ކާބުލް، އަފްގާނިސްތާން (ޖުލައި 10) - އިރާނާއި ތުރްކްމެނިސްތާނާ ގުޅޭ ބޯޑަރުގެ ބޮޑު ސަރަހައްދެއް ހިފުމަށް ފަހު އަފްގާނިސްތާުގެ 85 ޕަސެންޓުގެ ކޮންޓްރޯލް ލިބިފައިވާ ކަމަށް ތާލިބާނުން ބުނެފި އެވެ.
ވިހި އަހަރުގެ ހަނގުރާމައަކަށް ފަހު އެމެރިކާ ސިފައިން އަފްގާނިސްތާނުން ފައިބަމުންދާ މި ދަނޑިވަޅުގައި ތާލިބާނުން ވަނީ އަފްގާން ސިފައިންނާ ދެކޮޅަށް ކުރާ ހަނގުރާމަ ވަރުގަދަކޮށްފަ އެވެ.
ހުކުރު ދުވަހު ތާލިބާނުން ބުނީ ހުޅަނގު އަފްގާނިސްތާނުގެ މުހިއްމު ދެ ތަނެއް ހިފާފައިވާ ކަމަށެވެ. އެއާއެކު އަފްގާނިސްތާނުގެ ހުޅަނގުގައި އޮތް ބޯޑަރު ސަރަހައްދުގެ ބޮޑު ބައިތަކެއް ވަނީ އަފްގާން ސަރުކާރަށް ގެއްލިފަ އެވެ.
ރަޝިއާގެ މޮސްކޯގައި ތިބި ތާލިބާނުންގެ ވަފުދަކުން ބުނީ އަފްގާނިސްތާނުގެ 400 ޑިސްޓްރިކްޓުގެ ތެރެއިން 250 ޑިސްޓްރިކްޓުގެ ކޮންޓްރޯލް ހޯދާފައިވާ ކަމަށެވެ. ނަމަވެސް އެ ވާހަކަ ސަރުކާރުން ދޮގުކުރެ އެވެ.
ތާލިބާނުންގެ ތަރުޖަމާނު ޒަބީހުﷲ މުޖާހިދު އޭއެފްޕީއަށް ބުނީ އިރާނާ ގުޅޭ ބޯޑަރު އަވަށެއް ކަމަށްވާ އިސްލާމް ގަލާ އާއި ތުރްކްމެނިސްތާނާ ގުޅޭ ޓޯގުންޑީ ބޯޑަރު ކްރޮސިންގް ވެސް އިއްޔެ ހިފާފައިވާ ކަމަށެވެ.
އަފްގާނިސްތާނުގެ އިންޓީރިއާ މިނިސްޓްރީގެ ތަރުޖަމާނު ތާރިގް އާރިއަން ވިދާޅުވީ ތާލިބާނާ ދެކޮޅަށް ހަނގުރާމަ ވަރުގަދަ ކުރުމުގެ މަސައްކަތް މެދުކެނޑުމެއް ނެތި ކުރިއަށްދާ ކަމަށެވެ.
