މިދިޔަ ޖެނުއަރީގައި ރާއްޖެއިން ގިނަ އަދަދެއްގެ މިޔަރު އުރަހަތަކެއް ބޭރުކުރަން އުޅުނު ބަޔަކަށް ދައުވާކޮށްފި އެވެ.
މި މައްސަލާގައި ދައުވާކޮށްފައިވަނީ ހދ. ކުޅުދުއްފުށި، ކިރުދޫނިގެ، އަހުމަދު މުހައްމަދާއި މ. ސެންޓްރޯސެމާ، އައްބާސް އަބްދުﷲގެ މައްޗަށެވެ.
ދެ މީހުންގެ މައްޗަށް އުފުލާފައިވަނީ އޮޅުވާލުމުގެ އަމަލެއްކުރުމުގެ ދައުވާ އާއި ަސްމީ އިދާރާއަކަށް ދޮގު މައުލޫމާތު ދިނުމުގެ ދައުވާ އެވެ.
ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވި ގޮތުގައި، އެކަމުގައި ބައިވެރިވާ އެހެން މީހުން ހޯދުމަށް ތަހުގީގެއް ވަނީ ފަށާފަ އެވެ.
ރާއްޖެއިން ވަގަށް ބޭރުކުރަން އުޅެނިކޮށް މިދިޔަ ޖެނުއަރީ މަހު ހިފަހައްޓާފައި ވަނީ 21 ފޮށި ގަނޑުގައި ބަންދުކޮށްފައި ހުރި 429 ކިލޯގެ މިޔަރު އުރަހަ އެވެ. އޭގެ ތެރޭގައި ލޮނު އެޅި މިޔަރު މަސް ވެސް ހުއްޓެވެ.
މިދިޔަ މާޗު މަހުގެ ތެރޭގައި އދ. މަންދޫ ކައިރީގައި މިޔަރު މަސްވެރިކަން ކުރަމުންދިޔަ ހަތަރު މީހަކު މަސްވެރިކަން ކުރި އޮޑިއާއެކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. އެ ދޯނި ބަލާ ފާސްކުރި އިރު ދޯނި ތެރެއިން މިޔަރާއި މިޔަރު އުރަހަ އަދި ލޮނު އަޅާފައި ހުރި މިޔަރު މަސް ފެނުނެވެ.
އެ މައްސަލާގައި ދައުވާކޮށް ދިނުމަށް އެދި ވެސް ޕްރޮސިކިއުޓާ ޖެނަރަލްގެ އޮފީހަށް ވަނީ ފޮނުވާފަ އެވެ.
