ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއަށްފަހު ފުލުހުންނާއި ސިފައިން ހިންގި އޮޕަރޭޝަނުގައި ހައްޔަރުކުރި މީހުންގެ ތެރެއިން ތިން މީހަކު މިއަދު ކުރިމިނަލް ކޯޓުން ދޫކޮށްލައިފި އެވެ.
ކުރިމިނަލް ކޯޓުގެ ގާޒީ ހަސަން ސައީދު ނެރުއްވި އަމުރަކުން ދޫކޮށްލާފައިވަނީ ހަރުކަށި ފިކުރު ފަތުރައި، ޓެރަރިޒަމްގެ ތުހުމަތުވާ ބައެކެވެ.
މި ތިން މީހުން ދޫކޮށްލަން ކުރިމިނަލް ކޯޓުން އަމުރުކުރީ ކޮން ސަބަބަކާ ހުރެ ކަމެއް ސާފެއް ނުވެ އެވެ. ކުރިމިނަލް ކޯޓުން ފޯނަށް ޖަވާބު ނުދޭއިރު އަމުރު އާންމުކޮށްފައެއް ނުވެ އެވެ.
ޕްރޮސިކިއުޓާ ޖެނަރަލް ޝަމީމް ވިދާޅުވި ގޮތުގައި ކުރިމިނަލް ކޯޓުން އެ އަމުރު ނެރުނުތާ ދެ ގަޑިއިރު ވެފައިވާއިރު މިހާތަނަށް އެ އޮފީހަށް އަމުރު ލިބިފައިނުވެ އެވެ.
ނަމަވެސް، އެ ތިން މީހުން ދޫކޮށްލާފައިވަނީ އެމީހުން ބަންދުކުރާ މިންވަރަށް ހެކި ލިބިފައިވަނިކޮށް ކަމަށެވެ. އެހެންވެ، އެ އަމުރު ވީއެންމެ އަވަހަކަށް ހައިކޯޓުގައި އިސްތިއުނާފު ކުރުމަށް ހުށަހަޅުއްވާނެ ކަމަށް ޝަމީމް ވިދާޅުވި އެވެ.
ނަޝީދަށް އަމާޒުކޮށް ދިން ހަމަލާއަށްފަހު ހިންގި އޮޕަރޭޝަނުގައި މާލެ، ހުޅުމާލެ އަދި އައްޑޫން ބަޔަކު ހައްޔަރުކުރި އެވެ. އޭގެ ތެރެއިން ހަތަރު މީހަކަށް މިހާރު ވަނީ ހަމަލާއާ ގުޅުން އޮތް ކަމަށް ތުހުމަތުކޮށް ތަހުގީގު ފަށާފަ އެވެ.
ނަމަވެސް، މިއަދު ދޫކޮށްލި ތިން މީހުންގެ ތެރޭ ހަމަލާއާ ސީދާ ގުޅުން އޮތް ކަމަށް ތުހުމަތުވާ މީހަކު ނުހިމެނެ އެވެ.
ހަމަލާގެ ތަހުގީގާ ގުޅޭ ގޮތުން އެންމެ ފަހުން އާންމުކުރި މައުލޫމާތަށް ބަލާއިރު ޓެރަރިސްޓް ހަމަލާއާ ގުޅިގެން އަށް މީހެއްގެ މައްޗަށް ގެންދަނީ ތަހުގީގު ހިންގަމުންނެވެ. އޭގެ ތެރެއިން ފުލުހުން ވަނަވަރު ހާމަކޮށްފައިވާ މީހުންނަކީ، އަދުހަމް އަހުމަދާއި މުޖާޒް އަހުމަދާއި ތަހުމީން އަހުމަދު އާއި އަހުމަދު ފާތިހު އަދި އަލީ ހައިޝަމް އެވެ. އެމީހުން ތިބީ ބަންދުގަ އެވެ.
ހަރުކަށި ފިކުރު ފަތުރައި ޓެރަރިޒަމްގެ ތުހުމަތަށް އައްޑޫން ހައްޔަރުކުރި މީހުންގެ ތެރެއިން ވެސް ފަސް މީހަކު މީގެކުރިން ދޫކޮށްލި އެވެ. ނަމަވެސް، އެ އެންމެން އަލުން ހައްޔަރުކުރުމަށް ހައިކޯޓުން އެންގި އެވެ. އެގޮތަށް އަންގާފައިވަނިކޮށް އޭގެ ތެރެއިން އެކަކު ސުޕްރީމް ކޯޓަށް ދިޔުމުން އޭނާ ދޫކޮށްލުމަށް އަމުރުކުރި އެވެ. ނަމަވެސް، މިހާރު ފުލުހުން ވަނީ އެމީހާ އަލުން ހައްޔަރުކޮށްފަ އެވެ.
އެޓިޓަރުގެ ނޯޓު:
ކުރިމިނަލް ކޯޓުން މިއަދު ދޫކޮށްލީ ނަޝީދަށް އަމާޒުކޮށް ދިން ހަމަލާއާ ސީދާ ތުހުމަތުވާ ބައެއް ކަމަށް މީގެކުރިން ލިޔެފައިވަނީ މައުލޫމާތުގެ ކުށަކުންނެވެ. ހަބަރު މިވަނީ އެވަނީ އިސްލާހު ކުރެވިފަ އެވެ.
