ނިއު ދިއްލީ، އިންޑިއާ (ޖުލައި 7) - ހެލްތު މިނިސްޓަރު ހިމެނޭ ގޮތަށް އިންޑިއާގެ 12 މިނިސްޓަރަކު އެއް ފަހަރާ މިއަދު އިސްތިއުފާ ދެއްވައިފި އެވެ.
މިއީ ހަތް ސްޓޭޓެއްގެ އިންތިހާބު އަންނަ އަހަރު ބާއްވަން ތައްޔާރުވަމުން ދާއިރު، ބޮޑު ވަޒީރު ނަރެންދްރަ މޯދީގެ ކެބިނެޓަށް ބޮޑެތި ބަދަލުތަކެއް ގެނައުމުގެ ބޭނުމުގައި ކުރި ކަމެކެވެ.
އިސްތިއުފާ ދެއްވި މިނިސްޓަރުންގެ ތެރެއިން އެންމެ ބޮޑު ޕްރެޝަރަކާ ކުރިމަތިލާން ޖެހިފައިވީ އުމުރުން 66 އަހަރު ހެލްތު މިނިސްޓަރު ހަރްޝް ވަރްދަން އަށެވެ.
އެއީ މިދިޔަ އޭޕްރިލް އަދި މޭ މަހު ކޮވިޑުގެ ދެ ވަނަ ރާޅުގެ ކޮންޓްރޯލް ދޫވެ، ހޮސްޕިޓަލްތައް ފުރި އޮކްސިޖަން ހުސްވުން ފަދަ އެތައް ކަމެއް ދިމާވެފައި ވާތީ އެވެ.
އޭގެ އިތުރުން ލޯ އެންޑް ޖަސްޓިސް އެންޑް އިންފޮމޭޝަން ޓެކްނޮލޮޖީ މިނިސްޓަރު ރަވީ ޝަންކަރް ޕްރަސާދް ވެސް ވަނީ އިސްތިއުފާ ދެއްވާފަ އެވެ.
ނަމަވެސް އުމުރުން 66 އަހަރުގެ ޕްރަސާދަކީ މޯދީއާ ގާތް ބޭފުޅަކަށް ވާތީ ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) ގެ މުހިއްމު ރޯލެއް އޭނާއަށް ދޭނެ ކަމަށް ބެލެވެ އެވެ.
ޕްރަސާދްގެ މައްސަލަ ހޫނުވީ އާ ގަވާއިދުތަކެއްގެ ދަށުން ބައިނަލްއަގްވާމީ ސޯޝަލް މީޑިއާ ކުންފުނިތަކަށް ފިއްތުންތައް ކުރިމަތި ކުރުވަމުން ދާތީ އެވެ.
އޭގެ އިތުރުން އެންވާރަމަންޓް، ފޮރެސްޓްސް އެންޑް ކްލައިމެޓް ޗޭން އަދި އިންފޮމޭޝަން، ބްރޯޑްކާސްޓިން އެންޑް ހެވީ އިންޑަސްޓްރީޒްގެ މިނިސްޓަރުކަން ކުރައްވާ ޕްރަކާޝް ޖާވަދޭކަރް އާއި އެޑިއުކޭޝަން މިނިސްޓަރު ރަމޭޝް ޕކްރިޔާލް ނިޝާންކް ވެސް އިސްތިއުފާ ދެއްވި އެވެ،
އަންނަ އަހަރު ހަތް ސްޓޭޓެއްގެ އިންތިހާބު ބާއްވަން ހަމަޖެހިފައި ވާއިރު، އޭގެ ތެރެއިން ހަ ސްޓޭޓުގެ ކޮންޓްރޯލް މި ވަގުތު އޮތީ ބީޖޭޕީ އަށެވެ.
މި އަހަރުގެ ކުރީކޮޅު ބޭއްވި އިންތިހާބުން މޯދީގެ ޕާޓީއަށް ވަނީ ވެސްޓް ބެންގޯލްގެ ކޮންޓްރޯލް ނުލިބިފަ އެވެ. އެނެލިސްޓުން ބުނާ ގޮތުގައި ކެބިނެޓަށް ބޮޑު ބަދަލެއް ގެންނަނީ މޯދީގެ ސަރުކާރަށް އޮތް ތާއީދު ކުޑަވަމުން ދާތީ އެކަން ހައްލު ކުރުމުގެ ގޮތުންނެވެ.
