ކޮލޮމްބޯ، ސްރީ ލަންކާ (ޖޫން 28) - ބޭރު ފައިސާގެ ރިޒާވް ދަށްވާ މައްސަލަ ހައްލު ކުރަން މުދާ އިމްޕޯޓް ކުރުމުގައި އިތުރު ހުރަސްތައް ގާއިމް ކުރަން ސްރީލަންކާގެ މަރުކަޒީ ބޭންކުން ގޮވާލައިފި އެވެ.
ކޮވިޑުގެ ބަލިމަޑުކަމާއެކު ލަންކާގެ ބޭރު ފައިސާގެ ރިޒާވަށް ވަނީ ވަރަށް ބޮޑަށް އަސަރުކޮށްފަ އެވެ. މިދިޔަ އަހަރު އެ ގައުމުގެ ފައިސާގެ އަގު ރިކޯޑް މިންވަރަކަށް ވެއްޓުނެވެ.
ލަންކާގެ ބޭރު ދަރަނި ނުދެއްކިދާނެ ކަމުގެ ބިރު އެބަ އޮތް ބައިނަލްއަގްވާމީ ރޭޓިން އޭޖެންސީތަކުން ބުނެ އެވެ. އެހެންވެ، މަރުކަޒީ ބޭންކުން މިހާރު ވެސް ވަނީ ޑޮލަރު ވިއްކުން ކޮންޓްރޯލްކޮށްފަ އެވެ.
އެގޮތުން ޒަރޫރީ ތަކެތި އިމްޕޯޓް ކުރާ ފަރާތްތަކަށް ބޭންކުތަކުން ޑޮލަރު ދޫކުރަނީ ވަކި ކޯޓާއަކަށެވެ. ނަމަވެސް ގަވަރުނަރު ލަކްޝްމަން ވިދާޅުވީ އަދިވެސް އިތުރު ފިޔަވަޅު އަޅަން ޖެހޭ ކަމަށެވެ.
މިދިޔަ އަހަރު އެ ގައުމުން ވަނީ ލަގްޒަރީ މުދަލާއި ކާރު އިމްޕޯޓް ކުރުން މަނާކޮށްފަ އެވެ. މަނާކުރި ތަކެތީގެ ތެރޭގައި ކައްކަން ބޭނުން ކުރާ ރީނދުލާއި، ފާހާނަ ތައްޓާއި، ކޮސްމެޓިކްސް ހިމެނެ އެވެ.
ދެހާސް ނަވާރަ ވަނަ އަހަރު ރައީސް ގޮތަބަޔަ ރާޖަޕަކްސަ ވެރިކަމާ ހަވާލުވެ ވަޑައިގެންނެވި އިރު ބޭރު ފައިސާގެ ރިޒާވްގައި ހުރީ 7.8 ބިލިއަން ޑޮލަރެވެ.
ނަމަވެސް މިހާރު އެ އަދަދު ވަނީ ހަތަރު ބިލިއަން ޑޮލަރަށް ތިރިވެފަ އެވެ. މިދިޔަ އަހަރު ލަންކާގެ އިގްތިސާދި 3.6 ޕަސެންޓު ފަހަތަށް ދިޔަ އެވެ.
އެއީ 1948 ގައި އިނގިރޭސީންގެ އަތުން މިނިވަންކަން ލިބުނު ފަހުން ލަންކާގެ އިގްތިސާދު އެންމެ ބޮޑަށް ވެއްޓުނު އަހަރެވެ.
ލަކްޝްމަން ވިދާޅުވީ ކުރިއަށް އޮތް ހަ މަހުގެ ތެރޭގައި ބޭރުގެ ދަރަންޏަށް 3.6 ބިލިއަން ޑޮލަރު ދައްކާނެ ކަމަށެވެ. ލަންކާއިން ވަނީ ގިނަ ގައުމުތަކަކުން ލޯނު ނަގާފަ އެވެ.
އެގޮތުން ބަންގްލަދޭޝުން 250 މިލިއަން ޑޮލަރާއި، އިންޑިއާއިން 400 މިލިއަން ޑޮލަރާއި، އިންޓަނޭޝަނަލް މަނިޓަރީ ފަންޑު (އައިއެމްއެފް) އިން 800 މިލިއަން ޑޮލަރު ލޯނުގެ ގޮތުގައި ވަރަށް އަވަހަށް ލިބޭނެ އެވެ.
އޭގެ އިތުރުން މޭ މަހު ދެކުނު ކޮރެއާއިން 500 މިލިއަން ޑޮލަރުގެ ލޯނެއް ނެގި އެވެ. އަދި ފެބްރުއަރީ މަހު ކޮރެއާއިން މުދާ އިމްޕޯޓް ކުރުމަށް 1.5 ބިލިއަން ޑޮލަރު ކަރަންސީ ސްވޮޕެއް ހެދި އެވެ.
