ޓެރަރިޒަމްގެ އަމަލުތަކެއް ހިންގައި އައިއެސް ޖަމާއަތަށް ނިސްބަތްވާ މީހެއް ކަމަށް ތުހުމަތުކޮށް، އައްޑޫ ސިޓީން ހައްޔަރުކުރި މީހަކު ދޫކޮށްލުމަށް ސުޕްރީމް ކޯޓުން މިއަދު ނިންމައިފި އެވެ.
ސުޕްރީމް ކޯޓުން މިނިވަންކޮށްފައިވަނީ ގއ. ކޮލަމާފުށި، ވިކްޓްރީ މަފްތޫހު ސައީދެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށްފަހު ފުލުހުން ހިންގި އޮޕަރޭޝަންގައި އައްޑޫ ސިޓީން ނުވަ މީހަކު ހައްޔަރުކުރި އެވެ. އެ މީހުން ހައްޔަރުކޮށް ބަންދު ފުރަތަމަ ޖެހީ އިންޓެލް ރިޕޯޓެއްގެ މައްޗަށެވެ.
އެމީހުންގެ މައްޗަށް ތުހުމަތުކޮށްފައި އޮތީ، ހަރުކަށި ފިކުރު ފެތުރުމަށްޓަކައި ޓެރަރިޒަމްގެ އަމަލުތަކަށް ހިތްވަރުދީ، އައިއީޑީ ހެދުމަށް ބޭނުންކުރާ ތަކެތި ގެންގުޅެ އެ ތަކެތިން ބަޔަކަށް އަދި މުދަލަށް ގެއްލުންދީފާނެ ކަމުގެ ތުހުމަތެވެ.
ދެ ފަހަރަކަށް ބަންދު އިތުރު ކުރުމަށް ފަހު އޭގެ ތެރެއިން ފަސް މީހަކު ހިތަދޫ މެޖިސްޓްރޭޓް ކޯޓުން ދޫކޮށްލި އެވެ. އެ ފަސް މީހުން ދޫކޮށްލީ ތުހުމަތުވާ މައްސަލާގައި އެމީހުންގެ ބައިވެރިވުން އޮތް ކަމަށް ހެކި ހުށަހަޅާފައި ނެތް ކަމަށް ބުނެ އެވެ.
އެ މައްސަލަ ދައުލަތުގެ ފަރާތުން ހައިކޯޓުގައި އިސްތިއުނާފުކުރުމުން ނިންމީ، އެ ފަސް މީހުން ވެސް އަލުން ހައްޔަރުކުރަން ޖެހޭނެ ކަމަށެވެ.
ހައިކޯޓުން އެ މީހުންގެ ބަންދަށް 15 ދުވަސް ދޭން ނެރުނު އަމުރު ސުޕްރީމް ކޯޓުގައި އެ ފަސް މީހުންގެ ތެރޭ ހިމެނޭ މަފްތޫހު އިސްތިއުނާފުކުރި އެވެ.
ސުޕްރީމް ކޯޓުގައި އޭނާގެ ފަރާތުން ފާހަގަކޮށްފައިވަނީ އިންޓެލް ރިޕޯޓްގެ އިތުރުން އެހެން ހެއްކެއް އޭނާގެ މައްޗަށް ނެތުމުން ބަންދުގައި ބަހައްޓަން ޖެހޭ ސަބަބެއް ނެތް ކަމެވެ.
މައްސަލާގައި މިއަދު ސުޕްރީމް ކޯޓުން ވެސް އެކަމަށް ތާއިދުކުރި އެވެ.
އެ ކޯޓުން ބުނި ގޮތުގައި ހަމައެކަނި އިންޓެލް ރިޕޯޓެއް އޮވެގެން އެއަށް ބާރުލިބޭ އެހެން ހެއްކެއް ނެތި ޖިނާއީ އިޖުރާއަތުގެ ގާނޫނުގައި ބުނާ "ކޮންމެ ވެސް މިންވަރެއްގެ ހެކި" ހުރި ކަމުގެ އޮޅިގަނޑު ދަށު ކޯޓުގައި ގިރާ ނުކުރެވޭނެ ކަމަށް ދަށު ކޯޓުގެ ގާޒީ ނިންމީ ގާނޫނާ ހިލާފަށް ކަމަށް ބަލާނެ ތަނެއް ނެތެވެ.
އެހެންވެ، މަފްތޫހު ބަންދުކުރަން ނެރެފައި އޮތް އަމުރު ސުޕްރީމް ކޯޓުން ބާތިލްކުރި އެވެ.
ނަމަވެސް، އިންޓެލް ރިޕޯޓް ފިޔަވައި ތަހުގީގަށް އެހެނިހެން ހެކި ލިބިފައިވާ ނަމަ، އެ ހެކިތަކަށް ރިއާޔަތްކޮށް ޖިނާއީ އިޖުރާއަތުގެ ގާނޫނުގެ ދަށުން މަފްތޫހު ސައީދުގެ ބަންދުގެ މުއްދަތު އިތުރުކުރަން ޖެހޭތޯ ބެލުމަށް ހިތަދޫ މެޖިސްޓްރޭޓް ކޯޓަށް ހުށަހެޅުމުގެ އިހްތިޔާރު ދައުލަތަށް އޮންނާނެ ކަމަށް ސުޕްރީމް ކޯޓުން ބުންޏެވެ.
