ކަޑޫނާ، ނައިޖީރިއާ (ޖުލައި 6) - ނައިޖީރިއާގައި ހުޅަނގު އުތުރުގައި ހުންނަ ބޯޑިން ސްކޫލަކުން 140 ދަރިވަރުން ރަހީނުކޮށްފި އެވެ.
ފަހަކަށް އައިސް ނައިޖީރިއާގައި ސްކޫލް ދަރިވަރުން ރަހީނު ކުރުމުގެ އަމަލުތައް ވަނީ އިތުރުވެފަ އެވެ. އެ އަމަލު ހިންގަނީ ހަތިޔާރު އަޅައިގެން އުޅޭ ގްރޫޕުތަކުންނެވެ.
ހޯމަ ދުވަހު ކަޑޫނާ ސްޓޭޓުގެ ބެތެލް ބެޕްޓިސްޓް ހައި ސްކޫލްގެ ފެންސު ހަލާކުކޮށްލައިގެން އެ ތަނަށް ވަދެ، 165 ދަރިވަރަކު ގެންގޮސްފައި ވެ އެވެ.
"ރަހީނު ކުރެވިފައި ވަނީ 140 ކުދިން. ގެންދިޔަ ކުދިންގެ ތެރެއިން 25 ކުދިން ފިލައިގެން ސަލާމަތްވީ. ކުދިންތައް ރަހީނުކޮށްގެން ގެންދިޔާ ތަނެއް ވެސް ނޭނގޭ،" އެ ސްކޫލުގެ ޓީޗަރެއް ކަމަށްވާ އިމޭނުއެލް ޕައުލް އޭއެފްޕީއަށް ބުންޏެވެ.
ކަޑޫނާ ސްޓޭޓް ފުލުހުންގެ ތަރުޖަމާނު މުހައްމަދު ޖަލީގޭ ވިދާޅުވީ ކުދިންތަކެއް ރަހީނު ކުރި ނަމަވެސް ގެންދިޔަ ކުދިންގެ އަދަދު ޔަގީން ނުކުރެވޭ ކަމަށެވެ.
"ޓެކްޓިކަލް ފުލުހުންގެ ޓީމުތައް ވަނީ އެ މީހުންގެ ފަހަތުން ގޮސްފައި. އަޅުގަނޑުމެންގެ ރެސްކިއު މަސައްކަތް އަދިވެސް ދަނީ ކުރިއަށް،" އޭނާ ވިދާޅުވި އެވެ.
މިދިޔަ އަހަރުގެ ޑިސެމްބަރު މަހުން ފެށިގެން ނައިޖީރިއާގައި ވަނީ 1000 ކުދިން ރަހީނުކޮށްފަ އެވެ. މަޝްވަރާތަކަށް ފަހު ގިނަ ކުދިން ދޫކޮށްލި ނަމަވެސް، އަދިވެސް ބައެއް ކުދިން ތިބީ ރަހީނުކޮށްފަ އެވެ.
