ކުރީގެ ޓޫރިޒަމް މިނިސްޓަރު އަލީ ވަހީދު، ބަންދުކޮށްގެން ހައިކޯޓަށް ހާޒިރުކޮށްގެން ނަމަވެސް ޝަރީއަތް ކުރިއަށް ގެންގޮސްދޭން މިއަދު ޕްރޮސިކިއުޓާ ޖެނަރަލްގެ އޮފީހުން އެދިއްޖެ އެވެ.
ޖިންސީ ގޯނާގެ ދައުވާތަކެއް އުފުލާފައިވާ އަލީ ވަހީދުގެ ޝަރީއަތް ކުރިމިނަލް ކޯޓުގައި އޮންލައިންކޮށް ކުރިއަށް ގެންގޮސް، އަލީ ވަހީދަށް އިނގިރޭސިވިލާތުގައި ހުރެގެން އެ ޝަރީއަތުގައި ބައިވެރިވެވޭނެ ގޮތް ކުރިމިނަލް ކޯޓުން ވަނީ ހަމަޖައްސާފަ އެވެ.
ނަމަވެސް، ރާއްޖޭގެ ގާނޫނުތައް ނުހިނގާ ސަރަަހައްދެއްގައި ދައުވާ ލިބޭ މީހާ ހުރެގެން ޝަރީއަތް ކުރިއަށް ނުގެންދެވޭނެ ޕްރޮސިކިއުޓާ ޖެނަރަލްގެ އޮފީހުން ގަބޫލުކުރާތީ، އެ ނިންމުން ވަނީ ހައިކޯޓުގައި އިސްތިއުނާފުކޮށްފަ އެވެ.
އެ މައްސަލާގެ ޝަރީއަތް މިއަދު ހައިކޯޓުގައި ފެށި އެވެ. ޝަރީއަތުގެ އަޑުއެހުން ކުރިއަށް ގެންގޮސްފައިވަނީ ނޫސްވެރިން ނުވައްދަ އެވެ. ނޫސްވެރިން ގިނަ އިރުތަކެއް ވަންދެން މަޑުކޮށްގެން ބޭއްތިބުމަށްފަހު ކޯޓުން އެންގީ އަޑުއެހުން ކެންސަލްވި ކަމެވެ.
ނަމަވެސް، ފަހުން ކޯޓުން ވަނީ އަލީ ވަހީދު މައްސަލާގެ އަޑުއެހުން ކެންސަލް ނުވާ ކަމަށާއި އަޑުއެހުން ކުރިއަށް ގެންދެވުނީ ނޫސްވެރިން ނުވައްދާ ކަމަށް ބުނެ މާފަށް އެދިފަ އެވެ. އަދި، މިހާރު ވަނީ މެންދުރުފަހު އެ ކޯޓުގައި ކުރިއަށް ގެންދިޔަ އަޑުއެހުމުގެ ރެކޯޑިން ޔޫޓިއުބަށް ލާފަ އެވެ.
އެ އަޑުއެހުމުގައި ފަނޑިޔާރުން ޕްރޮސިކިއުޓާ ޖެނަރަލްގެ އޮފީހަށް ސުވާލުތައް އަމާޒުކޮށްފައިވަނީ އެ މައްސަލަ ކުރިއަށް ގެންދާނެ ގޮތަމާމެދު އެވެ. އެގޮތުން، ފަނޑިޔާރުން ވަނީ ހައިކޯޓުގައި އެ މައްސަލަ އަލީ ވަހީދުގެ ޣައިރު ހާޒިރުގައި ކުރިއަށް ގެންދެވިދާނެތޯ ނުވަތަ އޮންލައިންކޮށް ކުރިއަށް ގެންދެވިދާނެތޯ ސުވާލު ކުރައްވާފަ އެވެ.
ޕްރޮސިކިއުޓާ ޖެނަރަލްގެ އޮފީހުގެ ވަކީލް ވިދާޅުވި ގޮތުގައި، މައްސަލައަކީ އަލީ ވަހީދުގެ ޝަރީއަތް ކުރިއަށް ގެންދާ ގޮތާމެދު ހިޔާލު ތަފާތު އޮތް މައްސަލައަކަށްވާތީ، އޭނާއަށް ޖަވާބުދާރީނުވެވޭ ގޮތަކަށް އަޑުއެހުންތައް ކުރިއަށް ނުގެންދެވޭނެ އެވެ. އެހެންކަމުން އަލީ ވަހީދުގެ ޣައިރު ހާޒިރުގައި މައްސަލަ ކުރިއަށް ނުގެންދެވޭނެ ކަމަށް ވިދާޅުވި އެވެ.
އަދި، ރާއްޖޭން ބޭރުގައި ހުރެގެން އަޑުއެހުންތަކުގައި ދައުވާ ލިބޭ ފަރާތަކުން ބައިވެރިވުމަކީ ގާނޫނާ ހިލާފު ކަމެއް ކަމަށް ވަކީލް ވިދާޅުވި އެވެ.
ދެން ފަނޑިޔާރުން އޮޅުންފިލުވީ، މައްސަލައަށް ފަރުވާ އެވެ. ހައިކޯޓުން އަމަލު ކުރާނެ ގޮތެއް ގާނޫނުތަކުގެ އަލީގައި ބުނެދިނުމަށް ފަނޑިޔާރުން އެދިވަޑައިގެންނެވި އެވެ.
ވަކީލް ސުވާލަށް ޖަވާބު ދެއްވަމުން ވިދާޅުވީ މީހުން ޝަރީއަތަށް ހާޒިރުކުރުމަކީ ކޯޓުތަކަށް ލިބިގެންވާ ބާރެއް ކަމަށާއި އެކަމުގައި އަމަލުކުރާނެ އުސޫލުތައް އެބަހުރި ކަމަށެވެ. އެންމެ ފުރަތަމަ ޗިޓް ފޮނުވައިގެން ހާޒިރު ކުރަން މަސައްކަތް ކުރެވިދާނެ ކަމަށާއި، އެގޮތުން ހާޒިރު ނުވެއްޖެނަމަ، އެންމެ މަސްލަހަތު ހުރި ގޮތަކީ އެމީހަކު ބަންދުކޮށްގެން ހާޒިރުވާން އެންގުން ކަމަށެވެ.
ހައިކޯޓުގައި ޕްރޮސިކިއުޓާ ޖެނަރަލްގެ ވަކީލް ވިދާޅުވި ގޮތުގައި، މި މައްސަލާގައި އަލީ ވަހީދު ބަންދުކޮށްގެން ކޯޓަށް ހާޒިރުކޮށްދިނުމަށް އެދި ފުލުހުންގެ މައްޗަށް އަމުރެއް ހައިކޯޓަށް ނެރެވިދާނެ އެވެ. ދެން އޮތް ގޮތަކީ އޭނާގެ ޕާސްޕޯޓް ހިފެހެއްޓުން ކަމަށާއި ނަމަވެސް، އެފަދަ އަމުރެއް ވެސް ކުރިމިނަލް ކޯޓުން ނުލިބުންކަން ވަކީލް ފާހަގަ ކުރެއްވި އެވެ.
އަލީ ވަހީދު ހާޒިރުކުރާނެ ގޮތެއް ފަނޑިޔާރުން އޮޅުންފިލުވަމުން ގެންދެވިއިރު، މި ބާވަތުގެ މައްސަލަތަކަކީ އިސްތިއުނާފަށް ހުށަހަޅާތާ ހަތް ދުވަސް ތެރޭ ނިންމަން ޖެހޭނެ މައްސަލައެއްކަން ވެސް ވަކީލް ފާހަގަ ކުރެއްވި އެވެ.
ފަނޑިޔާރުންގެ މިއަދުގެ އަޑުއެހުން ނިންމާލެއްވީ، ދެން މި މައްސަލާގެ އަމަލު ކުރާނެ ގޮތެއް ވަރަށް އަވަހަށް ދައުލަތާ ހިއްސާ ކުރައްވާނެ ކަމަށް ވިދާޅުވުމަށްފަހު އެވެ.
ގިނަ ދައުވާތަކެއް އުފުލާފައިވާ އަލީ ވަހީދަށް ބޭރަށް ފުރާވަޑައިގެންނެވުނީ އޭނާގެ ޕާސްޕޯޓް ކްރިމިނަލް ކޯޓުން ދޫކޮށްލުމުންނެވެ. ދައުލަތުން ޓްރެވަލް ޑޮކިއުމެންޓެއްގައި ވަކި މުއްދަތަކަށް ހުއްދަ ދޭން އެދިފައި އޮއްވައި އަޑުއެހުމަށް އައިޖީއެމްއެޗުގެ ކަށީގެ ޑޮކްޓަރު ޔޫސުފް ޝާން ހާޒިރުކޮށް، ކޯޓުން އަލީވަހީދުގެ ޕާސްޕޯޓް ދޫކޮށްލީ ރާއްޖެ އިން އޭނާގެ އޮޕަރޭޝަން ކުރުމުގެ ރިސްކު ބޮޑު ކަމަށް ނިންމަ އެވެ.
ލަންޑަނުގައި ހުންނަވައިގެން ކުރިމިނަލް ކޯޓުގައި ކުރިއަށްދާ ޝަރީއަތުގައި އަލީ ވަހީދަށް ބައިވެރިވެވޭނެ އިންތިޒާމް އެ ކޯޓުން ހަމަޖައްސައިދީފައިވަނީ އޭނާގެ ބޭސްފަރުވާގެ ކަންކަން ނުނިމޭ ކަމަށް ބުނެ އެވެ. ނަމަވެސް، "އަދަދު"އަށް ކަށަވަރުވެފައިވާ ގޮތުގައި އަލީ ވަހީދުގެ ބޭސްފަރުވާގެ އެއްވެސް ކަމެއް މިވަގުތު ނުހިނގަ އެވެ.
އަލީ ވަހީދު ކޯޓަށް ފޮނުވާފައިވަނީ އިނގިރޭސިވިލާތުގެ ޝާލީ ވިލެޖްގެ އަމިއްލަ ހޮސްޕިޓަލެއް ކަމަށްވާ ޝާލީ އޯކްސް ހޮސްޕިޓަލުން ދޫކޮށްފައިވާ ލިޔުމެކެވެ.
އެ ލިޔުމުގައިވާ ގޮތުން މައިބަދައިގައި ރިއްސާތީ، އަލީ ވަހީދު ދެ ފަހަރެއްގެ މަތިން އެ ކްލިނިކަށް ދައްކާފައިވެ އެވެ. އަދި އެތަނުން އޭނާގެ އެމްއާރްއައި ވެސް ހަދާފައިވާ ކަމަށެވެ. އެ ލިއުމުން އެނގޭ ގޮތުގައި ބޭރަށް ވަޑައިގަތް ފަހުން އޭނާ މައިބަދައިގެ ސާޖަރީއެއް ކުރައްވައިފައެއް ނުވެ އެވެ. އަދި އެފަދަ ސާޖަރީއެއް ކުރަން އެ ލިއުމުގައި ޑޮކްޓަރުން ލަފާދެއްވައިފައެއް ވެސް ނުވެ އެވެ.
ޑޮކްޓަރުން ލަފާދެއްވީ އަލީ ވަހީދަށް ކަރަސްތުކުރުމަށާއި އެކަން މެދުނުކެނޑި ކުރިއަށް ގެންދެވުމަށެވެ.
އެކަމަކު ހަ މަސް ފަހުން އިތުރު ޓެސްޓްތަކަކާއި އެސެސްމެންޓްތަކެއް ކުރިއަށް ގެންދަން މިދިޔަ މާޗް މަހުގެ 25 ގައި ދޫކުރި އެ ލިއުމުގައި ޑޮކްޓަރުން ލަފާ ދީފައިވެ އެވެ.
