ޕެރިސް، ފްރާންސް (ޖުލައި 10) - ކޮވިޑް ފަތުރާ ވައިރަހުގެ ޑެލްޓާ ވޭރިއެންޓު ކޮންޓްރޯލް ކުރަން އާބާދީގެ 95 ޕަސެންޓު މީހުންނަށް ވެކްސިން ދޭން ޖެހޭނެ ކަމަށް ފްރާންސްގެ ސަރުކާރަށް ލަފާދޭ ސައިންޓިސްޓުންގެ ޕެނެލަކުން ބުނެފި އެވެ.
ސައިންޓިފިކް ކައުންސިލުން ބުނީ ކޭސްތައް އިތުރުވަމުންދާ މި ދަނޑިވަޅުގައި "ޑެލްޓާ ވޭރިއެންޓާ ގުޅިފައިވާ މި ހަތަރު ވަނަ ރާޅެއް އައުމުގެ ބިރު އެބަ އޮތް ކަމަށާއި، ވެކްސިން ދިނުން އިތުރު ނަމަވެސް އެ ރާޅުގެ އަސަރު ސިއްހީ ނިޒާމަށް ކުރާނެ" ކަމަށެވެ.
"އާބާދީގެ 90 ނުވަތަ 95 ޕަސެންޓު މީހުންނަށް ވެކްސިން ދީގެން މެނުވީ މި ބަލިމަޑުކަން ކޮންޓްރޯލެއް ނުކުރެވޭނެ،" އެ ކައުންސިލުން ބުންޏެވެ.
ފްރާންސްގައި މިހާތަނަށް ވެކްސިންގެ އެއް ޑޯޒް ޖަހާފައިވަނީ އާބާދީގެ 50 ޕަސެންޓު މީހުންނެވެ. އަދި 40 ޕަސެންޓު މީހުން ވަނީ ދެ ޑޯޒް ޖަހާފަ އެވެ. ސަރުކާރުގެ އަމާޒަކީ އާބާދީގެ 75 ޕަސެންޓު ނުވަތަ 35 މިލިއަން މީހުންނަށް އޯގަސްޓް ނިމުމުގެ ކުރިން ދެ ޑޯޒް ދިނުމެވެ.
އިންޑިއާއިން އެންމެ ފުރަތަމަ ފެނުނު ޑެލްޓާ ވޭރިއެންޓަކީ ކޮވިޑުގެ އެހެން ވޭރިއެންޓުތަކަށް ވުރެ 60 ޕަސެންޓު އަވަހަށް ފެތުރޭ ވޭރިއެންޓެކެވެ. ގިނަ ގައުމުތަކަށް މި ވޭރިއެންޓު ފެތުރި ކޭސްތައް އިތުރުވެ، ހޮސްޕިޓަލުގައި އެޑްމިޓު ކުރުން ވެސް ވަނީ އިތުރުވެފަ އެވެ.
