ގުޅީފަޅު ހިއްކުން ލަސްވުމުގެ ސަބަބުން އެމްޑަބްލިއުއެސްސީއަށް ބަދަލު ދޭން އަންގައި ކޮށްފައިވާ ހުކުމް ތަންފީޒުކުރުން މަޑުޖައްސާލަން ސުޕްރީމް ކޯޓުން އަމުރުކޮށްފި އެވެ.
އެމްޑަބްލިއުއެސްސީއަށް 2.4 މިލިއަން ޑޮލަރު ދައްކަން ސިވިލް ކޯޓުން 2017 ވަނަ އަހަރު ހުކުމްކުރީ ގްލޯބަލް ޕްރޮޖެކްޓްސް ޑިވެލޮޕްމަންޓް (ޖީޕީޑީ)ގެ މައްޗަށެވެ.
އެއީ، ގުޅީފަޅުގެ ހަ ހެކްޓަރު ބިން ހިއްކައި ތޮށިލުމުގެ މަސައްކަތް އެމްޑަބްލިއުއެސްސީން ޖީޕީޑީއާ ހަވާލުކުރި މުއްދަތުގެ ތެރޭ އެ މަސައްކަތް ނިންމާފައި ނެތުމުންނެވެ.
ސިވިލް ކޯޓުން ކުރި ހުކުމް ޖީޕީޑީން ހައިކޯޓުގައި އިސްތިއުނާފުކުރުމުން މިދިޔަ ފެބުރުއަރީ މަހު އެ ކޯޓުން ވެސް ވެސް ތާއިދުކުރީ ސިވިލް ކޯޓުގެ ހުކުމަށެވެ.
އެހެންވެ، ޖީޕީޑީން ސުޕްރީމް ކޯޓަށް މައްސަލަ ހުށަހެޅި އެވެ.
އެ މައްސަލާގައި އިއްޔެ ސުޕްރީމް ކޯޓުން ނެރުނު އަމުރެއްގައި ބުނެފައިވަނީ ޖީޕީޑީން ހުށަހަޅާފައިވާ ކަންކަމަށް ބަލާ، މި ވަގުތަށް އެންމެ ރަނގަޅު ގޮތަކީ ހައިކޯޓުގެ ހުކުމް ތަންފީޒުނުކޮށް މަޑުޖައްސާލުމެވެ.
އެހެންވެ ސުޕްރީމް ކޯޓުގައި މައްސަލާގައި ގޮތެއް ކަނޑައެޅެންދެން ހުކުމް ތަންފީޒުނުކުރުމަށް އެ އަމުރުގައި އެންގި އެވެ.
އެ އަމުރު ނެރެފައިމިވަނީ އެމްޑަބްލިއުއެސްސީން ހައިކޯޓުގެ ހުކުމް ތަންފީޒުކުރުމަށް ވަކި މައްސަލައެއް ސިވިލް ކޯޓަށް ހުށަހަޅާފައިވަނިކޮށެވެ.
