ޖެނީވާ، ސްވިޓްޒަލޭންޑް (ޖުލައި 7) - ކޮވިޑް ޖެހިގެން މުޅި ދުނިޔެއިން މަރުވި މީހުންގެ ރަސްމީ އަދަދު ހަތަރު މިލިއަނަށް އަރާފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ޗައިނާއިން 2019 ގައި އެންމެ ފުރަތަމަ ފެނުނު މި ބަލި މުޅި ދުނިޔެއަށް ފެތުރި، މިހާތަނަށް ހަތަރު މިލިއަން މީހުން މަރުވެފައިވާކަން އިއުލާނު ކުރެއްވީ ޑަބްލިއުއެޗްއޯގެ ޗީފް ޓެޑްރޯސް އަދަނޮމް އެވެ.
ނަމަވެސް ނުރަސްމީ ގޮތުން ބަލާއިރު، މަރުވި މީހުންގެ އަދަދު އެތައް ގުނައެއް އިތުރުވާނެ ކަމަށް ޑަބްލިއުއެޗްއޯއިން ބުނެ އެވެ.
ޓެޑްރޯސް ވިދާޅުވީ ވެކްސިން ދިނުމުގައި ކާމިޔާބު ހޯދާފައިވާ ބައެއް ގައުމުތަކުން ލުއިދެމުން ދަނީ "ބަލިމަޑުކަން ނިމުނީ ކަމަށް ބަލައިގެން" ކަމަށާއި އޭގެ ނޭދެވޭ އަސަރު ކުރުމުގެ ފުރުސަތު ބޮޑު ކަމަށެވެ.
ނަމަވެސް މި ވައިރަހުގެ މުޅިން އާ ވޭރިއެންޓުތަކުގެ ސަބަބުން ގިނަ ބަޔަކު އެޑްމިޓު ކުރަން ޖެހޭ މަންޒަރު ގައުމުތަކުން ފެންނަމުންދާ ކަމަށް އޭނާ ވިދާޅުވި އެވެ.
"ބަލިމަޑުކަމުގައި މިހާ ހިސާބަށް އައިއިރު، ސިއްހީ މަސައްކަތްތެރިން ތެރެއިން އެތައް މިލިއަން ބަޔަކަށް ވެކްސިން ދެވިފައި ނުވުމަކީ ގަބޫލުކުރަން ވެސް ދަތި ހިތާމަވެރި ހަގީގަތެއް،" މުއްސަނދި ގައުމުތަކުން ވެކްސިނާ މެދު ގެންގުޅޭ އުސޫލަށް ފާޑުވިދާޅުވަމުން ޓެޑްރޯސް ވިދާޅުވި އެވެ.
އޭނާ ވިދާޅުވީ ވެކްސިން ފަހަތަށް ޖައްސާލައި، ވޭރިއެންޓުތަކުން ކުރި ހޯދަމުން ދަނީ އެއްވެސް ހަމަހަމަ ކަމެއް ނެތި ގައުމުތަކުން ވެކްސިން ޖެހުމުގެ ސަބަބުން ކަމަށެވެ.
