މާސޭ، ފްރާންސް (ޖުލައި 5) - މީހުން ސަލާމަތް ކުރަން އުޅޭ މަނަވަރު، އޯޝަން ވައިކިންގް އިން މަދު ދުވަސްކޮޅެއްގެ ތެރޭގައި މެޑިޓެރޭނިއަން ކަނޑުން 203 މީހުން ސަލާމަތްކޮށްފި އެވެ.
މަނަވަރު އޮޕަރޭޓް ކުރާ އެސްއޯއެސް މެޑިޓެރޭނީން ބުނީ ކަނޑުމަގުން ހިޖުރަ ކުރަން އުޅެނިކޮށް ސަލާމަތް ކުރި މީހުންގެ ތެރޭގައި 67 ކުޑަކުދިން ވެސް ހިމެނޭ ކަމަށެވެ.
އެ މީހުންނަކީ މިސްރު، ގެމްބިއާ، ލީބިޔާ، ދެކުނު ސޫދާން، ސީރިއާ އަދި ޓިއުނީޝިއާއަށް ނިސްބަތްވާ ރައްޔިތުން ކަމަށް އެސްއޯއެސް މެޑިޓެރޭނީން ކުރި ޓްވީޓެއްގައި ބުންޏެވެ.
މީހުން ސަލާމަތް ކުރުމަށް މިދިޔަ ބުރާސްފަތި ދުވަހުން ފެށިގެން މަނަވަރުން ވަނީ ހަތަރު އޮޕަރޭޝަނެއް ހިންގާފަ އެވެ. އެގޮތުން އިއްޔެ ހިންގި އޮޕަރޭޝަނެއްގައި މޯލްޓާ ކައިރިން ފުރިފައިވާ ކުޑަ ބޯޓެއްގައި ފިތިގެން ތިބި 71 މީހަކު ސަލާމަތް ކުރި އެވެ. އެ ބޯޓު ލީބިޔާއިން ފުރީ ތިން ދުވަސް ކުރިންނެވެ.
"ބޯޓުގައި ތިބި މީހުންގެ ކާބޯތަކެއްޗާއި ފެން ހުސްވެ، ހާލުގައި ޖެހުމުން ސަލާމަތް ކުރިއިރު، މަނަވަރަށް އުފުލަން ޖެހުނީ ސްޓްރެޗަރު ބޭނުންކޮށްގެން،" އެސްއޯއެސް މެޑިޓެރޭނީން ބުންޏެވެ.
އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) ގެ ތަފާސްހިސާބުން ދައްކާ ގޮތުގައި މި އަހަރުގެ ތެރޭގައި މެޑިޓެރޭނިއަން ކަނޑު ހުރަސްކޮށް ޔޫރަޕަށް ހިޖުރަ ކުރުން އުޅުނު 886 މީހަކު މަރުވެފައި ވެ އެވެ.
މިދިޔަ ހަފްތާގައި ވެސް މެޑިޓެރޭނިއަން ކަނޑު ހުރަސްކޮށް ލީބިޔާއިން ޔޫރަޕަށް ހިޖުރަ ކުރަން މަސައްކަތް ކުރި 178 މީހުން ޓިއުނީޝިއާގެ ކަނޑުގެ ސިފައިން ސަލާމަތްކުރި އެވެ.
ޓިއުނީޝިއާގެ ދެކުނު އައްސޭރިފަށާ ދިމާލުން ހިންގި ތިން އޮޕަރޭޝަނެއްގައި ކަނޑު މަތިން 178 މީހަކު ސަލާމަތް ކުރިއިރު މަރުވެފައިވާ ދެ މީހެއްގެ ހަށިގަނޑު ވެސް ފެނިފައި ވެ އެވެ.
އޭގެ ކުރީ ހަފްތާގައި ވެސް ޓިއުނީޝިއާއިން ވަނީ ހިޖުރަ ކުރަން ތައްޔާރުވެގެން ތިބި 267 މީހުން ހުއްޓުވާފަ އެވެ. އޭގެ ތެރޭގައި ގިނައިން ހިމެނެނީ ބަންގްލަދޭޝް މީހުން ކަމަށް އައިއޯއެމް އިން ބުނެ އެވެ.
އައިއޯއެމް އިން ބުނެފައި ވަނީ މީހުން ހިޖުރަ ކުރަން ކުރާ މަސައްކަތް އިތުރުވެފައިވާ ކަމަށެވެ. އެގޮތުން ޖެނުއަރީ އިން އޭޕްރިލް މަހުގެ ނިޔަލަށް 11،000 ދަތުރު ލީބިޔާއިން ފަށާފައި ވެ އެވެ. މިއީ މިދިޔަ އަހަރުގެ އެ މުއްދަތާ އަޅާ ބަލާއިރު 70 ޕަސެންޓު އިތުރު އަދަދެކެވެ.
