ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއަށްފަހު ހައްޔަރުކުރި މީހުންގެ ތެރެއިން ތިން މީހަކު ކުރިމިނަލް ކޯޓުން ދޫކޮށްލާފައިވަނީ އިތުރަށް ބަންދުގައި ބަހައްޓަން ޖެހޭ މިންވަރަށް ހެކި ނެތުމުން ކަމަށް އެ ކޯޓުން ބުނެފި އެވެ.
ނަޝީދު ކާރުކޮޅަށް އަރާވަޑައިގަންނަވަނިކޮށް ބޮމެއް ގޮއްވާލައި ދިން ހަމަލާއަށްފަހު ފުލުހުންނާއި ސިފައިން ހިންގި އޮޕަރޭޝަނުގައި ހައްޔަރުކުރި ތިން މީހަކު ދޫކޮށްލާފައިވަނީ ކުރިމިނަލް ކޯޓުގެ ގާޒީ ހަސަން ސައީދު މިއަދު ނެރުއްވި އަމުރެއްގަ އެވެ. އެ އަމުރު ނެރުއްވާފައިވަނީ ފުލުހުން އެދިގެން، ސިއްރުކޮށްގެން ކުރިއަށް ގެންދިޔަ އަޑުއެހުމެއްގަ އެވެ.
ކުރިމިނަލް ކޯޓުގައި މީޑިއާ އޮފިޝަލް "އަދަދު"އަށް ވިދާޅުވި ގޮތުގައި، ތިން މީހުން ބަންދުން ދޫކޮށްލި ސަބަބެއް ކަމަށް އަމުރުގައި ބަޔާންކޮށްފައިވަނީ އެމީހުންގެ ބަންދަށް 40 ދުވަސްވެފައިވާއިރު، އެމީހުން ދެން އިތުރަށް ބަންދުގައި ބެހެއްޓޭ މިންވަރަށް ފުލުހުން ހެކި ހުށަހަޅާފައިނުވުމެވެ.
ނަމަވެސް، ޕްރޮސިކިއުޓާ ޖެނަރަލް ހުސެއިން ޝަމީމް މިއަދު "އަދަދު"އަށް ވިދާޅުވި ގޮތުގައި ތިން މީހުން ދޫކޮށްލާފައިވަނީ އެމީހުން ބަންދުކުރާ މިންވަރަށް ހެކި ލިބިފައިވަނިކޮށެވެ. އެހެންވެ، އެ އަމުރު ވީއެންމެ އަވަހަކަށް ހައިކޯޓުގައި އިސްތިއުނާފު ކުރުމަށް ހުށަހަޅުއްވާނެ ކަމަށް ޝަމީމް ވިދާޅުވި އެވެ.
ނަޝީދަށް އަމާޒުކޮށް ދިން ހަމަލާއަށްފަހު ހިންގި އޮޕަރޭޝަނުގައި މާލެ، ހުޅުމާލެ އަދި އައްޑޫން ބަޔަކު ހައްޔަރުކުރި އެވެ. އޭގެ ތެރެއިން ހަތަރު މީހަކަށް މިހާރު ވަނީ ހަމަލާއާ ގުޅުން އޮތް ކަމަށް ތުހުމަތުކޮށް ތަހުގީގު ފަށާފަ އެވެ.
ނަމަވެސް، މިއަދު ދޫކޮށްލި ތިން މީހުންގެ ތެރޭ ހަމަލާއާ ސީދާ ގުޅުން އޮތް ކަމަށް ތުހުމަތުވާ މީހަކު ނުހިމެނެ އެވެ.
ހަމަލާގެ ތަހުގީގާ ގުޅޭ ގޮތުން އެންމެ ފަހުން އާންމުކުރި މައުލޫމާތަށް ބަލާއިރު ޓެރަރިސްޓް ހަމަލާއާ ގުޅިގެން އަށް މީހެއްގެ މައްޗަށް ގެންދަނީ ތަހުގީގު ހިންގަމުންނެވެ. އޭގެ ތެރެއިން ފުލުހުން ވަނަވަރު ހާމަކޮށްފައިވާ މީހުންނަކީ، އަދުހަމް އަހުމަދާއި މުޖާޒް އަހުމަދާއި ތަހުމީން އަހުމަދު އާއި އަހުމަދު ފާތިހު އަދި އަލީ ހައިޝަމް އެވެ. އެމީހުން ތިބީ ބަންދުގަ އެވެ.
ހަރުކަށި ފިކުރު ފަތުރައި ޓެރަރިޒަމްގެ ތުހުމަތަށް އައްޑޫން ހައްޔަރުކުރި މީހުންގެ ތެރެއިން ވެސް ފަސް މީހަކު މީގެކުރިން ދޫކޮށްލި އެވެ. ނަމަވެސް، އެ އެންމެން އަލުން ހައްޔަރުކުރުމަށް ހައިކޯޓުން އެންގި އެވެ. އެގޮތަށް އަންގާފައިވަނިކޮށް އޭގެ ތެރެއިން އެކަކު ސުޕްރީމް ކޯޓަށް ދިޔުމުން އޭނާ ދޫކޮށްލުމަށް އަމުރުކުރި އެވެ. ނަމަވެސް، މިހާރު ފުލުހުން ވަނީ އެމީހާ އަލުން ހައްޔަރުކޮށްފަ އެވެ.
