އައްމާން، އުރުދުން (ޖޫން 29) - އުރުދުންގައި ބަގާވާތާ ކުރަން އުޅުނު ކަމުގެ ތުހުމަތާއެކު ޝާހީ އާއިލާގެ ތެރޭގައި ނުތަނަވަސްކަން އުފެދުނުތާ މަސްތަކެއް ފަހުން، އެ ގައުމުގެ ސިޔާސީ ނިޒާމު ޒަމާނީ ކުރަން ރާވާފައިވާ ކަމަށް އޮފިޝަލަކު ބުނެފި އެވެ.
ކުރީގެ ބޮޑު ވަޒީރު ސާމިރް އަލް ރިފާއީ ވިދާޅުވީ އެ ރޭވުމުގެ ދަށުން އުރުދުންގެ ރައްޔިތުންނަށް "އެންމެ އެކަށޭނަ ސިޔާސީ ދިރިއުޅުމެއް" ލިބިދޭނެ ކަމަށެވެ. އެ ބަދަލުތައް ގެނައުމަށް އެންމެ އިސްވެރިއެއްގެ ގޮތުގައި ރަސްގެފާނު އަބްދުﷲ ދެ ވަނަ އައްޔަނު ކުރެއްވި ރިފާއީ އެވެ.
ރަސްގެފާނުގެ އެއްބަފާ ބޭބޭފުޅު އަދި ކުރީގެ ވަލީ އަހުދު އަމީރު ހަމްޒާއާ ގުޅިގެން ގަބީލާތަކުގެ ވެރިންތަކެއް އުރުދުންގައި ބަގާވާތެއް ކުރަން އުޅުނު ކަމަށް ތުހުމަތު ކުރީ މިދިޔަ އޭޕްރިލް މަހު އެވެ. އޭގެ އިތުރުން އުރުދުންގައި މުޒާހަރާ ކުރުން ފަހަކަށް އައިސް ވަނީ އިތުރުވެފަ އެވެ.
ސިޔާސީ ނިޒާމު ޒަމާނީ ކުރުމުގެ މަސައްކަތުގެ ތެރެއިން ހާއްސަ ކޮމިޓީގެ ރައީސްކަން ކުރައްވާނީ ރިފާއީ އެވެ. އެ ކޮމިޓީގައި 91 މެމްބަރުން ހިމެނޭ އިރު، އެއީ އިސްލާމިސްޓުންނާއި ސެކިއުލަރިސްޓުންނާއި ނޭޝަނަލިސްޓުންނާއި، ކޮމިއުނިސްޓުން އަދި މިނިވަން ފިކުރުގެ މީހުންނެވެ. އެ މީހުން ހޮވާފައިވަނީ ސިޔާސީ، ތައުލީމީ އަދި މަދަނީ ދާއިރާތަކުންނެވެ.
އެ ކޮމިޓީއިން ދިރާސާތައް ކުރުމަށް ފަހު "އޮކްޓޯބަރު މަހުގެ ކުރިން ސަރުކާރަށް ލަފާ ދޭނެ" އެވެ. އެއަށް ފަހު ސަރުކާރުން އެ ހުށަހެޅުންތައް ފޮނުވާނީ ގާނޫނު ހަދާ މަޖިލީހުގެ މަތި ގެ އާއި ތިރި ގެއަށެވެ.
"އަޅުގަނޑުމެންގެ އަމާޒަކީ ގާނޫނު ހަދާ މަޖިލީހުގައި އުރުދުންގެ ގިނަ ބަޔަކު ތަމްސީލްވެގެން ދިއުން. އަދި ގިނަ މީހުންނަށް އިންތިހާބުގައި ވާދަކުރަން ހިތްވަރު ދިނުން. އަދި މީހުން އަޑު އުފުލުމުން ނަތީޖާ ނުކުންނަކަން ދެއްކުން،" ރިފާއީ ވިދާޅުވި އެވެ.
ރިފާއީ ވިދާޅުވީ އެކަން ހާސިލް ކުރުމަށް، ކޮމިޓީން "އިންތިހާބީ ގާނޫނުގެ އާ ޑްރާފްޓެއް" ހުށަހަޅާނެ ކަމަށެވެ. އޭގެ އިތުރުން "އުރުދުން ޒަމާނީ ކުރަން ސިޔާސީ ޕާޓީތަކަށް ފުރުސަތުދޭ" ހުށަހެޅުމެއް ވެސް ތައްޔާރު ކުރާނެ ކަމަށް އޭނާ ވިދާޅުވި އެވެ.
