ދާކާ، ބަންގްލަދޭޝް (ޖުލައި 10) - ބަންގްލަދޭޝްގެ ފެކްޓްރީއެއްގައި ރޯވެ 52 މީހުން މަރުވި ހާދިސާއާ ގުޅިގެން އެ ފެކްޓްރީގެ ވެރިޔާ ހައްޔަރުކޮށްފި އެވެ.
ރޯވި ފެކްޓްރީގައި އުމުރުން 11 އަހަރުގެ ކުޑަކުދިން ވެސް މަސައްކަތް ކުރަމުން ދިޔަކަން ފަޅާ އަރާފައިވަނީ ފުލުހުން އިއްޔެ ފެށި ތަހުގީގުންނެވެ.
ފުލުހުން ބުނީ ހައްޔަރު ކުރި އަށް މީހުންގެ ތެރޭގައި، ކާބޯތަކެތި އުފައްދާ ފެކްޓްރީގެ ވެރިޔާ އާއި އޭނާގެ ހަތަރު ދަރިން ވެސް ހިމެނޭ ކަމަށެވެ.
މިދިޔަ ބުރާސްފަތި ދުވަހު ފެކްޓްރީގައި ރޯވެ، އެއް ދުވަސް ވަންދެން އަނދާފައި ވެ އެވެ. އަލިފާން ރޯވި ސަބަބާއި އެ ތަނުގައި ކުޑަކުދިން ލައްވާ މަސައްކަތް ކުރުވި މައްސަލަ ތަހުގީގު ކުރަނީ ވަކިވަކިންނެވެ.
ނަރާޔަންގަންޖް ޑިސްޓްރިކްޓުގެ ފުލުހުންގެ ވެރިޔާ ޖައިދުލް އާލަމް އޭއެފްޕީއަށް ވިދާޅުވީ އަލިފާން ރޯވި އިރު ފެކްޓްރީއަށް ވަދެވެން އޮންނަ ދޮރުގައި އޮތީ ތަޅު އަޅުވާފައި ކަމަށެވެ. އަދި އެތަން ހިންގަމުން ދިޔައީ ރައްކާތެރިކަން ކަށަވަރު ކުރުމުގެ ގިނަ އުސޫލުތަކާ ހިލާފަށް ކަމަށް ވިދާޅުވި އެވެ.
"އެއީ ގަސްތުގައި ގިނަ ބަޔަކު މަރާލުން،" އޭނާ ވިދާޅުވި އެވެ.
ރޯވި ހާޝިމް ފުޑް އެންޑް ބެވެރޭޖް ފެކްޓްރީ ހުންނަނީ ދާކާގެ ބޭރުން އޮންނަ ރުޕްގާންޖް ސިނާއީ އަވަށުގަ އެވެ. މަރުވެފައިވާ 48 މީހެއްގެ ހަށިގަނޑު ފެނުނީ އެ ތަނުގެ ތިން ވަނަ ބުރިންނެވެ.
އަލިފާން ނިއްވާ ހިދުމަތުގެ ތަރުޖަމާނަކު ބުނީ، މައި ސިޑިއަށް ދާން ހުންނަ ދޮރުގައި ވެސް ހުރީ ތަޅު އަޅުވާފައި ކަމަށެވެ. އެ އިމާރާތުގައި ގިނަ އަދަދެއްގެ ކެމިކަލް އާއި އަލިފާން ރޯވާ ޒާތުގެ ޕްލާސްޓިކް ތަކެތި ވެސް ރައްކާކޮށްފައި ހުުއްޓެވެ.
ސްޓޭޓް ލޭބާ މިނިސްޓަރު މޮންނުޖާން ސުފިއާން ވިދާޅުވީ ފެކްޓްރީގައި ކުޑަކުދިން ލައްވާ މަސައްކަތް ކުރުވި މައްސަލައިގެ ތަހުގީގެއް ކުރިއަށްދާ ކަމަށެވެ.
ބަންގްލަދޭޝްގައި 2013 ވަނަ ނުވަ ބުރީގެ ރާނާ ޕްލާޒާ ކޮމްޕްލެކްސް ބިމާ ހަމަވެ، 1،100 އަށް ވުރެ ގިނަ މީހުން މަރުވި ހާދިސާއަށް ފަހު، ރައްކާތެރިކަމުގެ ފިޔަވަޅުތައް ވަރުގަދައަށް ތަންފީޒު ކުރާނެ ކަމަށް ސަރުކާރުން ބުނެފައި ވެ އެވެ.
ނަމަވެސް އޭގެ ފަހުން ނުރައްކާތެރި އަލިފާނާއި އިމާރާތް ވެއްޓުމުގެ ހާދިސާތައް ހިނގާފައި ވެ އެވެ. އެގޮތުން ފެބްރުއަރީ 2019 ގައި ގަވާއިދާ ހިލާފަށް ދާކާގެ އެޕާޓްމަންޓުތަކެއްގެ ތެރޭގައި ކެމިކަލް ރައްކާކޮށްފައި ހުއްޓާ އަލިފާން ރޯވެ، 70 އަށް ވުރެ ގިނަ މީހުން މަރުވި އެވެ.
