ނިޔޯން، ސްވިޒަލެންޑް (ޖުލައި 10) - އެގާރަ ގައުމެއްގައި މި ފަހަރުގެ ޔޫރޯ ކުރިއަށްދާ ގޮތަށް ރޭވިފައި އޮތްއިރު، މިއީ މި މުބާރާތް ކުރިއަށް ގެންދަން އިންސާފުވެރި ފޯމެޓެއްގެ ގޮތުގައި ނުބެލެވޭ ކަމަށް ޔުއެފާގެ ރައީސް އަލެކްސަންޑަ ޗެފެރިން ވިދާޅުވެއްޖެ އެވެ.
މީގެ 10 ވަރަކަށް އަހަރު ކުރިން ޔުއެފާގެ ރައީސަކަށް ފްރާންސްގެ މިޝޭލް ޕްލެޓިނީ ހުންނަވައި މި ފަހަރުގެ ޔޫރޯ އެންމެ ފުރަތަމަ ރޭވީ 13 ސިޓީއެއްގައި ކުރިއަށް ގެންދާށެވެ. އެކަމަކު، ފަހުން ދެ ގައުމެއް މި ފަހަރުގެ މުބާރާތް ހޯސްޓް ނުކުރެވޭނެ ކަމަށް ބުނުމުން 11 ސިޓީ އަކަށް ބަދަލުކުރީ އެވެ.
ޔުއެފާގެ ރައީސްކަމަށް ޗެފެރިން އިންތިހާބު ވެވަޑައިގަތް އިރު ވެސް އޮތީ މި ފޯމެޓްގެ ހުރިހާ ކަމެއް ނިމިފަ އެވެ. އެހެންވެ، އޭނާ އަށް މި ފަހަރުގެ ޔޫރޯގައި މި ފޯމެޓާ އެއްގޮތަށް ކުރިއަށް ދިއުން ނޫން ގޮތެއް ނެތެވެ.
ބީބީސީގެ ސްޕޯޓްސް ޑެސްކް ޕޮޑްކާސްޓްގައި ވާހަކަ ދައްކަވަމުން ޗެފެރިން ވިދާޅުވީ ދަތުރުފަތުރު ކޮށްގެން މި ކަހަލަ މުބާރާތެއް އެންމެ އިންސާފުވެރިކޮށް ނުބޭއްވޭނެ ކަމަށެވެ. އަދި މި ފަދަ ފޯމެޓަކަށް ދެން ސަޕޯޓް ނުުކުރާނެ ކަމަށް ޗެފެރިން ވިދާޅުވި އެވެ.
"ބައެއް ގައުމުތަކުން މެޗު ކުޅެން އެބަޖެހޭ 10،000 ކިލޯމީޓަރު ދަތުރުކުރަން އެކަމަކު އަނެއް ޓީމުތަކުން މި ޖެހެނީ 1000 ވަރަކަށް ކިލޯމީޓަރު ދަތުރެއް ކޮށްލަން. މިއީ އެއް މަސް ތެރޭ ނިންމާލަން ޖެހޭ މުބާރާތެއްގައި ވާން ޖެހޭނެ ގޮތެއް ނޫން،" ޗެފެރިން ވިދާޅުވި އެވެ.
މި ފަހަރުގެ ޔޫރޯގައި އެންމެ ދިގު ދަތުރުތައް ކުރީ ސްވިޒަލެންޑުންނެވެ. އެ ޓީމުން ޖުމްލަ އެއްކޮށް 15،485 ކިލޯމީޓަރު ދަތުރުކުރި އެވެ. އެންމެ މަދުން ދަތުރުކުރަން ޖެހުނީ ސްކޮޓްލެންޑް އެވެ. އެއީ ސްކޮޓްލެންޑް ގްރޫޕް ސްޓޭޖުން ކެޓިއިރު، އެ ޓީމުން މުބާރާތުގައި ކުޅެން ޖެހުނު ތިން މެޗުގެ ތެރެއިން އެ ގައުމުގައި ދެ މެޗު ކުޅުމުގެ އިތުރުން ދެން ކުޅުނީ އިންގްލެންޑްގައި ކަމަށްވާތީ އެވެ. ސްކޮޓްލެންޑް ދަތުރުކުރީ 1108 ކިލޯމީޓަރެވެ.
"މިއީ އަހަރެން މި މަގާމަށް އައިއިރު ވެސް ނިމިފައި އޮތް ފޯމެޓެއް. މި ފޯމެޓަށް ދެނެއް ނުބޭއްވޭނެ. އެއީ އެކި ގައުމުތަކުގައި މި އޮންނަނީ އެކި އުސޫލު. އީޔޫ އިން ބޭރުގެ ގައުމުތަކުގައި ވެސް ކުޅެން ޖެހޭއިރު މީގެ ދަތުރުފަތުރު ކުރަން އެކި އުސޫލު މި ހުންނަނީ. އެންމެ ރަނގަޅު ހައްލަކީ އެއް ގައުމެއްގައި ކުޅޭ މުބާރާތަކަށް ހެދުން. އޭރުން ދަތުރު ފަތުރަށް މި ބޮލުގެ ރިހުމަށް ލުޔެއް ލިބުނީ،" ޗެފެރިން ވިދާޅުވި އެވެ.
މި ފަހަރުގެ ޔޫރޯގައި ބައެއް ގައުމުތަކަށް އަމިއްލަ ގައުމުގައި ގިނަ މެޗުތައް ކުޅޭ ގޮތަށް އޮތުން ވެސް އެއީ ގޯސް ކަމެއް ކަމަށް ޗެފެރިން ވިދާޅުވި އެވެ.
މިސާލަކަށް އިންގްލެންޑް މުޅި މުބާރާތުގައި ޖުމްލަ ހަތް މެޗު ކުޅޭއިރު، ހަ މެޗު އަމިއްލަ ގައުމުގައި ކުޅޭ ގޮތަށް ރޭވިފައި އޮތްއޮތުން ގިނަ ޓީމުތަކަކުން ކުށްވެރިކުރެ އެވެ. ޝެޑިއުލާ ދެކޮޅަށް ވާހަކަ ދެއްކި ގައުމުތަކުގެ ތެރޭގައި ފްރާންސާއި ޕޯޗުގަލް އަދި ބެލްޖިއަމް ހިމެނެ އެވެ.
ޔޫރޯ އެންމެ ފުރަތަމަ ބާއްވަން ތާވަލުކޮށްފައި އޮތީ މިދިޔަ އަހަރު އެވެ. އެކަމަކު، ކޮވިޑް-19ގެ ނުރައްކާ މިދިޔަ އަހަރު އިންތިހާ އަށް ބޮޑުވެފައި އޮތުމުން މި އަހަރަށް ފަސްކުރަން ޖެހުނީ އެވެ.
ޗެފެރިން ވަނީ ސިއްހީ ޕްރޮޓޮކޯލްގެ ތެރެއިން ޔޫރޯ އެންމެ ރަނގަޅަށް ކުރިއަށް ގެންދެވޭތީ ވަރަށް ހިތްހަމަ ޖެހޭ ކަމަށް ވިދާޅުވެފަ އެވެ. އަދި އޭނާ ވަނީ އެކަމަށްޓަކައި ހުރިހާ ޓީމަކަށް ޝުކުރު އަދާކޮށްފަ އެވެ.
