ބިދޭސީންގެ މައްޗަށް ނެރޭ ކޯޓު އަމުރުތައް އިނގިރޭސި ބަހުން ނެރެވިދާނެ ކަމަށް ސުޕްރީމް ކޯޓުން ކަނޑައަޅައިފި އެވެ.
ރާއްޖޭގެ ކޯޓުތަކުގެ ނިންމުންތަކާއި ހުކުމްތައް އަދި އަމުރުތައް ވެސް ނެރެނީ ދިވެހި ބަހުންނެވެ. އެއީ ބިދޭސީއެއްގެ މައްޗަށް ހިންގާ ޝަރީއަތެއް ނަމަވެސް، އެކަން އޮންނަނީ އެގޮތަށެވެ.
މީހުން ހައްޔަރުކުރުމަށާއި ބަންދު ޖެހުމަށް އަދި ބަލާފާސްކުރުމަށް އަމުރުތައް ދިވެހި ބަހުން ނެރެމުންދާއިރު، މިފަދަ އަމުރުތައް ބިދޭސީންގެ މައްޗަށް ނެރޭ މިންވަރު ވެސް އިތުރެވެ.
އެމީހުންގެ މައްޗަށް ނެރޭ އަމުރުތައް ނޭނގޭ ބަހަކުން އޮންނާތީ އެކަމުގެ ކަންބޮޑުވުން އޮވެ އެވެ.
އެކަމަށް ހައްލު ގެނައުމުގެ ގޮތުން ސުޕްރީމް ކޯޓުން މިއަދު ވަނީ ޕްރެކްޓިސް ޑައިރެކްޝަނެއް ނެރެފަ އެވެ.
އުއްތަމަ ފަނޑިޔާރު އަހުމަދު މުއުތަސިމް އަދުނާން ސޮއިކުރައްވާ ނެރުއްވި ޕްރެކްޓިސް ޑައިރެކްޝަނުގައި ބުނީ ބިދޭސީއެއްގެ މައްޗަށް ނޫނީ އެމީހުންގެ ބޭނުމަށް ނެރޭ އަމުރުތައް އެމީހުންނަށް ދޭހަވާނެ ބަހަކުން އޮތުން މުހިންމު ކަމަށެވެ.
އެހެންވެ، އަމުރުތައް ނެރުމުގައި ގަވައިދުގެ ޖަދުވަލުގައިވާ ނަމޫނާގައި ބަޔާންކޮށްފައި ހުރި ކަންކަން ހިމެނޭ ގޮތަށް އިނގިރޭސި ބަހުން ނެރުމަށް ހުރަހެއް ނެތް ކަމަށް ޕްރެކްޓިސް ޑައިރެކްޝަންގައިވެ އެވެ.
