މެޑްރިޑް (ޖުލައި 13) - އިޓަލީގެ އުދިނޭޒީ އަށް ކުޅެމުންދިޔަ އާޖެންޓީނާގެ މިޑްފީލްޑަރު ރޮޑްރީގޯ ޑެ ޕޯލް ސްޕެއިނުގެ ޗެމްޕިއަން އެތުލެޓިކޯ މެޑްރިޑަށް ސޮއިކޮށްފި އެވެ.
މީގެ ދެ ހަފްތާއެއްހާ ދުވަސް ކުރިން ޑެ ޕޯލްގެ ޑީލްގެ ހުރިހާ މަޝްވަރާއެއް އެތުލެޓިކޯ އާއި އުދިނޭޒީން ވަނީ ނިންމާލައިފަ އެވެ. އަދި ކޮޕަ އެމެރިކާ ނިމުމުން ޑެ ޕޯލްގެ މެޑިކަލާއި ކޮންޓްރެކްޓް ކަންކަން ކުރިއަށް ގެންދަން ނިންމާފައި އޮތްއިރު، އިއްޔެ ވަނީ އެ ބައި ފުރިހަމަކޮށްފަ އެވެ.
އުމުރުން 27 އަހަރުގެ ޑެ ޕޯލް އެތުލެޓިކޯއާ ގުޅުނީ ފަސް އަހަރުގެ އެއްބަސްވުމެއްގެ ދަށުންނެވެ. އޭނާ ގަންނަން އެތުލެޓިކޯ އިން ޖުމްލަ 40 މިލިއަން ޑޮލަރު ހަރަދުކުރާނެ އެވެ.
"އަހަރެން މި ހުރީ ވަރަށް އުފަލުން. އަހަރެން މި ބަދަލުވަނީ ލަލީގާ ޗެމްޕިއަނުންނަށް. އަހަންނަށް އެނގޭ މި ކްލަބަށް ބަދަލުވުމަށް ފަހު ޒިންމާ ބޮޑުވާނެ ކަން. އަހަރެން ދެކެނީ މިއީ ކެރިއަރުގައި ލިބުނު ކުރިއެރުމެއް ކަަމަށް،" ޑެ ޕޯލް ބުންޏެވެ.
އާޖެންޓީނާގެ ރޭސިން ކްލަބަށް ކުޅުމަށް ފަހު ޑެ ޕޯލް އެންމެ ފުރަތަމަ ގުޅުނު ޔޫރަޕްގެ ކްލަބަކީ ސްޕެއިނުގެ ވެލެންސިއާ އަށެވެ. އެ ޓީމުގައި ދެ އަހަރު ހޭދަކުއިރު، އެއް ސީޒަނުގައި ލޯނަަކަށް ކުރީގެ ޓީމު ރޭސިން އަށް ކުޅުނެވެ. އޭގެ ފަހުން 2016 ވަނަ އަހަރު އުދިނޭޒީ އަށް ކުޅެން ފަށައި މިދިޔަ ސީޒަނުގެ ނިޔަށް އެ ޓީމަށް ގިނަ މެޗުތަކެއް ކުޅުނެވެ. މިދިޔަ އަހަރުން ފެށިގެން އެ ޓީމުގެ ކެޕްޓަން ބޭންޑް އަޅައިގެން ޑެ ޕޯލް ވަނީ ގިނަ މެޗުތަކެއްގައި ކުޅެފަ އެވެ.
މި ފަހަރުގެ ކޮޕަ އެމެރިކާ ކާމިޔާބުކޮށް 28 އަހަރަށް ފަހު ބޮޑު މުބާރާތެއްގެ ތަށި ހޯދި އާޖެންޓީނާ ޓީމުގައި މުހިއްމު ދައުރެއް އަދާކުރި ޑެ ޕޯލްގެ އިތުރުން ލަޓާރޯ މާޓީނޭޒް ގެންނަން ވެސް އެތުލެޓިކޯ އިން އަންނަނީ މަސައްކަތް ކުރަމުންނެވެ.
އެތުލެޓިކޯ އިން ދެން މަޝްވަރާ ކުރަމުން އަންނަ ޑީލަކީ އެ ޓީމަށް ކުރިން ކުޅުނު އެންޓޮއިން ގްރީޒްމަން އަލުން ގެންނަން ކުރާ މަސައްކަތެވެ. ބާސެލޯނާ އިން އެ ކްލަބްގެ މުސާރަ ކަންތައްތައް ހަމަޔަކަށް އަޅުވަން މަސައްކަތް ކުރުމުގެ ތެރެއިން ގްރީޒްމަން ދޫކޮށްލާނެ ކަމަށް ވަރަށް ބޮޑަށް ބެލެވެ އެވެ. ރިޕޯޓްތައް ބުނާގޮތުން ބާސެލޯނާ އިން މިހާރު ވަނީ އެތުލެޓިކޯ އަށް ކުޅޭ ސައުލް ނިގޭޒާއި ގްރީޒްމަން ބަދަލުކުރަން ހުށަހަޅައިފަ އެވެ. ސައުލް ހޯދަން އިނގިރޭސި ޕްރިމިއާ ލީގުގެ ލިވަޕޫލުން ވެސް މަސައްކަތް ކުރެ އެވެ.
