ޖިންސީ ގޯނާގެ ތުހުމަތުތަކެއް އުފުލިފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓާނެ ސަބަބެއް ނެތް ކަމަށް ކްރިމިނަލް ކޯޓުން ނިންމައިފި އެވެ.
އަލީ ވަހީދުގެ މައްސަލާގައި އެންމެ ފުރަތަމަ ވެސް ކްރިމިނަލް ކޯޓުގެ އަމުރެއްގެ ދަށުން އަލީ ވަހީދުގެ ޕާސްޕޯޓް ހިފެހެއްޓި އެވެ. ނަމަވެސް، އަލީ ވަހީދު ބޭސްފަރުވާއަށް ރާއްޖޭން ބޭރަށް ދިޔުމުގެ ހުއްދަދީ، ކުރިމިނަލް ކޯޓުން އެ އަމުރު ފަހުން ބާތިލުކުރި އެވެ.
އެ އަމުރު ބާތިލުކޮށް، އަލީ ވަހީދަށް ރާއްޖޭން ބޭރަށް ދެވޭ ގޮތް ހެދީ އޭނާގެ މައްޗަށް ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ޖާމިނުވެގެންނެވެ. ޖާމިނު އެއްބަސްވުން ހެދީ ހަތަރު މަހެވެ. އެ މުއްދަތު މިދިޔަ މަހުގެ ނުވަ ވަނަ ދުވަހަށް ވަނީ ހަމަވެފަ އެވެ.
އޭގެފަހުން ވެސް އަލީ ވަހީދު ރާއްޖެ ވަޑައިގެންފައިނުވާތީ ފުލުހުން މެދުވެރިކޮށް އަލީ ވަހީދުގެ ޕާސްޕޯޓް އަލުން ހިފެހެއްޓުމަށް މީގެ ހަފުތާއެއް ކުރިން ޕްރޮސިކިއުޓާ ޖެނަރަލްގެ އޮފީހުން އެދުނެވެ.
ޕްރޮސިކިއުޓާ ޖެނަރަލް ހުސެއިން ޝަމީމް މިއަދު އޭނާގެ ބްލޮގްގައި ވިދާޅުވި ގޮތުގައި، ކުރިމިނަލް ކޯޓުން ވަނީ އަލީ ވަހީދުގެ ޕާސްޕޯޓް ހިފަހައްޓަން ޖެހޭ ސަބަބެއް ނެތް ކަމަށް މިއަދު އަންގާފަ އެވެ. އެ ނިންމުން ވެސް ނިންމަވާފައިވަނީ މައްސަލަ ބައްލަވާ ގާޒީ ހަސަން ސައީދެވެ.
ޝަމީމް ވިދާޅުވި ގޮތުގައި، ކުރިމިނަލް ކޯޓުގެ އެ ނިންމުން ހައިކޯޓުގައި އިސްތިއުނާފުކުރާނެ އެވެ. އެއީ އަލީ ވަހީދަކީ ފިލައިގެން އުޅޭ މީހެއް ކަމާއި ކޯޓުތަކަށް ވެސް ނުފެނިފައިވާ މީހަކަށްވާތީ ކަމަށެވެ.
"މީނަ ޕާސްޕޯޓް ހިފަހައްޓަން ޖެހޭ ސަބަބެއް އޮތް ކަމަށް އަޅުގަނޑުމެންނަށް ގަބޫލު ކުރެވޭ،" ޝަމީމް ވިދާޅުވި އެވެ.
އަލީ ވަހީދުގެ ބޭސްފަރުވާ ނުނިމޭތީ އޭނާ ރާއްޖޭން ބޭރުގައި ހުރުމުގެ ހުއްދަ ކޯޓުން ވަނީ ދީފަ އެވެ. އަދި، އޮންލައިންކޮށް ރާއްޖޭން ބޭރުގައި ހުރެގެން ޝަރީއަތުގެ އަޑުއެހުމުގައި ބައިވެވެރިވެވޭނެ ގޮތް ވެސް ކުރިމިނަލް ކޯޓުން ވަނީ ހަމަޖައްސަފާ އެވެ.
ނަމަވެސް، އެކަމަށް ޕްރޮސިކިއުޓާ ޖެނަރަލް އިއުތިރާޒު ކުރައްވަ އެވެ. އެހެންވެ، ކުރިމިނަލް ކޯޓުގެ އެ ނިންމުންތައް ހައިކޯޓުގައި ޕްރޮސިކިއުޓާ ޖެނަރަލްގެ އޮފީހުން ވަނީ އިސްތިއުނާފުކޮށްފަ އެވެ.
އަލީ ވަހީދުގެ ޕާސްޕޯޓް ދޫކޮށްލި މައްސަލާގައި ޕްރޮސިކިއުޓާ ޖެނަރަލްގެ އޮފީހުން ހައިކޯޓަށާއި ސުޕްރީމް ކޯޓަށް ވެސް ދިޔަ އެވެ. ނަމަވެސް، އަލީ ވަހީދުގެ ޣައިރު ހާޒިރުގައި އެ މައްސަލަ ކުރިއަށް ނުގެންދެވޭނެ ކަމަށް ބުނެ އެ ދެ ކޯޓުން ވެސް މައްސަލަ ބޭރުކޮށްލީ އެވެ.
އަލީ ވަހީދުގެ މައްޗަށް ދައުވާ ކޮށްފައިވަނީ ޓޫރިޒަމް މިނިސްޓަރުގެ ކަމުގައި ހުންނަވައި އެ ތަނުގެ މުވައްޒަފުންތަކަކަށް ޖިންސީ ފުރައްސާރަ އާއި ގޯނާކުރި ކަމަށް އެ މުވައްޒަފުން ތުހުމަތުކުރާ މައްސަލާގަ އެވެ. އަލީ ވަހީދަށް މިނިސްޓަރުކަން ވެސް ގެއްލުނީ އެ މައްސަލާގެ ތެރެއިންނެވެ.
