ކަމަށް އެމަނިކުފާނުގެ އޮފީހުން ކުރި ޓްވީޓެއްގައި ބުންޏެވެ.
އަލިފާން ރޯވި ހޮސްޕިޓަލް ހުންނަ ސަރަހައްދުގެ ސިއްހީ އިދާރާގެ ވެރިޔާ އާއި ހޮސްޕިޓަލުގެ ވެރިޔާ ވެސް ވަނީ ހައްޔަރުކޮށްފަ އެވެ. ފުލުހުން ދަނީ އެ މީހުންނާ ސުވާލު ކުރަމުންނެވެ.
މިދިޔަ އޭޕްރިލް މަހު ބަގްދާދުގައި ހުންނަ ކޮވިޑް ފެސިލިޓީއެއްގައި ރޯވެ 82 މީހުން މަރުވެ، 110 މީހުންނަށް އަނިޔާވި އެވެ. އެ ފަހަރު ވެސް ރޯވީ އޮކްސިޖަން ސިލިންޑަރުތައް ގޮވައިގެންނެވެ.
