ޕެރިސް، ފްރާންސް (ޖޫން 29) - މުޅި ދުނިޔޭގައި ކޮވިޑާ ދެކޮޅަށް މިހާތަނަށް ވެކްސިންގެ ތިން ބިލިއަން ޑޯޒް ޖަހާފައިވާ ކަމަށް އޭއެފްޕީގެ ތަފާސްހިސާބުން ދައްކައިފި އެވެ.
ވެކްސިންގެ އެއް ބިލިއަން ޑޯޒް ދީ ނިންމުމަށް 20 ހަފްތާ ނެގިއިރު، މިހާރު ގައުމުތަކުން ވެކްސިން ޕްރޮގްރާމްގެ ދުވެލި އަވަސްކޮށްފައިވާކަން ފާހަގަކުރެވެ އެވެ.
އެގޮތުން ދެ ބިލިއަން ޑޯޒް ހަމަވުމަށް ފަހު، ތިން ބިލިއަނާ ހަމައަށް ދިޔެއީ އެންމެ ހަތަރު ހަފްތާ ތެރޭގަ އެވެ.
ކޮންމެ 10 ޑޯޒަކުން ހަތަރު ޑޯޒް ދީފައި ވަނީ ޗައިނާގަ އެވެ. އެއީ 1.2 ބިލިއަން ޑޯޒެވެ. އިންޑިއާގައި 329 މިލިއަން އަދި އެމެރިކާގައި 324 މިލިއަން ޑޯޒް ދީފައި ވެ އެވެ.
އާބާދީގެ ނިސްބަތުން ބަލާއިރު، އެންމެ ގިނައިން ވެކްސިން ޑޯޒް ދީފައިވަނީ މެދުއިރުމަތީގެ ތިން ގައުމެކެވެ. އެއީ ޔޫއޭއީ، ބަހްރެއިން އަދި އިޒްރޭލެވެ. އެ ތިން ގައުމުން ވަނީ ގާތްގަނޑަކަށް އާބާދީގެ 60 ޕަސެންޓު މީހުންނަށް ވެކްސިން ދީ ފުރިހަމަކޮށްފަ އެވެ.
ދުނިޔޭގެ ނިސްބަތުން ބަލާއިރު، ވެކްސިން ދިނުމުގައި ގައުމުތަކުގެ މެދުގައި އޮތް ފަރަގު ދަނީ ވަރަށް ބޮޑަށް ފެންނަމުންނެވެ. އެގޮތުން މުއްސަނދި ގައުމުތަކުން ކުރި ހޯދަމުން ދާއިރު، ފަގީރު ގައުމުތަކަށް ވެކްސިން ލިބޭނެ ގޮތެއް ނެތެވެ.
އެގޮތުން އެންމެ ފަގީރު ގައުމުތަކުން ކޮންމެ 100 މީހަކަށް ދެވިފައި ވަނީ އެންމެ ޑޯޒެކެވެ. އެއާ ހިލާފަށް މުއްސަނދި ގައުމުތަކުން ކޮންމެ 79 މީހަކަށް އެއް ޑޯޒް ދީފައި ވެ އެވެ.
ވެކްސިން ދިނުން އެއް ގޮތަކަށް ވެސް ނުފެށޭ ފަސް ގައުމު އެބަ އޮތެވެ. އެއީ ޓަންޒޭނިއާ، ބުރުންޑީ، އެރިޓްރިއާ، ހެއިޓީ އަދި އުތުރު ކޮރެއާ އެވެ.
އެންމެ ގިނައިން ބޭނުން ކުރަމުންދާ ވެކްސިނަކީ އޮކްސްފޯޑާއި އެސްޓްރަޒެނެކާގެ ވެކްސިނެވެ. އެގޮތުން ކޮންމެ ދިހަ ގައުމަކުން އަށް ގައުމުގައި އެ ވެކްސިން ބޭނުން ކުރެ އެވެ.
