ފަންސަވީސް މީހުންނާ އެކު އައްޑޫން މަހަށް ނުކުމެ އުޅުނު ދޯންޏެއް ދަތުރުކުރަމުން ދަނިކޮށް މެދުން ބިންދައިގެން ހިނގައްޖެ އެވެ.
މި ހާދިސާގައި، "މޯހިރާ" ދޯނީގައި ހުރި އެއްވެސް މީހަކަށް އަނިޔާއެއް ނުވެ އެވެ.
އެމްއެންޑީއެފުން ބުނި ގޮތުގައި، ގއ.ދެއްވަދޫގެ އުތުރުން 8.95 ނޯޓިކަލް މޭލު ބޭރުން މަސްވެރިކަން ކުރަމުންދިޔަ ފައިބަރު ދޯނި ބިންދައިގެން ދިޔައީ މޫސުން ގޯސްވުމުގެ ސަބަބުންނެވެ. އެ މީހުންނަށް އެމްއެންޑީއެފުން ވަނީ އެހީތެރިކަން ފޯރުކޮށްދީފަ އެވެ.
ކުރިއަށް އޮތް 24 ގަޑިއިރަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ މެޓުން ބުނެފައި ވާއިރު ރާއްޖޭގެ އެކި ހިސާބަށް ގުގުރުމާއެކު ވިއްސާރަ ކުރާނެ ކަމަށާއި ބައެއް ރަށްތަކަށް ބޯކޮށް ވާރޭ ވެހުން އެކަށީގެންވާ ކަމަށް އެ އިދާރާއިން ބުނެ އެވެ.
ބިންދައިގެން ދިޔަ ދޯނީގެ ކުރީ ބައި-- ފޮޓޯ: މަސްވެރިން
އެގޮތުން އުތުރާއި މެދު ރާއްޖެތެރޭގެ އަތޮޅުތަކަށް ހުޅަނގާއި ހުޅަނގު އުތުރުން ގަޑިއަކު 13 މޭލާއި 23 މޭލާދެމެދު ބާރުމިނުގައި ވައި ޖެހޭނެ ކަމަށް އެ އިދާރާއިން ބުނެ އެވެ. އަދި ދެކުނުގެ އަތޮޅު ތަކަށް ހުޅަނގުން ގަޑިއަކު 8 މޭލާއި 18 މޭލާ ދެމެދު ބާރު މިނުގައި ވައި ޖެހޭ ކަމަށާއި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައި ގަދވުން އެކަށީގެންވާ ކަމަށް ވެސް މެޓުން ބުންޏެވެ.
އުތުރާއި މެދު ރާއްޖެތެރޭގެ ކަނޑުތައް އާންމު ގޮތެއްގައި ގަދަވާނެ ކަމަށާއި ދެކުނުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް އެ އިދާރާއިން ބުނެ އެވެ.
ރާއްޖޭގެ ހުރިހާ ހިސާބަކަށް ވިއްސާރަ ކުރާނެ ކަމަށް ލަފާ ކޮށްފައި ވާއިރި ރާޅޫގެ އުސްމިން ތިން ފޫޓާއި ހަތް ފޫޓަށް އުފުލޭނެ ކަމަށް ލަފާ ކޮށްފައި ވާއިރު ކަނޑު ދަތުރު ކުރުމުގައި މޫސުމަށް ސަމާލުވުމަށް ވަނީ އިލްތިމާސް ކޮށްފަ އެވެ.
