ބުކަރެސްޓް، ރުމޭނިއާ (ޖޫން 29) - ޔޫރޯ ފުޓްބޯޅަ މުބާރާތުގައި ރޭ ސްވިޒަލެންޑާ ދެކޮޅަށް ފްރާންސްގެ ކީލިއަން އެމްބާޕޭ ފޮނުވާލި ޕެނަލްޓީ ނާކާމިޔާބުވެ، އެ ޓީމު މުބާރާތުން ކެޓިއިރު، އޭނާ އެކަމަށް ސަޕޯޓަރުންގެ ކައިރިން މައާފަށް އެދިއްޖެ އެވެ.
ރޭގެ މެޗު ފުރިހަމަ ވަގުތާއި އިތުރުވަގުތުގެ ދެ ހާފް ކުޅެ ނިމުނުއިރު 3-3 އިން އެއްވަރުވެ ނަތީޖާ ނެރެން ޖެހުނީ ޕެނަލްޓީ ޖަހާށެވެ. ޕެނަލްޓީގައި ފްރާންސް 5-4 އިން ބަލިވިއިރު، ދެ ޓީމުން ފޮނުވާލި ޕެނަލްޓީތަކުގެ ތެރެއިން ވެސް ނާކާމިޔާބުވީ ހަމައެކަނި އެމްބާޕޭ ޖެހި ޕެނަލްޓީ އެވެ. ފްރާންސްގެ ފަސް ވަނަ ޕެނަލްޓީގައި އެމްބާޕޭ ފޮނުވާލި ބޯޅަ ސްވިޒަލެންޑްގެ ކީޕަރު ޔެން ސޮމާ ވަނީ މަތަކޮށް އެ ޓީމު މޮޅުކޮށްދީފަ އެވެ.
މެޗަށް ފަހު އުމުރުން 22 އަހަރުގެ އެމްބާޕޭ ވަނީ ޓްވިޓާ މެދުވެރިކޮށް ނެރުނު ބަޔާނެއްގައި ޕެނަލްޓީގެ ނާކާމިޔާބީއާ ގުޅިގެން ސަޕޯޓަރުންގެ ކިބައިން މައާފަށް އެދިފަ އެވެ.
އެމްބާޕޭ ބުނީ އެހެން ކުޅުންތެރިންނެކޭ އެއްގޮތަށް އޭނާ ވެސް ޕެނަލްޓީ ޖަހަން ނިންމީ ޓީމު މޮޅުކޮށްދޭން ކަމަށާއި ނާކާމިޔާބު ވުމުން އޭނާ ފެއިލްވީ ކަމަށެވެ.
"މި ކަހަލަ ކަމަކަށް ފަހު ނިދުން ވާނީ އުނދަގޫ ކަމަކަށް. އެކަމަކު މިއީ އަހަރެމެން އެންމެ ލޯބިވާ ކުޅިވަރު ކަމަށްވާ ފުޓްބޯޅައިގައި އޮންނާނެ ރިސްކުތައް. އަހަންނަށް އެނގޭ ސަޕޯޓަރުން ތިބޭނީ މާޔޫސްވެފައިކަން އެހެންވެ އަަހަރެން މައާފަށް އެދެން. އަދި ސަޕޯޓަރުން ދިން ސަޕޯޓަށް ޝުކުރު ވެސް އަދާކުރަން ބޭނުން،" އެމްބާޕޭ ބުންޏެވެ.
މި ފަހަރުގެ މުބާރާތުގައި ފްރާންސް ކުޅުނު ހަތަރު މެޗުގައި ވެސް ފުރަތަމަ އެގާރައިގައި ހިމެނުނު އެމްބާޕޭ މުބާރާތް ނިންމާލަން ޖެހުނީ ގޯލެއް ވެސް ނުޖެހި އެވެ. އޭނާ ބުނީ މީގެ އެންމެ މުހިއްމު ކަމަކީ މިކަމުން އަރައިގަނެ ވަރުގަދަ އަށް އެނބުރި އައުން ކަމަށާއި އޭނާގެ އުއްމީދަކީ ވެސް އެއީ ކަމަށެވެ.
ފްރާންސްގެ ކޯޗު ޑިޑިއޭ ޑެޝޯމްޕްސް ބުނީ ބަލިވުމުގެ ޒިންމާ ހަމައެކަނި އެމްބާޕޭ ބޮލުގައި އެޅުވުމަކީ ރަނގަޅު ގޮތެއް ނޫން ކަމަށެވެ. ބައެއް ފަހަރު ޕެނަލްޓީ ޖެހުން ކަހަލަ ރިސްކު ބޮޑު ޒިންމާއާ ހަވާލުވެ، ރަނގަޅަށް ކަންތައްތައް ނުވުމަކީ ފުޓްބޯޅައިގައި ދިމާވާ ކަމެއް ކަމަށް ބުނެ ޑެޝޯމްޕްސް ވަނީ އެމްބާޕޭގެ ދިފާއުގައި ވާހަކަ ދައްކައިފަ އެވެ.
"އޭނަ (އެމްބާޕޭ) އަށް ހުރީ އަސަރުކޮށްފައި ވަރަށް ބޮޑަށް. އެކަމަކު މިއީ ހަަމައެކަނި އޭނަގެ ސަބަބުން ވީ ކަމެއް ނޫން. އަހަރެމެން މޮޅުވާނީ ޓީމެއްގެ ގޮތުގައި ބަލިވަނީ ވެސް ޓީމެއްގެ ގޮތުގައި،" ޑެޝޯމްޕްސް ބުންޏެވެ.
މި ފަހަރުގެ މުބާރާތަށް ފޭވަރިޓެއްގެ ގޮތުގައި ނުކުތް ފްރާންސް 2010 ވަނަ އަހަރަށް ފަހު ފުރަތަމަ ފަހަރަށް ބޮޑު މުބާރާތެއްގެ ކުއާޓާ ފައިނަލަށް ނުގޮސް ކެޓިއިރު، ފްރާންސްގެ ކޯޗުގެ މަގާމުގައި ޑެޝޯމްޕްސް އަށް ވަނީ ޕްރެޝަރު ބޮޑުވެފަ އެވެ. ރޭގެ މެޗަށް ފަހު ފްރާންސް ޓީމުގައި ޑެޝޯމްޕްސްގެ ކުރިމަގާ ބެހޭގޮތުން ސުވާލުކުރުމުން އޭނާ ބުނީ މިއީ އަދި މުސްތަގުބަލުގެ ވާހަަކަ ދައްކަން އަވަސް ވަގުތެއް ކަމަށެވެ.
