ޖިންސީ ގޯނާގެ ތުހުމަތުތަކެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޝަރީއަތް ކުރިމިނަލް ކޯޓުގައި އޮންލައިންކޮށް ކުރިއަށް ގެންދާ މައްސަލަ ހައިކޯޓުން ބަލައިގަނެ، އަޑުއެހުންތައް ފެށުމަށް ތައްޔާރުވެއްޖެ އެވެ.
ބޭސްފަރުވާއަށް ކަމަށް ވިދާޅުވެ ރާއްޖޭން ބޭރުގައި ހުންނެވި އަލީ ވަހީދު، ކުރިމިނަލް ކޯޓުގައި ކުރިއަށްދާ ޝަރީއަތުގައި އޮންލައިންކޮށް ބައިވެރިވެވޭނެ ގޮތް ހަދައިދިނުމަށް އެދުމާ އެކު، ކުރިމިނަލް ކޯޓުން އެ އިންތިޒާމް ހަމަޖެއްސި އެވެ.
އަލީ ވަހީދަށް އޮންލައިންކޮށް ޝަރީއަތުގައި ބައިވެރިވެވޭނެ ގޮތަށް އެ މައްސަލަ ބައްލަވާ ގާޒީ ހަސަން ސައީދު ނިންމާފައިވަނީ އިސްގާޒީ އަހުމަދު ޝަކީލްގެ ލަފާގެ މަތިންނެވެ.
އަލީ ވަހީދު ޝަރީއަތުގައި ބައިވެރިވަނީ ލަންޑަނުގައި ހުންނަ ރާއްޖޭގެ ހައިކޮމިޝަނަށް ހާޒިރުވެގެންނެވެ. އެގޮތަށް އަޑުއެހުންތައް ކުރިއަށް ގެންދިޔުމަށް ޕްރޮސިކިއުޓާ ޖެނަރަލް ހުސެއިން ޝަމީމް ގެންދަވަނީ އިއުތިރާޒު ކުރައްވަމުންނެވެ.
އެހެންވެ، ކުރިމިނަލް ކޯޓުން ޝަރީއަތް އޮންލައިންކޮށް ކުރިއަށް ގެންގޮސް، ރާއްޖޭން ބޭރުގައި ހުރެގެން ބައިވެރިވެވޭނެ އިންތިޒާމް ހަމަޖެއްސި ނިންމުން ޕްރޮސިކިއުޓާ ޖެނަރަލްގެ ފަރާތުން ހައިކޯޓުގައި އިސްތިއުނާފުކުރި އެވެ.
ހައިކޯޓުން މިއަދު ބުނި ގޮތުގައި، އެ މައްސަލަ މިހާރު ވަނީ ބަލައިގަނެ، ރަޖިސްޓްރީކޮށްދީފަ އެވެ. މިއީ ދަށު ކޯޓުގައި ހިނގަމުންދާ ޝަރީއަތަކާ ގުޅޭ ކަމެއްކަމުން މި މައްސަލަ ހައިކޯޓުގައި އަވަހަށް ފަށާނެ ކަމަށް ބެލެވެ އެވެ.
އަލީ ވަހީދު ރާއްޖޭން ބޭރަށް ވަޑައިގެންނެވީ ހަތަރު މަސް ފަހުން އޭނާ ރާއްޖެ ވަޑައިގެން ކޯޓަށް ހާޒިރުވާނެ ކަމުގެ ޔަގީންކަން ދެއްވައި، ޖާމިނު އެއްބަސްވުމެއްގައި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ސޮއިކުރެއްވުމުންނެވެ.
މިދިޔަ މަހުގެ ނުވަ ވަނަ ދުވަހަށް އެ މުއްދަތު ވަނީ ހަމަވެފަ އެވެ.
ކުރިމިނަލް ކޯޓުން އަލީ ވަހީދުއާއެކު މުއާމަލާތްތަކެއް ކޮށްފައިވީ ނަމަވެސް، ހައިކޯޓާއި ސުޕްރީމް ކޯޓަށް ވެސް އޭނާއާ މުއާމަލާތް މީގެކުރިން ކުރެވޭ ގޮތެއް ނުވި އެވެ.
އަލީ ވަހީދު ޕާސްޕޯޓް ދޫކުރި އަމުރު ބާތިލް ކުރަން ދައުލަތުން ހައި ކޯޓަށާއި ސުޕްރީމް ކޯޓަށް ދިޔަ ނަމަވެސް، އެ މައްސަލަ ކުރިއަށް ގެންދެވޭ ގޮތް ނުވީ އަލީ ވަހީދު އުޅޭނޫޅޭ ތަނެއް ނޭނގި، ޣައިރު ހާޒިރުގައި އެފަދަ މައްސަލައެއް ނުހިނގޭނެތީ އެވެ.
މިހާރު ދައުލަތުން އަނެއްކާވެސް ވަނީ އަލީ ވަހީދުގެ ޕާސްޕޯޓް ހިފެހެއްޓުމުގެ އަމުރަކަށް ކުރިމިނަލް ކޯޓުގައި އެދިފަ އެވެ. ނަމަވެސް، މިހާތަނަށް އެފަދަ އަމުރެއް ނެރެފައެއް ނުވެ އެވެ.
