ތެހްރާން، އިރާން (ޖުލައި 8) - އަފްގާނިސްތާން ސަރުކާރުގެ ވަފުދަކާއި ތާލިބާނުންގެ މަންދޫބުންނާ ދެމެދު ބުދަ ދުވަހު އިރާނުގެ ވެރިރަށް ތެހްރާނުގައި މަޝްވަރާކޮށްފައިވާ ކަމަށް އިރާނުގެ ފޮރިން މިނިސްޓްރީން ބުނެފި އެވެ.
މަޝްވަރާ ބައްދަލުވުންތައް ފެށުމުގެ ގޮތުން އިރާނުގެ ފޮރިން މިނިސްޓަރު މުހައްމަދު ޖަވާދު ޒާރިފް ވަނީ އެމެރިކާ ސިފައިން އަފްގާނިސްތާނުން ފައިބާފައި ވާތީ އެކަމަށް މަރުހަބާ ވިދާޅުވެފަ އެވެ.
"މިއަދު އަފްގާނިސްތާނުގެ ރައްޔިތުންނާއި ސިޔާސީ ލީޑަރުންނަށް ޖެހެނީ ގައުމުގެ ކުރިމަގަށްޓަކައި އުނދަގޫ ނިންމުންތަކެއް ނިންމަން،" އޭނާ ވިދާޅުވި އެވެ.
ތާލިބާނުންގެ ފަރާތުން މަޝްވަރާގައި ބައިވެރިވަނީ ޑެޕިއުޓީ ޗީފް ނެގޯޝިއޭޓަރު ޝޭރް މުހައްމަދު އައްބާސް ސްތަނިކްޒާއީ އެވެ. އަދި ސަރުކާރުގެ ފަރާތުން ބައިވެރިވަނީ ކުރީގެ ނައިބު ރައީސް ޔާނުސް ގާނޫނީ ކަމަށް އިރާނުގެ ފޮރިން މިނިސްޓްރީން ބުންޏެވެ.
ތާލިބާނުންގެ ތަރުޖަމާނު ޒަބީހުﷲ މުޖާހިދު ވަނީ އަފްގާން ސަރުކާރާއެކު ތެހްރާންގައި މަޝްވަރާ ކުރަމުންދާކަން އޭއެފްޕީއަށް ކަށަވަރުކޮށްދީފަ އެވެ.
އަފްގާނިސްތާނުގައި އެތައް މިލިއަން ރެފިއުޖީންނާއި ހިޖުރަކޮށްގެން އުޅޭ މަސައްކަތްތެރިން އިރާނުގައި ދިރިއުޅެ އެވެ. އެމެރިކާ ސިފައިން އަފްގާނިސްތާން ދޫކޮށް ދާ މި ދަނޑިވަޅުގައި އެ ގައުމުގެ ހާލަތު އިތުރަށް ގޯސްވާތީ އިރާނުން ކަންބޮޑުވެ އެވެ.
އެހެންވެ ފޮރިން މިނިސްޓަރު ޒާރިފް ގޮވާލެއްވީ ހަނގުރާމަ ކުރުން ހުއްޓާލުމަށް ފަހު މަޝްވަރާއަށް އިސްކަން ދިނުމަށެވެ. އަދި އަފްގާނިސްތާނުގެ ލީޑަރުންނާއި ސިޔާސީ ހަރަކާތްތަކަށް އޮތް އެންމެ ރަނގަޅު ގޮތަކީ "ސިޔާސީ ހައްލެއް" ކަމަށް ވިދާޅުވި އެވެ.
އެމެރިކާ އާއި އިރާނަކީ ދެ ހަތުރުން ނަމަވެސް، ސެޕްޓެމްބަރު 11، 2001 ގައި އަލް ގައިދާއިން އެމެރިކާއަށް ދިން ހަމަލާތަކަށް ފަހު ދެ ގައުމުން ގުޅިގެން ކުޑަ ދުވަސްކޮޅަކަށް މަސައްކަތް ކުރި އެވެ.
އިރާނުގައި މިހާރު ފަށާފައިވާ މަޝްވަރާތަކާ ގުޅޭ ގޮތުން އެމެރިކާ ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިޒް ވިދާޅުވީ އަފްގާނިސްތާނުގެ އަވައްޓެރިންނަށް އެ ގައުމުގައި ސުލްހަ ގާއިމްވެފައި އޮތުން މުހިއްމު ކަމަށެވެ.
"އަފްގާނިސްތާނުގެ އަވައްޓެރިން ޖެހެނީ ކުރިއެރުން ލިބޭ ފަދަ ދައުރެއް އަދާ ކުރަން. މި މަޝްވަރާތައް ފަށައިގެން އިރާނުން ކުރަން މަސައްކަތް ކުރަނީ އެފަދަ ކަމެއް ކަމަށް ވެދާނެ. އެކަމަކު އަޅުގަނޑުމެން ޖެހޭނީ ބަލަން ތިބެން،" އޭނާ ވިދާޅުވި އެވެ.
ސެޕްޓެމްބަރު 11 ކުރިން އެމެރިކާ ސިފައިން އަފްގާނުން ފޭބުމުގެ މަސައްކަތް ކުރާ މި ދަނޑިވަޅުގައި ތާލިބާނުން ވަނީ މުހިއްމު ބައެއް ސަރަހައްދުތަކުގެ ކޮންޓްރޯލް ހޯދާފަ އެވެ. އަފްގާން ސިފައިން ބުނީ ވަރުގަދަ ހަމަލާތަކެއް ދީގެން އެ ތަންތަން އަލުން ހޯދާނެ ކަމަށެވެ.
