ވެލިންގްޓަން، ނިއުޒީލޭންޑް (ޖުލައި 6) - މިދިޔަ ޖޫން މަހަކީ މިހާތަނަށް ނިއުޒީލޭންޑުގައި އެންމެ ހޫނުގަދަވި ޖޫން މަހުގެ ގޮތުގައި ރިކޯޑު ކުރެވިފައިވާ ކަމަށް ސަރުކާރުގެ ސައިންޓިފިކް އެޖެންސީއަކުން ބުނެފި އެވެ.
ނޭޝަނަލް އިންސްޓިޓިއުޓް އޮފް ވޯޓާ އެންޑް އެޓްމޮސްފެރިކް ރިސާޗް (ނިވާ) އިން ބުނީ ޖޫން މަހަކީ އާއްމުކޮށް ފިނި މަހެއް ނަމަވެސް، އެވްރެޖްކޮށް ކޮންމެ ދުވަހަކު ވެސް ފިނިހޫނުމިން ހުރީ 10.6 ޑިގްރީ ސެލްސިއަސްގައި ކަމަށެވެ. މިއީ އެހެން އަހަރުތަކާ އަޅާ ބަލާއިރު 1.9 ޑިގްރީ ސެލްސިއަސް މައްޗެވެ.
"މިއީ ވަރަށް ބޮޑު ކަމެއް. 1909 ވަނަ އަހަރަށް ފަހު މިކަހަލަ ބޮޑު ތަފާތެއް ފެނިފައި ވަނީ އެންމެ 13 ފަހަރު،" ނިވާގެ ސައިންޓިސްޓް ކްރިސް ބްރެންޑޮލީނޯ ޕަބްލިކް ރޭޑިއޯއަށް ވިދާޅުވި އެވެ.
"އެންމެ ކަންބޮޑުވާން ޖެހޭ ކަމަކީ ފާއިތުވި 10 އަހަރުގެ ތެރޭގައި މިފަދަ ގޮތަކަށް ފިނިހޫނުމިން އުފުލިފައި އެބަދޭ ހަ ފަހަރުގެ މަތިން."
ބްރެންޑޮލީނޯ ވިދާޅުވީ ކުރު ރާސްތާގެ ބައެއް ގުދުރަތީ ކަންކަން ކަމުގައިވާ ކަނޑުގެ ފިނިހޫނުމިން މަތިވުމުގެ ސަބަބުން ނިއުޒީލޭންޑުގެ މަތީގައިވާ ވައި ހޫނުވުމަށް މަގުފަހިވި ކަމަށެވެ. ނަމަވެސް މީގެ ފަހަތުގައިވާ ހަގީގީ ސަބަބަކީ މޫސުމީ ބަދަލު ކަމަށް އޭނާ ފާހަގަކުރެއްވި އެވެ.
މިދިޔަ އަހަރަކީ ނިއުޒީލޭންޑުގައި މިހާތަނަށް ރިކޯޑު ކުރި ހަތް ވަނައަށް އެންމެ ހޫނުގަދަ އަހަރެވެ. ބޮޑު ވަޒީރު ޔެސިންދާ އާޑޭން މިދިޔަ އަހަރު ވަނީ "ކްލައިމެޓް އެމެޖެންސީ" އިއުލާނު ކުރައްވާފަ އެވެ.
ނިއުޒީލޭންޑުން މަސައްކަތް ކުރަމުން ދަނީ 2050 ގެ ކުރިން ކާބަން ނިޔުޓްރަލް ލަނޑުދަނޑިއަށް ވާސިލްވުމަށެވެ. އަދި 2035 ގެ ކުރިން އެ ގައުމުން ބޭނުން ކުރާ ހުރިހާ ހަކަތައެއް އިއާދަކުރަނިވި ގޮތްތަކުން އުފައްދަން ވަނީ ލަނޑުދަނޑި ކަނޑައަޅާފަ އެވެ.
