ހުޅުމާލޭގައި ބެހެއްޓި ބިޔަ ޖަނަރޭޓަރު ސެޓުން މާލެއަށް ކަރަންޓު ދިނުމަށް ކުރަންޖެހޭ ބައެއް މަސައްކަތްތައް މާދަމާ ކުރުމަށް ހަމަޖެހިފައިވާ ކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން މިއަދު ބުނެފި އެވެ.
ސްޓެލްކޯ އިން ބުނީ މާލެ، ހުޅުމާލެ، ހުޅުލެ، އެއް ކަރަންޓު ވިއުގައަކުން ގުޅާލުމަށް ކުރަންޖެހޭ މަސައްކަތްތަކެއް ކުރުމަށް ހުކުރު ދުވަހު ހެނދުނު 7:00 ފެށިގެން 9:00 ހަމައަށް މާލޭގެ ބައެއް ހިސާބުތަކުން ކަރަންޓުދާނެ ކަމަށެވެ.
ހުޅުމާލޭގައި ބެހެއްޓި 50 މެގަވޮޓްގެ ކަރަންޓު ޖަނަރޭޓަރު ސެޓު މާލެއާ ގުޅާލަނީ ސިނަމާލޭ ބްރިޖުގެ އަރިމަތިން ގެންނަ ކޭބަލަކުންނެވެ. އަންނަ ޖުލައި މަހުގެ ތެރޭގައި އެ މަސައްކަތް ނިމުމުން މާލޭއަށް ކަރަންޓު ދިނުމަށް މިހާރު ބަހައްޓާފައި ހުރި ބައެއް ވަގުތީ ޖަނަރޭޓަރުތައް ނަގާނެ ކަމަށް ސްޓެލްކޯއިން ބުނެފައިވެ އެވެ.
މާލޭގައި ކަރަންޓު ބޭނުން ކުރާވަރު އުޅެނީ 60-70 މެގަވޮޓާ ދެމެދުގެ އަދަދެއްގަ އެވެ. މާލޭގައި ބަހައްޓާފައި ހުރި ސްޓެލްކޯ އިންޖީނު ގެއިން އުފެއްދެނީ ގާތްގަނޑަކަށް 90 މެގަވޮޓްގެ ކަރަންޓެވެ.
މިހާރު ހުޅުމާލޭގައި ބަހައްޓާފައި ހުރި 50 މެގަވޮޓްގެ ޖަނަރޭޓަރު ސެޓުގެ އިތުރުން ހަމަ އެ ސައިޒުގެ އިތުރު ޖަނަރޭޓަރު ސެޓެއް ހުޅުމާލޭގައި ބެހެއްޓުމަށް ސަރުކާރުން އަންނަނީ ރާވަމުންނެވެ. އަދި މާލެއަށް ބޭނުންވާ ކަރަންޓު އުފެއްދުމަށް ތިލަފުށީގައި 150 މެގަވޮޓްގެ އިންޖީނުގެއެއް ބެހެއްޓުމަށް މަސައްކަތްތަކެއް ވެސް ދަނީ ކުރަމުންނެވެ.
