ކޮލޮމްބޯ، ސްރީ ލަންކާ (ޖުލައި 8) - އިގްތިސާދީ އެތައް މައްސަލަތަކާ ދިމާވެފައިވާ ސްރީ ލަންކާގެ ފިނޭންސް މިނިސްޓަރުގެ މަގާމަށް، ރައީސް ގޮތަބަޔާ ރާޖަޕަކްސަގެ ކޮއްކޯފުޅު، ބެސިލް ރާޖަޕަކްސަ އައްޔަން ކުރައްވައިފި އެވެ.
އުމުރުން 70 އަހަރުގެ ބެސިލްގެ ކުރިން އެ މަގާމުގައި ހުންނެވީ އުމުރުން 72 އަހަރުގެ ރައީސްގެ ބޭބޭފުޅެއް ކަމުގައިވާ މަހިންދަ ރާޖަޕަކްސަ އެވެ.
ފިނޭންސް މިނިސްޓްރީގެ ބަދަލުގައި އުމުރުން 75 އަހަރުގެ މަހިންދަ އައްޔަނު ކުރައްވާފައި ވަނީ މުޅިން އަލަށް އުފެއްދި އިކޮނޮމިކް ޕޮލިސީޒް އެންޑް ޕްލޭނިން މިނިސްޓްރީ އަށެވެ.
މަހިންދައަކީ 2015 ވަނަ އަހަރާ ހަމައަށް ގާތްގަނޑަކަށް 10 އަހަރު ސްރީލަންކާގައި ވެރިކަން ކުރެއްވި ރައީސް އެވެ.
ކޮވިޑް ބަލިމަޑުކަމުގައި ސްރީލަންކާގެ އިގްތިސާދު ވަނީ 3.6 ޕަސެންޓު ފަހަތަށް ޖެހިފަ އެވެ. މިއީ 1948 ގައި އިނގިރޭސިންގެ އަތުން މިނިވަންކަން ލިބުނު ފަހުން ނުލިބޭ ވަރުގެ ބޮޑު ގެއްލުމެކެވެ.
ފިނޭންސް މިނިސްޓަރު ކަމަށް ބެސިލް އައްޔަނު ކުރެއްވުމާއެކު މި ވަގުތު ލަންކާ ސަރުކާރުގެ ކެބިނެޓުގައި ރާޖަޕަކްސަ އާއިލާގެ ފަސް މެމްބަރުން ތިއްބަވަ އެވެ.
ރައީސްގެ އެންމެ ދޮށީ ބޭބޭފުޅު އުމުރުން 78 އަހަރުގެ ޗަމާލްއަކީ އިރިގޭޝަން މިނިސްޓަރެވެ. އަދި ބޮޑު ވަޒީރުކަމާއި އަލަށް އުފެއްދި އިކޮނޮމިކް ޕޮލިސީޒް އެންޑް ޕްލޭނިން މިނިސްޓަރުކަން ކުރައްވާ މަހިންދަގެ އެންމެ ދޮށީ ދަރިކަލުން، އުމުރުން 35 އަހަރުގެ ނަމާލް އަކީ ޔޫތު އެންޑް ސްޕޯޓްސް މިނިސްޓަރެވެ.
އޭގެ އިތުރުން އެ އާއިލާގެ ގިނަ މެމްބަރުން ޖޫނިއާ މިނިސްޓަރު ފެންވަރުގެ ގިނަ މަގާމުތަކާއި ސަރުކާރުގެ އެހެން އިސް މަގާމުތަކުގައި ތިއްބަވަ އެވެ.
ވިކިލީކްސް ޖަމިއްޔާއިން 2007 ވަނަ އަހަރު އާއްމު ކުރި އެމެރިކާ އެމްބަސީގެ ލިޔުމެއްގައިވާ ގޮތުން ބެސިލްއަށް މީހުން މުހާތަބު ކުރަނީ "މިސްޓާ ޓެން ޕަސެންޓު"ގެ ނަމުންނެވެ. އެއީ ސަރުކާރަށް ލިބޭ ކޮންޓްރެކްޓުތަކުން ކޮމިޝަނެއް ނަންގަވާތީ ކަމަށް ތުހުމަތުކޮށްފައި ވެ އެވެ.
ނަމަވެސް ބެސިލް ވަނީ އެ ތުހުމަތު ދޮގުކުރައްވާފަ އެވެ. އަދި ދައުލަތުގެ ފައިސާއިން އެތައް މިލިއަން ޑޮލަރަށް އަމިއްލަފުޅު އެކައުންޓުތަކުގައި ފޮރުވި ކަމަށް ކުރެވޭ ތުހުމަތު ސާބިތު ކުރެވޭނެ ހެކި ތަހުގީގަށް ވެސް ހޯދިފައެއް ނުވެ އެވެ.
ބެސިލްއަކީ ސްރީ ލަންކާގެ އިތުރުން އެމެރިކާގެ ވެސް ރައްޔިތަކަށް ވާތީ، ލަންކާ ގާނޫނުގެ ދަށުން 2020 ވަނަ އަހަރުގެ އިންތިހާބުގައި ވާދަކުރެއްވޭ ގޮތެއް ނުވި އެވެ. ނަމަވެސް ރައީސް ގޮތަބަޔާ ފަހުން ވަނީ ގާނޫނުން އޮތް ހުރަސް އުވާލައްވާފަ އެވެ.
